gnnNTOTPO

Ezekiel 1

Djekilyu mel-yurthina nhäŋala djiwarrny'tja ḻapthunarana

1:1-28 (Ezekiel's vision of God's throne)

1-3Ŋarranydja dhuwala Djekil yäku, gäthu'mirriŋu Butjiwu; ḏalkarra'mirri ŋarra dhuwala yolŋunydja, ga nhinananydja ŋarra yukurrana wäŋaŋuranydja Bapilun wiripu-guḻku'wala yolŋu'-yulŋuwala Yitjuralpuyŋuwala miṯtjiwala, ŋurikala walalaŋgala ŋunhi ŋanapurrunha yukurrana djaw'-djawyurruna ŋanapurruŋgalayŋuŋuru wäŋaŋuru ŋuriŋi miriŋuyu walalay. Waŋganymirrinydja ŋarra nhäŋala djiwarr' ḻapthunara, bala ŋarra nhäŋalana mel-yurthinana, bala ŋayipina Garraynha maḻŋ'maranhamina ŋanyapinyay ŋayi ŋarrakala, bala ŋarra dhäkay-ŋänharamina ŋarranhawuy ŋarra nhanukala ganydjarryu.

4Yo, nhäŋalanydja ŋarra yukurrana ŋunhi buku-ruŋalanydja, bala ŋarra nhäŋala wakarrnha walŋu, biyapulnha bathalana, ŋayi yukurrana marrtjinanydja beŋuru dhimurruŋuru lili. Yo, watayunydja ŋuriŋinydja yukurrana bo'yurruna bathalanhana ŋanyana dhika waŋupini'nha, yurru waŋupininy'tja ŋunhiyi djarraṯawun'mirri warray, liŋgu ŋunhilimi waŋupiniŋura djinawany'tja gurthana, ga bitjarrana liŋgu dhawa'-yawaṯthurrunana yukurrana bitjarrana bitjan ŋuli ṉilŋṉilŋ' gurtha ŋuliŋuruyi waŋupiniŋurunydja, milŋ'thu-milŋ'thunna yukurra. Ga ŋunhiwala gurthalilinydja ŋarra nhäŋala ŋula nhä, balanyara biyaku ŋuli djaḻka'-djaḻkarryunarana ŋula nhäna. 5Ga biyapul ŋarra nhäŋala ŋunhiwalayi waŋupini'lili ḏämbumiriwnha malanha walŋamirrinhanydja, ga rumbalnydja ŋunhi walala bitjan yolŋuthinyara, 6ga waŋga'-waŋgany walala ŋunhi ḏämbumiriwyi yana bukunydja, ga ḏämbumiriwyi yana binbarrnydja malanha. 7Yo, yaṯanydja walalaŋgu dhunupa yana walŋu, ga djalkirinydja ŋunhanydja bitjan buliki'yinyarana, yurru biyapul warray dhika milŋ'-milŋdhunarana ŋanyana, 8ga ŋoylilinydja ŋunhiwalayi binbarrlili malanyŋulili ŋarra nhäma goŋnha malanha, balanyara biyaku ŋuli yolŋu goŋ. 9Yo, binbarrnydja ŋunhiyi ḏämbumiriw walŋamirri be nhäna malanha yukurrana bärr'yurruna, yurru bitjarra walala yukurrana ŋunhiyi mulkanhamina ŋuriŋiyi yulŋunydja, ga buṯthurrunanydja walala yukurrana ŋunhi dhunupa, bitjarra bitjan ŋuli waŋgany rumbal buṯthun yukurra dhunupa yana bitjarrayi, bilyunamiriw nhämiriw.

10Yo, waŋga'-waŋganygu ŋurikiyi ḏämbumiriwwu walalaŋgu walŋamirriwu ḏämbumiriw yana bukunydja malanha; waŋganydja ŋunhi gumurrŋuranydja balanyara bitjan yolŋu buku, ga galiŋura dhunupaŋuŋuranydja buku balanyara biyaku ŋuli läyin, ga djarrpuḏayŋuŋuranydja galiŋura buku balanyara biyaku ŋuli buliki, ga ŋunha bala ḏiltjiŋuranydja balanyara buku biyaku ŋuli ḏamalana. 11Yo, buṯthurrunanydja walala yukurrana ŋunhiyi malanha märrma'yu binbarryunydja, yurru binbarr-ḻärr'yurruna walala ŋunhi yukurrana yulŋunydja, ga mulkanhaminya walala ŋuli djinmirŋuyunydja binbarryu yana malanha, ga ŋuriŋi wiripuŋuyunydja binbarryu märrma'-marrmayunydja walala ŋuli ŋäkirrmaranhaminya rumbal walalanhawuy walala. 12Ga bitjanana liŋgu walala ŋuli marrtjinyanydja waŋganydhunydja bukuyu dhunupana-wala yana, wanhamala walala ŋuli marrtjinya; yaka walala ŋuli bil'-bilyunanydja, ŋunhi walala ŋuli marrtjinya gali'lili ga gali'lili, ŋula wanhamala.

