gnnNTOTPO

Jeremiah 32

Djiramayawuŋu bukumirriyanhara

32:16-44 (Jeremiah's prayer for God's help)

16Ga dhäŋuru ŋuliŋurunydja ŋarra bukumirriyaŋalana yukurrana, ŋarra waŋananydja yukurrana bitjarra, 17“Garray God, nhenydja ŋunhiyi djäma ŋamaŋamayurruna djiwarr' ga dhuwala munatha' ŋuriŋi liŋgu nhokalay bathalayu walŋu mirithirri ganydjarryu; yakana ŋula ḏäl nhokalaynydja djämawu. 18Nhe ŋuli goŋmirriyamanydja ŋunhinha walalanha walŋu dhuwurr-ŋamakuli'mirrinha ŋula nhämunha'nha yolŋu'-yulŋunha miṯtjinha, ga ŋunhi ŋuli yolŋuyu bäpa'mirriŋuyu djäma ŋula nhä yätj, ga walalanydja ŋunhiyi djamarrkuḻiny'tja nhanŋu ŋuli ŋayaŋu-yätjthirriyi, liŋgu ŋuriŋi bäpa'mirriŋuwala yätjthu. Nhenydja ŋunhi be walŋu bathala ganydjarr-ḏumurru Waŋarr, Ŋurru-warryunarayŋu Ŋurruŋu. 19Nhokuŋu guyaŋinyarawuynydja be walŋu yana waḻatj, ḻiya-djambatj dhika walŋu, ga nhämanydja nhe ŋuli nhaltjan yukurra yolŋuyu walalay djäma ŋamathama ga yätjkuma, bala nhe ŋuli buku-ruŋinyamaramanydja balanyara liŋgu ŋupanayŋuyi yana yolŋu'-yulŋuwu walalaŋgalaŋuwuy djämawuynydja ŋamakurru' wo yätj.

20“Ŋäthilinydja benydja baman'tja ŋunhala Yetjiptja nhe djäma mirithirri ṉirryunaramirri rom yana ganydjarr-ḏumurru walŋu, ga mukthun yana nhe ŋuli djäma ŋunhiyi ṉirryunaramirrinydja rom, märr yurru birrka'mirriŋura yolŋu'-yulŋuyunydja nhäma dharaŋanna, ŋunhi nhenydja biyapulnha walŋu Waŋarr. 21Ga ŋuriŋi bili ganydjarr-ḏumurryu walŋu nhe ŋunhi dhawaṯmaraŋala ŋanapurruŋgu märi'munhanydja walalanha beŋuru Yetjipŋurunydja nhokalay nhe dhungalyu. Walalanydja ŋunhi miriŋunydja walala beyaṉiyinana mirithinana, yurru nhenydja ŋunhi dhawaṯmaraŋala gäŋala ŋanapurruŋgunydja märi'munha dhipala ŋamakurru'lilina walŋu wäŋalili. 22Yo, nhinananydja walala yukurrana dhiyala manymakŋurana wäŋaŋura, ŋatha-guḻku'mirriŋurana dhikana, ŋunhi nhepi ŋurikiyinydja wetj walalaŋgu, 23yurru walalanydja yaka warray dhäruk märraŋala nhuna, yaka walala yukurrana marrtjina nhokalanydja dhukarrkurru ga romgurru. Ga dhiyakuyina märrwu ŋunhi marinydja marrtjina lili ŋanapurruŋgala. 24-25Nhe ḻakaraŋala ŋanapurruŋgalaŋuwala märi'muwalanydja walalaŋgala, raypirri'yurruna bitjarra walalanha, ŋunhi walala yurru marrya'yirri ga rirrikthunmirri, ga ŋula nhäna yurru yätjnha maḻŋ'thun walalaŋgu, ŋuli walala yurru yakanydja yukurra marrtji galki nhokala. Ga yuwalkthi ŋunhi maḻŋ'thurrunanydja bitjarrayi, ga dhuwalana gay dhiyaŋunydja-wala Bapilunbuynydja miriŋu ḻiw'maramana yukurra liŋguna dhiyalaŋumina ŋanapurruŋgalana wäŋaŋuranydja. Ga dhuwalana ŋanapurru marrya'yirrina yukurra ga rirrikthunmirrina ga barrarirrina, liŋgu ŋanapurru ŋuyulkthina dhärukku nhuŋu.”

