gnnNTOTPO

BILIPAYPUYŊUWU DHÄRUK 1

1Dhuwalanydja djorra' dhäwu' ŋarrakuŋu Bolwuŋu ga Dimithiwuŋu ŋinyalaŋguŋu, ŋunhi ŋilinyunydja maṉḏa dhuwala djämamirri maṉḏa Djesu-Christku, ga wukirrina ŋilinyu yukurra dhäruktja dhuwala nhumalaŋgu bukmakku yana Garraywalaŋumirriwu walalaŋgu dhipali wäŋalili Bilipaylili yäkulili; nhumalaŋgu djäkamirriwu walalaŋgu ŋunhi nhuma miṯtjiŋura dhiyalimi, ga nhumalaŋgu ŋunhi nhuma guŋga'yunaramirri walala, ga wiripu-guḻku'wu, bukmakku yana ŋunhi nhuma yukurra nhina dhuwali dhambay-manapanmirri Djesu-Christkala, waŋganynha yana.

2Ŋarra ŋäŋ'thun yukurra bukumirriyama nhumalaŋgu yulŋunydja, märr yurru Godthu ŋilimurruŋgala Bäpayu ga Garrayyu Djesu-Christthu gäma yukurra nhumalanha galkikuma yana nhanukalay ŋayi märr-ŋamathinyarayu, märr yurru nhumanydja nhina yukurra ŋayaŋu-yal'yunara waŋgany-manapanmirri Djesu-Christkala.

Bolwuŋu dhuwalanydja bukumirriyanhara

3Yo, bitjan liŋgu ŋarra ŋuli yukurra guyaŋirrinydja nhumalanha dhipali, ga bukumirriyama ŋarra ŋuli buku-wurrpan Godnhanydja nhumalaŋgu, 4yurru ŋayaŋuyu goŋmirriyirri yana ŋarra ŋuli bukumirriyamanydja yukurra nhumalaŋgu, 5liŋgu ŋarra ŋuli guyaŋirrina ŋunhina ŋunhi nhuma ŋuli yukurra dhärra waŋganyŋura ŋarrakala, guŋga'yun ŋuli yukurra ŋarranha beŋuru liŋgu ŋurruŋuru, ga yana liŋgu ga dhiyaŋu-wala nhuma ŋuli guŋga'yun ŋarranha ḻakarama birrŋ'marama dhuwalayi dhäwu' Garraywalaŋuwuy. 6Ga biyapul dhiyaku ŋarra marŋgi gam': Ŋunhinydja ŋurruŋuranydja ŋayi Godthu nhumalanha walŋakuŋalana märraŋala, ŋunhiyina ŋayi ŋurru-yirr'yurrunanydja djäma ŋamakurruny'tja nhumalaŋgala ŋayaŋulilinydja, ga bitjanna liŋguna ŋayi yurru yukurra djämanydja yana nhumalaŋgala, yana liŋgu yurru-u-u, ga dhawar'marama ŋayi yurru warrpam' nhumalaŋgala, ŋuriŋina waluyunydja Djesu-Christkalana, ŋunhi ŋayi yurru bunana.

7Yo, dhunupa ŋarraku dhuwala bitjanarawuyinydja goŋmirriyinyarawunydja ŋunhi ŋarra yurru guyaŋirrinydja nhumalanha, liŋgu nhumanydja dhuwala ŋayaŋuŋura ŋarrakalana. Ŋayipi Godtja ŋuli yukurra ŋarraku dharray warray bitjan liŋgu, ḻatju'kuma warray gäma dhiyala ḻoḻuŋura ŋunhi ŋarra gärri yukurra dhuwala, ga ŋäthili ŋunhi, ŋunhi ŋarra yukurranha ŋuli marrtjinya ga ḻakaranha dhäwu' wäŋalili ga wäŋalili bitjana. Ga nhumalanhanydja ŋayi ŋuli Godthu yukurra gäma ḻatju'kumayi, rrambaŋikumana ŋilimurrunha, liŋgu ŋilimurrunydja dhuwala bitjan waŋganynha ŋayaŋu ŋilimurru yana. 8Yo, God ŋayipi marŋgi ŋarrakunydja, ŋunhi ŋarranydja yukurra ḻakarama dhuwala yuwalk; yuwalkkuma yana ŋarra yukurra märr-ŋamathirrinydja nhumalaŋgu, märryu-ḏapmaramanydja ŋarra nhumalanha ŋuli ŋuriŋina wal'ŋu märryu-ḏapmaranharayu nhanukalaynha Djesu-Christkalana yanana.

