gnnNTOTPO

Genesis 47

1-12Ŋuliŋurunydja ŋayi Djotjipthu garr'yurruna ŋunhi wäwa'mirriŋunhana walalanha, bala gäŋala ga milkuŋala Giŋgalana. Ga ŋunhi ŋayi nhäŋalanydja walalanha, ga ŋäkula ŋunhi walalanydja wäyin-djäkamirri walala, bala yana ŋuriŋiyi Giŋdhunydja walalanha wekaŋala wäŋa ŋunha nhäyika yäku Gutjinbuy, ŋunha bäyma Yetjip muka, liŋgu ŋunhili wäŋaŋura ŋatha yurru ŋuthan guḻku' muka ŋuriki wäyingu walalaŋgu ḻukanharawu. Yuwalkthi Djaykupku miṯtjinydja ŋunhi yolŋunydja walala nhinanana ŋunhimala Gutjinlilinydja, ga dhunupana Djotjipthunydja yukurrana wekaŋala ŋathana nhanukalaŋuwu bäpa'mirriŋuwu ga malawu nhanukalaŋuwu bukmakku.

Djaykupku dhä-yawar'yunaramirrina dhäruk

47:27—49:28 (Jacob's last words)

27Yo, ŋunhi Yitjuralpuyŋunydja yolŋu'-yulŋu nhinanana-a-a yukurrana ŋunhilina Yetjip, yanana liŋgu-u-u, bala walala ḻukunydjayinana dhikana, ŋatha-guḻku'mirriyinana ga wäyindja guḻku'yinana marrtjina dhika dhaŋaŋdhinana ga yumurrkuny'tja malanydja guḻku'yinana.

28-29Ga ŋunhi ŋayi Djaykuptja liŋguna worruŋuyinana, dhuŋgarranydja nhanŋu 147-nha, walunydja marrtjina galkithinana nhanŋu rakunydhinyarawuna, bala yana ŋayi gawaw'yurruna nhanukalayŋuwu gäthu'mirriŋuwuna Djotjipkuna, ga waŋananydja nhanukala ŋayi bitjarra, “Nhenydja ŋarranha dhawu'mirriyaŋanydja yuwalkkuŋa yana. Ŋunhi ŋarra yurru rakunydhirrinydja dhiyala, ga yaka ŋarranha dholkuŋa dhipalanydja bäyma Yetjiplilinydja. 30Djaw'yurra ŋarranha rumbalnydja balayi Gaynanlili, ga dholkuŋa ŋunhamala yana bili wäŋalili ŋunhi bäpa'mirriŋu ŋarraku dholthirri nhina.”

31Ga ŋayi Djotjiptja yoraŋalana nhanŋu, bala waŋana dhawu'-nherrara bitjarrana, “Yuwalk yana ŋarra yurru nhuna dholkumanydja ŋunhamala liŋgu, bitjan yana liŋgu bitjan dhuwali nhe yukurra waŋa.”