26-27Ga ŋayinydja waŋana Garraynydja bitjarra, “Ŋarranydja dhuwala Garray, Waŋarr ŋarra bukmakku yolŋuwu. Yaka wuṉḏaŋarr ŋarrakunydja ŋula nhäku djämawu. 28Yuwalk yana märr-yuwalk ŋarra yurru wekama dhuwalanydja wäŋa ŋunhana goŋlili miriŋuwalana. 29Miriŋuyunydja yurru ḻiw'maramana dhuwala wäŋanha, ga märramana yurru, bala dhuŋgur'yunna gurthayuna baḏuwaḏuyun warrpam'thunna yurru, rrambaŋikumana wäŋa ŋunhi nhuma ŋuli mundhurr-wekama ŋurikiyi waŋarrwu. Dhiyaŋuyinydja ŋarranha yukurra ŋuli ŋaramurrkumana yana mirithirrina walŋu. 30Beŋuru liŋgu ŋurruŋuru walŋu nhuma yolŋu'-yulŋuyu Yitjuralpuyŋuyunydja yukurranha ŋuli djäma yätj; bitjana liŋgu nhuma ŋuli ŋayaŋu-yätjkunhanydja ŋarranha, bala ŋarranydja ŋuli ŋaramurryinyana nhumalaŋgu. 31-32Ga dhiyakuyinayi märrwu ŋunhi dhuwalanydja wäŋa yurru baḏuwaḏuyunna yanana, liŋgu bitjarra liŋgu nhuma yukurrana djäma yätjkuŋala, nhumalaŋgala ŋurru'-ŋurruŋuyu ga ḏalkarra'mirriyu ga dhäwu'-gänharamirriyu, bukmakthu nhuma yana, beŋuru liŋgu ŋurruŋuru ga dhiyaŋu-wala wapthun. 33ḏiltjina nhuma wekaŋala ŋarrakunydja, ga yakana malthurruna ŋarraku. Bitjanna liŋgu ŋarra ŋuli raypirri'yunanydja nhumalanha marrtjinya, ḻakaranha marrtjinya nhumalaŋgu nhinanharawu ŋamathanharawu walŋu, ga nhumanydja yaka warray mäkiri'-witjurruna ŋarraku. 34Dhuwaliyinydja Buṉbu buku-ŋal'yunarawu ŋarrakuway galŋu yana, yurru nhumanydja gäŋala, bala nherrara dhuyu warray malanha maḏayin' malanha ŋula nhä ŋarrakalanydja ŋunha Buṉbulili. Ŋarranydja nyinyaŋdhun warray ŋuli, buku-nherraṉmirri warray ŋuli ŋurikiyinydja nhäku malaŋuwu, yurru nhumanydja dhuwala wäŋanha ŋarraku dhukun'mirriyaŋala ŋuriŋiyi warray maḏayin'thu warray, dhika nhäyu warray nhumalaŋgalay. 35Wiripunydja nhuma ŋuli rewal'yuna baṉarra'kunha wäŋa dhuyukunharawuna, bala buku-ŋal'yuna ŋuriki waŋarrwuna Bälwuna ŋunhiliyinydja, ga wiripunydja nhuma ŋuli wekama nhumalaŋguwaynha yumurrku'nha, bathana gurthalilina walalanha ŋuli ŋuriki Molikkuna buku-ŋal'yunarawu waŋarrwuna. Ŋunhiyinydjayi mirithirrina galŋu yätjnha yanana. Ŋarranydja ŋunhi yaka ḻakaraŋala yolŋu'-yulŋuwala ŋunhiyinydjayi rom djämawu bitjanarawuyinydja,” bitjarra ŋayi Garray waŋananydja.

36Yo, ga biyapul ŋayi Garray ŋarrakala waŋana bitjarra, “Djiramaya, liŋguwuynha dhuwala yolŋu'-yulŋunydja marrya'yinyarana nhinanhara ga rirrikthunarana; märr-yuwalk yana dhuwalanydja yurru wäŋa ŋurikalana goŋŋura miriŋuwala Bapilundja. 37Yo, ŋuriŋiyi ŋarrakala ŋaramurryunydja ŋarra barrkuwatjkuŋalana yolŋu'-yulŋunhanydja bena-wala wäŋalili barrkumalana, yurru yalalanydja ŋarra yurru walalanha gäma roŋinyamaramana liliyi dhipalayi wäŋalili, bala walala yurru nhina yukurra dhiyalanydja marimiriwŋurana, nhämiriwŋurana yanana. 38Bala walala yurru ŋunhi ŋarrakuwaynha galŋu yana yolŋunydja walala, ga ŋarrapinydja walalaŋgu yurru Godnha Waŋarrnha. 39Walala yurru ŋayaŋunydja ŋunhiyi yuṯayirrina walŋu wiripuŋuyirrina, märr yurru walala yukurra djälthirri ŋurikina bili waŋganyguna, ga ŋarrakuwaynha waŋganyguna walala yurru yukurra märr-ŋal'yundja. Bala yurru walala nhinanydja yukurra goŋmirriyirrina walŋu yana, walalawuy ga walalaŋgu yumurrku' ga gutharra'mirriŋu walala, nhinanydja walala yurru yukurra ŋarrakalaynha nyeyaḻŋura. 40Ŋarranydja yurru nherraṉ dhawu'na walalaŋgala ŋarrakuway ŋarra, ga ŋunhiyi dhawuny'tja yurru dhärra yukurra bitjanna liŋguna; bitjanna liŋguna ŋarra yurru gämanydja walalanha ḻatju'kumana yanana gurrum'thunna, ga ŋunha ŋayaŋunydja walala yurru rom-wiyaṉiyirrina yukurra ŋarraku, ga yakana biyapulnydja walala yurru ganan ŋarranha.

41“Yo, ŋarranydja ŋuli galŋa-djulŋithirri walŋu dhika, ŋunhi ŋarra ŋuli goŋmirriyamanydja walalanha, bala ŋarra yurru walalanha ḻämu-nherraṉdja biyapulnha walŋu wuṉḏaŋarrkumana dhipalayi wäŋalili, bala walala yurru ŋuthandja ŋarrakalaynha yana romgurru. 42Ŋäthilinydja ŋunhinydja walala yukurrana djäma rom-yätj walŋu yana, ga dhiyakuyina märrwu dhuwala ŋunhi marinydja bunana walalaŋgu, ga ŋunhi walala yurru ganandja ŋunhiyi yätj walalaŋguway, ga ŋarranydja yurru wekama manymak galŋu yana walalaŋgu, ŋunhiyi nhä malanha ŋunhi ŋarra dhawu'-nherrara dhuwurr-ŋamakurru'mirriwu ŋuriki. 43-44Walala yurru nhinanydja yukurra dhiyala wäŋaŋura manymakkuma walŋu yana dhika, marimiriw, ŋamathamana walŋu yana, liŋgu biyapul ŋarra yurru ŋunhi goŋmirriyama walalanha.” Ga bitjarrayi ŋarra ŋunhi Garrayyu dhawu'-nherraranydja walalaŋgu.