9Yo, bitjan liŋgu ŋarra ŋuli bukumirriyamanydja yukurra nhumalaŋgu, ŋäŋ'thundja ŋuli yukurra Gunhu'wala, märr nhanukalanydja ŋuriŋinydja märr-ŋamathinyarayu yukurra yurru nhumalanha bitjanna liŋguna dhaŋaŋguma ŋayaŋunydja, märr yurru nhuma märr-ŋamathinyaramirri nhumalaŋguway nhuma bala-lili'yunmirri, yuwalkkuma wal'ŋu wirrki. Ga wiripunydja ŋarra ḏukṯuk nhumalaŋgu, nhuma yurru wirrki yana marŋgithirrinydja nhanŋu Godku yuwalkkuma, ga dharaŋan nhanŋu ŋunhi yuwalk rom, 10märr nhuma yurru yuwalkkuma yana gatjarr'yundja yukurra bukmak nhä malanha rom, bala djarr'yundja, bala nhina yukurra yurru ḻatju'na wal'ŋu dhikana, ga ḏarrtjalknha, ŋula nhämiriwnha yana, girri'-ŋamathirrina ŋurikina ŋunhi ŋayi yurru Garray gumurr-roŋiyirri. 11Yo, ŋäŋ'thundja ŋarra yukurra Godnhanydja nhumalaŋgu, märr yurru nhuma nhina yukurra ŋamakurru'ŋura yana romŋuranydja, bitjan yurru bitjan ŋuli dharpa dhärra yukurra borum dhaŋaŋmirri, yurru ŋuriŋi yana waŋganydhuna ganydjarryunydja, Djesu-Christkalana yanana nhuma yukurra yurru djäma ŋamakurruny'tja wal'ŋu ga dhuwurr-dhunupana yana.

Yo, ŋarra ḏukṯuk nhumalaŋgu, nhuma yurru nhina yukurra ŋamakurru' wal'ŋu, märr yurru ŋuruŋu wiripu-guḻku'yunydja yolŋu'-yulŋuyu nhäma nhumalaŋgalanydja ŋunhi Godku ḻatjuny'tja rom malanha, bala wokthunna yurru nhanŋu Godku.

Bolnydja yukurra ŋayaŋu-djulŋithirri yana walŋawu nhinanharawu wo rakunydhinyarawu

12Yo, gutha walala ŋarraku. Yaka walala warwuyurra ŋarrakunydja ŋunhi ŋarra yukurra dhuwala gärri ḻoḻuŋura. Walala bumaranydja yukurrana ŋarranha, ga ŋula nhaltjarra yätjkuŋala, bala dhipala nherrara ḻoḻulilinydja, yurru Godkunydja ŋunhinydja dhäruk yakana yukurra gulmarama ŋuriŋiyinydja malaŋuyu romdhu, liŋgu ŋuriŋiyinydja yurru yana birrŋ'maramana dhuwalayi dhäwuny'tja Djesunha. 13Liŋgu bukmak ŋunhi miriŋunydja djäkamirri walala ŋuruku ŋurruŋuwalaŋuwu buŋgawawalaŋuwu wäŋawu ga wiripu-guḻku' yolŋu'-yulŋu, bukmak walala marŋgi ŋarraku, ŋunhi ŋarranha walala galkara dhipala ḻoḻulili, liŋgu ŋarra djämamirri dhuwala nhanŋu Djesu-Christku. 14Yo, ga wiripu-guḻku'yu Garraywalaŋumirriyu walalay ŋunhi ŋäkula ŋarranha dhipalayinydja ḻoḻulilinydja, bala walala ḏälthinana yana gaŋgathinanydja Garraywalana ganydjarryu, ga bitjanna liŋguna walala ŋuli ḻakaramanydja yukurra dhäruktja nhanŋu Godku, barrarimiriwyuna walalay yana.