13Ga ŋunhiwalayi ṉapuŋga'lilinydja ŋurikalayi walalaŋgala ḏämbumiriwwala, ŋarra nhäŋala balanyara bitjan dhäŋa'mirri gurtha ŋäṉarr, yurru bitjarra liŋgu yukurrana ŋunhiyi giṯthu'-giṯthurruna yulŋunydja ŋunhili ṉapuŋgany'tja. Yo, gurthanydja ŋunhi ŋäṉarrnydja yukurrana wirrkina ŋaḻapthurruna dhika, ga ŋuliŋuruyi bitjarrana liŋguna yukurrana milŋ'thu-milŋ'thurruna bitjan ṉilŋṉilŋ' gurtha ŋunhi. 14Ga ḏämbumiriw ŋunhiyi walŋamirri yukurrana marrtjina waŋganygurru yana, bitjarra bitjan waŋgany yana rumbal malthunmina yukurrana bala ga lili, yurru giṯthurrunanydja walala yukurrana ganydjarryu walŋu yana, bitjarra bitjan ŋuli milŋ'thu-milŋ'thunara ŋunhi.

15Yo, nhäŋalanydja ŋarra yukurrana mel-yurthinanydja ŋunhiyinydjayi ḏämbumiriwnha walŋamirrinhanydja, bala ŋarra nhäŋalanydja balanyarana bitjan djalkiri mutika'wuy ḏämbumiriwyi yana, galiŋura waŋga'-waŋganygala yana ŋurikalayi ḏämbumiriwwalanydja. 16-17Yo, ŋunhiyi ḏämbumiriw djalkiri, balanyarayi liŋgu ŋupanayŋu yana, yurru dhapirrkmirri dhika ŋanya, djaḻka'-djaḻkarryunara walŋu, balanyara bitjan mel-wiḏi'mirri ŋunhi guṉḏa. Ga ŋunhilimiyi liŋgu djinawany'tja galŋu, ga wiripu ḻuku ŋunhilimiyi, märr yurru ŋayi ŋunhiyi ḻukunydja yukurra ḏämbumiriwnydja marrtji'-marrtji ŋunhi bala ŋurruŋu, ga lili dhuḏithu, ga gali'yu, bitjan yana liŋgu bilyunamiriwnha nhämiriwnha. 18Ga ŋunhilimiyi malanyŋuŋura djalkiriŋuranydja maŋutjimirri malanha warrpam' yana, ḻiw'marama yana ŋunhi djalkirinha. 19Ga ŋunhi walala ŋuli ŋunhiyi walŋamirri ḏämbumiriw marrtji bala bitjan, ga ŋayinydja ŋuli ŋunhiyinydja djalkirinydja yukurra malthunna, bala ŋurruŋu ŋuli ŋayinydja marrtji yukurra; ga ŋunhi walala ŋuli marrtji walŋamirri bala garrwarlili, ga walalanydja yurru ŋunhi djalkirinydja mala ga malthun marrtji bala, garrwarlili yana. 20-21Yo, ŋunhi walala yurru ŋunhiyi walŋamirri walala marrtji birrka'mirrilili, walalanydja yurru ŋunhiyinydja mala djalkirinydja ga malthundhi marrtji bala yana, liŋgu walala ŋuli giṯthundja marrtji ŋuriŋi bili waŋganydhu yana walŋayu birrimbirryunydja.

22Ga ŋunhanydja garrwarnydja walŋu ŋurikalayi walalaŋgala walŋamirriwalanydja gäraktja bena dhikana milŋ'-milŋdhunarana ŋanyana, dhapirrknha, bena garaŋanydja ya'. 23-24Ga ŋunhi walala ŋunhiyi walŋamirri ḏämbumiriw buṯthurrunanydja marrtjina, ŋarranydja ŋäkulana rirrakaynydja walalanha binbarrnydja, bena dhikana ŋanyana rirrakay, bathalana walŋu bitjan ŋarkula yukurrana ŋoy-ḻaw'yurruna ḏowu, balanyarana biyaku ŋuli miriŋu miṯtji-maypa marrtji yukirri lili, ŋunhinydjayi bitjan rirrakaynydja ŋayipina Godnha. 25Ga ŋunhi walala ḏaḏawyurruna buṯthunaraŋurunydja, bala walala ŋunhi binbarrnydja dhoṯkunhaminana, yurru mukthun yana ŋarra ŋäma yukurra rirrakaynydja, marrtji yukurra lili beŋuru djiwarrŋuru. 26Ga gärakŋuranydja benydja-wala walŋu ŋarra nhäŋala nhinanharamirri, ŋanya dhika walŋu dhapirrk, ga ŋunhiliyinydjayi ŋula yol yukurra nhina, ga rumbalnydja ŋayi bitjan yolŋu yukirri nhini, 27yurru djaḻkarr'yun ŋayi yukurra bena dhikana, biyaku ŋuli gurtha ŋatŋatthurru yukirri rumbalŋuranydja nhanukala, ŋulaŋuruyi gandarrŋuru ga ŋunhana-wala ga muḻkurrlili wapthun, ga gandarrŋurunydja ga bala bitjan, ga ŋunhana-wala djalkirilili wapthun; ga balanyarayina ŋayi yulŋunydja, bitjan gurtha yukirri ŋatŋatthurru. 28Ga galiŋuranydja ḻiw'marama djarraṯawun'nha dhika ŋanyana, biyapul'nha walŋu miny'tji-maypa bitjan djäri.

Yo, ŋarra nhäŋalana ŋunhi nhanŋu ḻatjuny'tja dhikanydja Garraywu, bala ŋarra galkinana, munatha'lilina bukunydja ŋunhana.