gnnNTOTPO

PSALMS 24

Biyapul walŋu buŋgawa ŋurruŋu ŋayi

24:1-10 (The Great King)

1Dhuwalanydja munathany'tja wäŋa nhanŋuway yana ḻiw'marama Garraywu,

ga bukmak yolŋu walala nhina marrtji buku-ḻiw'marama warrpam' yana dhulŋuŋu nhanŋuway Garraywu.

2Ŋayipi djäma warrpam'thurruna dhuwala munatha', ga ŋunha gapu moṉuk ga maya'-mayaŋ,

bukmak dhuwalayi yulŋunydja nhanukuŋuway yana djämawuynydja warrpam'.

3Yol yurru ŋayi dhika marrtji ŋunha bukulilinydja dhuwaṯthun Garraywalanydja wäŋalili?

Yol ŋayi rom-ŋamakurruny'tja walŋu yolŋu?...

ŋayi yurru marrtji, ga gärri ŋunhiwalayi nhanukala dharrpallilinydja wäŋalili?

4Balanyara dhuwala yolŋunydja yurru marrtji gulŋiyirri gam',

ŋunhi ŋayi ŋuli djäma dhunupa yana ŋamakurru' walŋu,

ga guyaŋirri ŋayi ŋuli ḻatju'kuma, ḏarrtjalkkuma dhika;

Ŋunhiyinydjayi yolŋu rom-dhunupanydja, yaka ŋayi ŋuli buku-ŋal'yun ŋula waŋarrwu wiripuŋuwunydja,

ga yaka ŋayi ŋuli dhawu'-nherraṉ, yana mayali'-wilkthundja ŋuriŋiyi.

5Yuwalk yana Garrayyunydja yurru ŋunhiyinydja yolŋunha goŋmirriyamana dhika walŋu,

ga walŋakumana ŋanya yurru.

6Yo, balanyarayina walalana yurru marrtji galkithirrinydja galŋu Garraywala,

bala gulŋiyirrina ŋunhiwalayi dharrpallilinydja Godkala Buṉbulili.

7Way, ḻapmaraŋana dhuwaliyi ḻoḻunydja dhurrwara,

märr yurru ŋayi ŋunhi djeŋarrany'tja buŋgawa marrtjina ŋuliwitjandhiyi gulŋiyirrina.

8Yol ŋayi ŋunhi yolŋunydja ḻatjuny'tja dhikanydja buŋgawa?... Yol?

Garray ŋunhiyinydjayi ŋayinydja,

wuṉḏaŋarr ŋayi dhika walŋu, ganydjarr-ḏumurru;

Bitjan liŋgu ŋayi ŋuli djuḻkmarama yukurra galkinyamarama nhanŋuway ŋunhi miriŋunhanydja.

9ḻapmaraŋana dhurrwaranydja walŋu biyakana dhuwali wäŋanydja ḻoḻunydja,

bala ŋayinydja yurru ŋunhiyinydja ḻatjuny'tja dhikanydja buŋgawa gärrina lili gulŋiyirrina.

10Yol ŋayi ŋunhi ḻatjuny'tja dhika buŋgawa?

Garray muka ŋunhi ŋayipi,

ŋunhi ŋayi djuḻkmaraŋalana bumara dhawar'maraŋalana miriŋunhanydja liŋguna,

ŋayi ŋunhiyi buŋgawanydja walŋu, benydja-wala garrwarnydja.