15-16Yo, dhiyaŋu-wala guḻku'yuna yukurra yolŋuyunydja walalay ḻakarama dhäwuny'tja birrŋ'marama Garraywalaŋuwuynydja. Wiripuŋuyunydja ŋuli yukurra ḻakarama dhäwu', liŋgu walala ḏukṯuk wirrki ŋarraku guŋga'yunarawu; walala marŋgi ŋunhi ŋayi Godthu nherrara ŋarranha dhiyakuyinydja djämawu, märr yurru ŋarra yukurra dharray dhiyakuyi dhäwuwu', ga ḻakarama dhunupa wal'ŋu warraŋulkuma, bala walalanydja ŋuli yukurra ḻakarama dhuwalayi dhäwu' birrŋ'marama, liŋgu walala yukurra märr-ŋamathirri wirrki ŋarraku. Ga wiripu-guḻku'yunydja ŋuli yukurra ḻakarama dhäwu' birrŋ'marama ŋanya Garraynha Djesunhanydja, liŋgu walala yukurra mel-ḏi'yun ŋarranha, bala walala ŋuli ḻakaramana yukurra dhäwu'na ŋurru-ḏakthunmirrina walalaŋgalaynha gali'lili wapmaranhamirri. 17Yo, ḻakaramanydja walala yukurra ŋuriŋiyi walalay Djesu-Christnha warray dhäwuny'tja, yurru ḻakaramanydja walala yukurra dhäwuny'tja ŋunhiyi walalanhawuynha walala yana bathalakunharamirri; yakana walala yukurra yuwalkkuma ḏukṯukthirri garrwarkunharawu Garraywu yäkuwu birrŋ'maranharawu. Walalanydja ŋuli ŋunhi guyaŋirri yanapi ŋarra yurru galŋa-yätjthirri ŋula ŋuriŋiyi ŋunhi ŋarra yurru walalanha ŋäma ŋunhimalayi, ŋunhi walalanydja yukurra ḻakarama dhäwu' yänana-wala yana, ga ŋarranydja yukurra dhiyalami nhina ḻoḻuŋura gärri garrpiṉarana.

18Bala nhaltjanna ŋarranydja yurru? Ŋarra yurru ŋoy-djingaryun ŋuriŋiyi?... bay' nhaltjan? Yaka ŋarranydja yurru ŋoy-djingaryun. Ŋarranydja dhuwala ŋoy-ŋamathirri yukurra wirrki ŋurikiyi, liŋgu guḻku'yuna yolŋuyunydja walalay ŋäma yukurra Garraynhanydja yäku bawala'mirrikurru yana, bäy warray ŋunhi walala yurru wiripu-guḻku'yu yukurra walalaŋgalaynydja djarrpi'yunydja gali'yu ḻakarama, wo ŋamakurru'yu gali'yu, dhunupa'yu ŋunhi. Yo, ŋarranydja yurru nhina yukurra ŋunhina liŋguna galŋa-ŋamathirrina yanana. 19Ga bitjandhiyi ŋarra yurru galŋa-djulŋithirrinydja, liŋgu ŋarra marŋgi ŋunhi ŋarranydja yurru dhayaḻana yana dhawaṯthun dhipuŋuru ḻoḻuŋurunydja.

