gnnNTOTPO

Exodus 6

1Yurru Garraynydja waŋana nhanukala dhärukkurru bitjarra, “Dhiyaŋunydja-wala nhe yurru nhäma ŋarranha djämawuynha, ŋunhi nhaltjan ŋarra yurru ŋanya buŋgawanha. Ŋayinydja Yurru djutjtjutjuyunna nhumalanha. Yo, ḏälyuna dhärukthu ŋayi yurru nhumalanha gukumanydja dhipuŋurunydja wäŋaŋuru.”

Godthu ŋuli djämana yana nhanŋuwaynydja dhawu'

6:2-9 (God keeps his covenant with his people)

2Bala ŋayi Garraynydja waŋana Mawtjitjkala bitjarrana, “ŋarranydja dhuwala ŋunhiyi muka Garray walŋu waŋarr, 3ŋunhi ŋarra ŋäthili maḻŋ'maranhamina Yipurayimgala ga Yitjakkala ga Djaykupkala, ŋunhi yäkunydja ŋarra dhuwala Ŋutu' ḏälnha. 4Bala ŋarra dhawu'na nherrara walalaŋgu, ŋunhi wäŋanydja ŋunhiyi Gaynandja Yurru walalaŋguway yana walŋu Yipurayimgalaŋuwu mala-wunharawuywu, yurru nhinananydja walala yukurrana ŋunhili wäŋaŋuranydja mulkuru yolŋunydja walala yana ŋulinyaramirriyunydjayi. 5Yo, ŋäkulana liŋguna ŋarra ŋarrakuwaynydja ŋarra yolŋunha walalanha miṯtjinha Yitjuralnhanydja, walala yukurra ŋorr'-ŋurryunmirri ŋonuŋdhu romdhu, liŋgu walala yukurra ŋunhi nhina garrpiṉara Yetjippuyŋuwuŋu miṯtjiwuŋu. Bala ŋarra buku-ḻayyurrunana ŋarrakalaŋuwu ŋarra ŋuriki dhawu'wunydja, ga yuwalknha yana ŋarra yurru djämanydja ŋunhiyi ŋunhi ŋarra dhawu'-nherrara walalanha ŋäthili. 6Gatjuy marrtjiya yana, ga ḻakaraŋa ŋurupa yolŋu'-yulŋuwa Yitjuralpuyŋuwa, biyaka nhe yurru waŋiyanydja gam', ‘Ŋarranydja dhuwala Garray God. Ŋarra yurru nhumalanha märrama dhawaṯmaramana dhipuŋuru ŋonuŋŋurunydja romŋuru, Yetjipŋurunydja yurru, ga bitjandhi liŋgu dhipuŋuru ḏirrwi'-ḏirrwiŋurunydja walalaŋgala. Ŋarra yurru nhumalaŋgu waṉa-djarryunna, bala dhawaṯmaramana djaw'yunna goŋŋurunydja walalaŋgala ŋarrakalaynha walŋu yana ganydjarryu. Ŋarrapina yana nhumalanha Yurru walŋakumanydja. 7Yo, ŋarranydja yurru dhuwala goŋdhu-märramana nhumalanhanydja; nhumanydja yurru ŋarrakuwaynha yana yolŋu walala, ga ŋarranydja yurru nhumalaŋgu Waŋarrnha. Nhuma yurru marŋgithirri ŋarrakuna, ŋunhi ŋarra dhuwala Garraynydja, nhumalaŋgunydja Waŋarr, ŋunhi muka bili waŋgany ŋunhi ŋarra nhumalanha ḻaw'maraŋala, bala dhawaṯmaraŋalana Yetjippuyŋuwalanydja, ŋonuŋŋurunydja romŋuru. 8Ŋarra yurru nhumalanha dhawaṯmaramana dhipuŋurunydja, bala gäma nhumalanha ŋunhamalayi bili Wäŋalili Gaynanliliyi ŋunhi ŋarra dhawu'-nherrara nhumalaŋgalaŋuwu märi'muwu walalaŋgu Yipurayimgu, ga Yitjakku, ga Djaykupku. Wäŋanydja ŋarra yurru ŋunhayi wekama nhumalaŋguna, ga yuwalk yana wäŋanydja ŋunhiyi yurru djingaryun yukurra nhumalaŋguwaynha yana yirralkanydja. Ŋarranydja dhuwala Garray God nhumalaŋgu.’ ” Bitjarra ŋayi Garray waŋananydja.

9Bala ŋayi Mawtjitjthunydja ḻuŋ'maraŋalana bukmaknhana yolŋu'-yulŋunha, Yitjuralpuyŋunha yana bäpurru'nha, bala ḻakaraŋala dhuwalana malanha dhäruk walalaŋgu, ŋunhi ŋayi Garray dhäruk-nherraṉmina. Yurru walala yolŋu'-yulŋunydja yakana ŋayaŋu-yuwalkthina Mawtjitjkala dhärukthu, bili walalaŋgu ŋayaŋunydja djawaryurrunana ŋuriŋi ḏirrwiḏirrwi-mulkanharayunydja yukurranharayu ga baymatthunarayuna.

Ga biyapul maṉḏa marrtjina balayi buŋgawawala

6:10-13 and 7:6-13 (Moses and Aaron went to Pharaoh again)

10-11Ga biyapul Garray waŋana Mawtjitjkala, djuy'yurruna ŋanya Yetjippuyŋuwala buŋgawawala bitjarra, “Gatjuy marrtjiya, bala buŋgawawala gärriya, ga ḻakaraŋa nhanbala, ŋayi yurru djuy'yun dhuwala yolŋunha walalanha Yitjuralpuyŋunhanydja, yarrkmaramana dhipuŋurunydja nhanukalaynydja wäŋaŋuru.” 12Ga ŋayi Mawtjitjtja waŋana Garraywala, buku-wakmaraŋala bitjarra, “Ŋunha Yitjuralpuyŋunydja yolŋu'-yulŋu ŋarraku yakana yukurrana mäkiri'-witjurruna, ga nhaltjanna ŋayinydja yurru mäkiri'-witjun ŋarraku ŋunha buŋgawanydja?... liŋgu ŋarranydja dhuwala ŋäṉarr-bundhuwulu'na yolŋu.”

13Bala Garraynydja waŋanana Mawtjitjkala ga Yärungala bitjarrana, “Gatjuy marrtjiya maṉḏa, ga ḻakaraŋa yolŋu'-yulŋuwa ga buŋgawawa, ŋunhi ŋarrapi yana nhumalanhanydja djarr'yurruna nherrara dhiyakuyinydja djämawu. Märr-yuwalknha nhuma yurru dhawaṯmaramana Yitjuralnhanydja dhipuŋuru wäŋaŋuru Yetjipŋurunydja.”