Godthu milkuŋalana Mawtjitjkala nhaltjan yurru ŋayi djäma ŋunhiyi girri'nha ŋuriki Godkalaŋuwu buṉbuwu
25:1-40 (God gave Moses the pattern for the tabernacle furniture)
1Ga ŋunhalanydja bäyma bukuŋura Garrayyu waŋana Mawtjitjnha bitjarra, 2“ḻakaraŋanydja biyaka Yitjuralpuyŋuwanydja, walala yurru wekama mundhurr ŋarraku; birrka'mirriyu yolŋuyu ŋunhi walala ḏukṯukthirrinydja yurru, walala yurru gäma'-gamanydja ŋarraku mundhurrnydja, bala wekamana yurru nhokalana goŋlili. 3-7Ga dhuwala mundhurrnydja malanha walala yurru weka'-wikamanydja gam', garwarrwarr bulayi, ga lätuŋdhinyara, ga wiripu ḻatju'mirri maryakal, ga wäyin barrwaṉ', ga lanapu' dharpa, ga weyika lanhdhirra'wu, ga buŋgan bäw' weyika, ga ḻatju'mirri guṉḏa. 8Yo, dhiyaŋuyinydja malaŋuyu nhuma yurru djäma dhä-mana'-manapanna ŋarraku buṉbuna ganaŋ'maraŋa, märr yurru ŋarranydja nhumalaŋgala nhina yukurra ṉapuŋga'na. 9Ŋarra yurru nhumalaŋgu ḻakaramanydja ga milkuma buṉbunharawu buṉbuwunydja, ga wiripu maryakal nhuma yurru djämayi djinawa'wunydja ŋuruku buṉbuwu. Nhuma yurru djämanydja bukmaknha yana bitjan yana liŋgu ŋunhi ŋarrapi nhumalaŋgala yurru milkuma.
10-16“Yo, biyaka nhuma yurru djämanydja gam': Nhuma yurru dhuḻ'yundja bathi lanapu' dharpa, yurru märr-nyumukuṉiny, ga ŋapalilinydja nhuma yurru mam'marama garwarrwarr'nha djinawa'kurru ga warraŋulkurru. Ga bitjandhiyi nhuma yurru dhawaraŋ'tja märrma' yana gali'lili ga gali'lili, märrma'lili yana, ga dharpa gulŋiyinyamaranharawu ŋurikiyi gänharawu yukurranharawu. Dhipalanydja bathilili nhuma yurru galkaṉ rommirri maṉḏanha guṉḏa ŋunhi ŋarra boŋguŋu wekaŋu nhumalaŋgu. Ga ŋunhi bathinydja boŋguŋu yäku Dhawu'-nherraṉminyarawuynha Bathi.
17-22“Ga biyakayi bili djäma dhurrwarawunydja dhaḻ'yunarawu ŋuruku bathiwu, yurru dhurrwaranydja nhuma yurru djäma garwarrwarr bathanara. Ga biyakayi liŋgu djämayi märrma' garwarrwarr maṉḏanha, djiwarr'wuynha yolŋunha maṉḏanha, ga nherralanydja maṉḏanha bukulili maṉḏanyŋulili ŋunhimala dhurrwaralili; maṉḏa yurru nhinanydja yukurra gumurr'yunmirri, ga binbarrnydja maṉḏanha bärr'yunmaraŋa garrwarkurru, warraw'kuma, ŋapa-ŋäkirrmarama yukurra yurru ṉapuŋga ŋunhiyi dhurrwaranha bathinha yana. Yo, ŋunhi guṉḏanydja yurru rommirrinydja ŋunhana djinawa'na ŋunhilimi bathiŋura, ga dhurrwaranydja yurru ga garrwarnha ŋapaŋurana, ga yäkunydja yurru ŋunhiyi dhurrwaranydja Mel-wuyunharawuynha Wäŋa, liŋgu ŋunhimalayina ŋarra nhumalanha yurru guwatjmandja, ga ŋunhiliyi ŋarra yurru yulŋunydja ṉapuŋga' yana ŋurikala maṉḏakala, ŋapaŋura yana garrwar Mel-wuyunaramirriŋura Wäŋaŋura, liŋgu ŋuliŋuruyina ŋarra yurru wekama dhäruktja nhumalaŋgu Yitjuralpuyŋuwunydja.
23-30“Ga biyakayi liŋgu nhuma yurru ŋamaŋamayurra bala'palanydja dharpanydja, ga ŋapanydja ŋäkirrmaraŋa garwarrwarr'yuna, ga garrwaryi gunganhamirriyaŋanydja gurrunhara. Ga ŋunhimalayi bala'palalilinydja nhuma yurru gurrunhan yukurra ŋayaŋay', märrma' rulu ga märrma' bäythinyaranydja, liŋgu dhuwalayinydja ŋayaŋay' malanha bitjanna liŋguna yurru yukurra ŋorrana ŋarrakalaynha gumurrŋura.
31-39“Ga biyakayi liŋgu nhuma yurru ŋamaŋamayurrayi lanhdhirra'wuynydja, garwarrwarr'mirriyi yana, djingaryunarawuynydja, yurru waṉa'-waṉanydja ŋunhiyi lanhdhirrany'tja yurru waŋgany rulu ga märrma' bäythinyara, ga ŋunhiliyi gorru'-gurrumanydja marrtji yurru dhumbu'-yumbuḻ rupa malanha weyika'wuy djarraṯawun'kunharawuy.
40“Yo, biyakayina yana djämanydja dhuwalayinydja malanha, djan'kukuŋa yana, bitjarra ŋarra ŋunhi milkuŋala nhuŋu ŋunhili bukuŋura.” Bitjarra ŋayi Garray waŋananydja.