Yo, nhumanydja ŋuli yukurra bukumirriyama ŋarraku dhipala, ga ŋayinydja Djesu-Christkunydja ŋunhi Walŋamirrinydja Birrimbirr ŋuli yukurra dharray ŋarraku ḻatju'kuma warray, ga dhiyaŋuyina ŋarranhanydja yurru dhawaṯmarama yänana-wala dhipuŋuru ḻoḻuŋurunydja. 20Yurru yaka ŋarra marŋginydja nhaltjan yurru ŋarra dhawaṯthun. Mak ŋarra yurru dhawaṯthun walŋa dhipuŋuruyinydja, mak walala yurru buma ŋarranha murrkay'kuma, yurru ŋarranydja yukurra dhuwala ŋayaŋu-gätjpu'yunna yana dhukarr-nhämana yulŋunydja ŋurikiyi ŋunhi nhaltjan yurru ŋarraku maḻŋ'thun. Yurru dhiyaku waŋganygu ŋarra ḏukṯuktja wirrkinydja wal'ŋu, ŋunhi ŋarranhanydja yakana yurru gatjpaḻ'maramanydja gäma barrariyu ŋula nhäthu, märr ŋarra yurru yakana gora ŋula nhäyunydja; yana ŋarra ḏukṯuk ŋarra yurru dhärrana yukurra wuṉḏaŋarrnha nhanŋuwaynha Garraywuna, barrarimiriwnha nhämiriwnha dhiyaŋu-wala ga bitjan liŋgu yurru. Yo, ŋuriŋiyi ŋunhi ŋarra yurru walŋa nhina yukurra, wo ŋuriŋiyi rakunydhinyarayu ŋarrakalay, ŋunhi ŋarranha walala yurru buma rakunygu, ŋarra ḏukṯuk walala yurru yolŋuyu walalay nhäma ŋarrakalanydja nhanŋu Djesuwu ḻatju' wal'ŋu, bala wokthunna yurru yana nhanŋu Garraywu. 21Yo, ŋunhi ŋarra yukurra dhuwala nhina baḏak dhiyala munatha'ŋuranydja, ŋunhiyinydja Garray-Christ ŋayipi yukurra ŋarrakalanydja nhina, ga ŋunhi ŋarra yurru mukuythirri, ŋunhiyinydja biyapulnha dhika wal'ŋu ŋamakurru'na, liŋgu ŋuliŋurunydja rakunyŋuru ŋarra yurru galkina wal'ŋu biyapulnha nhina yukurra nhanukala Garraywalana. 22Yo, manymak warray ŋunhi ŋarra yurru rakunydhirrinydja, yurru ŋunhi ŋarra yukurra yurru nhina walŋanydja, ŋarranydja yurru yana djäma yukurra mukthun bala Garraywu yana, ŋunhiyinydja ŋarra yurru biyapul wal'ŋu gäma nhanukala. Bala ŋarra yurru nhäna dhika djarr'yundja?... rakunydhirrina ŋarra yurru?... mak ŋarra yurru walŋa nhina? 23Yo, märrma' dhuwalayi maṉḏanha yulŋunydja ḻatju' dhika, yurru nhäna ŋarra yurru djarr'yundja? Yuwalktja ŋarra ḏukṯuk, ŋarra yurru yana marrtjina, gonha'yunna dhuwalanydja rumbal, ga nhina galkina nhanukala Garraywalana ŋunhalana, liŋgu ŋunhi nhinanharawu galkiwunydja ŋamakurru'na wal'ŋu dhikana yana mirithirrina. 24Yo, ŋurikiyi warray ŋarra yuwalktja ḏukṯuk, yurru yaka mak ŋarra yurru dhuwala rakunydhirri dhiyaŋunydja-wala, liŋgu ŋunhi ŋarra yurru nhina yukurra dhiyala bäyma rumbal munatha'ŋura, ŋunhiyinydja bitjan nhumalanhana ŋarra yukurra yurru guŋga'yun bala. 25Liŋgu dhiyakuyi ŋayi Godtja ŋarraku ḏukṯuk, ŋarra yurru mukthun nhina dhiyala nhumalaŋgalana bukmakkala, märr yurru nhumanydja gurarrthirrina bala yukurra, bitjanna liŋgu yurru Garraywalana yana, ga dhiyaŋuyinydja nhumanydja yurru nhina yukurra goŋmirriyirrina dhikana wal'ŋu, ŋunhi nhuma yurru yuwalktja wal'ŋu märr-nherraṉmirri yuwalkkumanydja nhanukala, bitjandja liŋgu yurru.

