gnnNTOTPO

PSALMS 119

Garraywu ḻatju' rom

119:9-20, 89, 97-105

9Nhaltjurru dhika ŋuli yuṯanydja ḏarramu nhini yukirri ḏarrtjalk ŋula nhämiriw?

Ŋuli ŋayi yurru Godku romgu malthundja marrtji bala,

ŋayi yurru nhina yukurra ŋamathamana dhika walŋu.

10Garray, ŋarra yukurra ḏukṯukthirri nhuŋu malthunarawu,

nhuŋuwaynha waŋganyguna ŋarra yukurra warrya'yun;

Mulkiya ŋarranha galkikuŋa walŋu,

märr ŋarra yakana yurru yarrkthun nhokala dhärukŋuru.

11Liŋguna ŋarra nhuŋuwaynha yana dhäruk ruwamŋu nherraranydja ŋarrakalay ŋayaŋulilinydja,

märr ŋarra yurru yakana rom-waḏatjtjun nhunanydja.

12Ŋarra yukurra wokthunna nhuŋu, Garray,

marŋgikuŋa ŋarranha nhokalayŋuwu romgu.

13Dhiyaŋu ŋarrakala dhärukthu ŋarra ŋuli waŋa marrtji bala,

ḻakaramana ŋuli yukurra nhuŋu romnha malanha.

14Yaka ŋarranydja rrupiyawu ḏukṯuk ŋal'yunmaranharawu,

liŋgu nhokalana dhiyaŋu romdhu ŋarranydja yukurra märr-ḏaw'yun,

galŋa-ŋamathinyamarama ŋuli yukurra.

15Ŋarra yurru bitjanna liŋguna guyaŋirri yukurra nhuŋuwaynha dhäruk,

muḻkurr-nherraṉmirri nhokiyingalana romlili.

16Galŋa-ḻayyunaramirrina rom ŋarra ŋuli maḻŋ'marama nhuŋunydja,

yakana yurru ŋarra meṉgumanydja nhuŋu dhäruktja.

17Garray, ŋarranydja dhuwala djämamirri yolŋu nhuŋu,

djäka yukirriya ŋarraku,

märr ŋarra yurru nhina yukurra, ŋamathama dhika wal'u,

ga malthun yurru nhuŋuway dhärukku.

18ḻapmaraŋa ŋarranha maŋutji,

märr ŋarra yurru nhäma dharaŋan dhäruktja nhuŋu,

ga maḻŋ'marama yurru ḻatju'mirrina dhika, yuwalkŋuna walŋu rom.

19Ŋarranydja dhuwala märr-gurriri nhina yurru dhiyala munathaŋuranydja,

yaka djuḻuḻ'maraŋa ŋarrakala romdja nhuŋuway!

20Ḏukṯukthirri ŋarra yukurra dhuwala wirrkina dhika,

bitjanna liŋguna ŋarra yukurra ŋoy-ŋaḏupthun nhokalaŋuwu romgunydja marŋgithinyarawu.

89Garray, nhuŋunydja dhäruk djingaryunna yukurra yurru gupaḏalŋuna,

bitjanna liŋguna dhärra yukurra nininyŋuna ŋunha djiwarrŋurana.

97Ŋarra yukurra wirrkina märr-ŋamathirri nhokalaŋuwunydja romgu,

guyaŋirrinydja ŋarra ŋuli bitjan liŋgu walu-ŋupanna.

98Dhiyaŋu nhokala dhärukthu ŋarranha ŋuli wekama dhunupana guyaŋinyara,

bala ŋarra ŋuli djuḻkmaramana ŋayan'mirrinha walalanha dhiyaŋu dhärukthunydja.

99Ŋarranydja wirrki warray marŋgi nhokalaŋuwu romgu,

djuḻkmaramana yukurra ŋunhanydja walalanha yolŋu'-yulŋunha, ŋunhi walala ŋarranha marŋgikuŋala,

liŋgu bitjan liŋgu ŋarra ŋuli yukurra märryu-ŋupan nhaltjan nhe ŋuli ŋarraku ḻakarama.

100Wirrki warray ŋarra marŋgi nhokalaŋuwu romgunydja,

djuḻkmarama yukurra ŋunha ḏilkurruwurrunhanydja yolŋu'-yulŋunha,

liŋgu ŋarra yukurra ŋayathama baṯ bitjanna nhuŋu rom.

101Yaka ŋarra yukurra yätjkurru dhukarrkurru marrtji,

ḻäy-yarryun ŋarra yukurra ŋuruku dhukarrwu,

liŋgu wirrki ŋarra ḏukṯuk nhokalaŋuwu dhärukku malthunarawu.

102Nhe muka ŋarranhanydja marŋgikuŋala;

yakana ŋarranydja yurru ŋapa-wilyun nhokalanydja romŋuru, ganan yurru.

103Garray, nhuŋunydja dhäruk ḻatju'na dhikana ŋanya,

dhäkay-djulŋina bitjan guku.

104Nhokalana dhärukthu ŋarranha ŋuli yukurra marŋgikumanydja,

bala ŋarranydja ŋuli marŋgithirri warray nhokalaŋuwu yuwalkŋuwuna walŋu dhukarrwu,

ga dhiyakuyina märrwu ŋarra yukurra yarryunna ŋuriki bothinyarayŋuwunydja romgu.

105Garray, dhäruktja dhuwala nhuŋu bitjan baḏayala'na;

Ŋarra ŋuli marrtji balakurruyi baḏayala'kurru, ga yakana ŋula galkirrinydja,

liŋgu nhokala ŋuriŋi dhärukthu djarraṯawun'kuma ŋuli yukurra ŋarraku dhukarr,

milkuma ŋuli dhukarr marrtjinyarawu bala.