26Yo, nhumanydja yurru ŋunhi nhämana ŋarranha goŋmirriyirrina, bala wokthunna yurru nhanŋu Djesu-Christku wirrkina dhikana wal'ŋu, ŋunhi ŋarra yurru dhawaṯthun dhipuŋuruyi ḻoḻuŋurunydja, bala nhumalaŋgalanydja roŋiyirri.

Nhiniya waŋgany mala yana, ga yakana barrariya ŋula yolkunydja

27Yo, liŋguna nhuma ŋäkula dhuwalayi dhäwuny'tja Djesu-Christnha, bala nhumanydja yurru nhiniya yukirriya ŋamathaŋa yana wal'ŋu dhika, bitjan yukurra dhiyaŋuyi dhäwu'yu marŋgikuma ḻakarama. Mak ŋarra yurru dhuwala marrtji yulŋunydja nhumalaŋgala, mak ŋarra yurru nhinanydja barrku nhumalaŋgala, yurru nhumanydja yurru nhina yukurra ŋunhilimi liŋgu ŋamakurru'ŋura yana, märr yurru ŋarra ŋämanydja ŋuli nhumalanha, ŋunhi nhumanydja yurru yukurra dhärrana waŋganynha mala yana nhuma, ŋuriŋi waŋganydhuna Garrkuḻukthuna Birrimbirryu. Yo, nhiniyanydja waŋganyŋura walala yana, waŋganydhu ŋayaŋuyu ga djälyu, ga djäma yukirriya wirrki waŋganyŋura, ŋunhilimiyi liŋgu yuwalkŋuŋura dhäwu'ŋura ŋunhi nhuma ŋuli yukurra märr-nherraṉmirri.

28Yaka walala beyaṉiyiyanydja ga galyurranydja ŋuruku walalaŋgu ŋunhi walala yukurra nhina gali'ŋura ŋurikala miriŋuwala Mokuywala. Dhärriya yana mukthurra, barrarimiriwnha, märr yurru balakurruyi nhumalaŋgala ŋuriŋiyi miriŋuyunydja nhämana yurru dharaŋanna ŋunhi ŋayinydja Godthunydja yurru walalanha baḏuwaḏuyunna miriŋunhanydja, ga nhämayi walala yurru dharaŋan ŋunhi Godthunydja ŋuli yukurra nhumalanha gäma galkikuma, walŋakumanydja dhika yana, liŋgu nhumanydja yurru walalanha djuḻkmarama Godkalanydja ŋuriŋiyi ganydjarryu.

29Yo, nhumanydja dhuwala nhanŋuway Garraywuna yana walala, liŋgu djarr'yurrunanydja ŋayi nhumalanha Godthu, märr yurru nhuma märr-nherraṉmirrina nhanukalanydja, ga bitjandhiyi yana liŋgu nhuma yurru burakirrinydja yukurra ŋayaŋu-yätjthirrinydja nhanŋunydja yäkuwu. 30Nhuma nhäŋala muka ŋarranhanydja ŋunhi ŋarra yukurrana burakina ŋayaŋu-yätjkunharamirriyu romdhu ŋäthilinydja, ga dhiyaŋu-wala nhuma yukurra ŋäma ŋarranha dhipala ḻoḻulilinydja, ga nhumanydja yukurra bitjandhi liŋgu gombunharamirriyi ŋunhiyi liŋgu miriŋunydja.