gnnNTOTPO

Exodus 5

Mawtjitj ga Yärun marrtjina bala Buŋgawawalana

5:1—6:1 (Moses and Aaron went to Pharaoh)

1Ga yalalaŋumirriyunydja, maṉḏa Mawtjitj ga Yärun marrtjina bala buŋgawanhana withiyara Yetjippuyŋunhana, bala maṉḏa waŋananydja nhanukala bitjarrana, “Bitjan yukurra dhuwala Garraynydja waŋa, ŋunhi Yitjuralwunydja Waŋarr, ‘Ma' djuy'yurrana ŋarrakunydja miṯtjinha, walala yurru marrtjina ga buku-ŋal'yun ŋarraku, ŋunhalana yurru ŋanhdharkŋurana wäŋaŋura.’ ”

2Yurru ŋunhi buŋgawanydja waŋana bitjarra warray, “Yol be ŋayi Garraynydja? Nhäku ŋarra yurru nhanŋunydja dhärukku malthun be? Yaka warray ŋarra marŋgi beŋuwu Garraywu. Yakana ŋarranydja yurru djuy'yun Yitjuralnhanydja.”

3Bala maṉḏa Mawtjitjtja ga Yärundja waŋana bitjarrana, “Ŋanapurru yurru marrtji ŋi', märr-gurriri ŋunha-bala ya', ḻurrkun' walu ŋanapurru yurru marrtjinydja ŋunhawalayi ŋanhdharklilinydja wäŋalili, ga ŋunhalayinydja ŋanapurru yurru wekama mundhurrnha Godkuna, wäyinnha bathan yurru nhanŋu, buku-ŋal'yunna bitjanna manapan. Ŋuli ŋanapurru yakanydja nhanŋu buku-ŋal'yun yurru, ŋayinydja yurru mak Godthunydja ŋanapurrunha bumana, ga rerriyuna ŋula nhäyuna ŋanapurru yurru burakirri.”

4Ga ŋayinydja waŋana ŋunhi buŋgawanydja maṉḏakala bitjarra, “Yakana yurru walala ŋunhiyinydja yolŋu walala marrtji. Yakana walala yurru ḏaḏawyun djämaŋuru. 5Nhumanydja dhuwalanydja Yitjuralpuyŋunydja miṯtji guḻku' mirithirri, dhaŋaŋ walŋu, djuḻkmarama yukurra ŋanapurrunhanydja Yetjippuyŋunhanydja yolŋu'-yulŋunha. Nhuma yurru djäma yana ŋanapurruŋgu, bäyŋu nhuma yurru ḏaḏawyun djämaŋuru.”

6-14Ga ŋulinyaramirriyu liŋgu, ŋayi buŋgawa wäthurruna ŋurru'-ŋurruŋuwu djämamirriwu Walalaŋgu ŋunhi walala yukurranha ŋuli buŋgawayinya Yitjuralpuyŋuwu walalaŋgu. Ŋayi waŋana walalaŋgala bitjarra, “Ŋunhanydja walala Yitjuralpuyŋunydja yolŋu'-yulŋu ḏuŋḏuŋmirrina, yana walala marrtji nhinana ŋunha, liŋgu walala yukurra waŋa bitjanna, ‘Gul' ŋilimurru marrtjina go, buku-ŋal'yunna ŋilimurruŋgalaŋuwu Waŋarrwuna,’ bitjanna. Nhuma buŋgawayunydja walalay yurru gorrwuŋa muka walalanha, wirrkiwu muka walŋu djämawu; walala bitjan yurru wirrki djäma ya', ŋutu' walŋu, märr yakana walala yurru mäkiri'-witjun maṉḏaku bothinyarayŋuwunydja dhäwu'wu.” Bala ŋuriŋi ŋurru'-ŋurruŋuyunydja buŋgawayunydja walalay gorrwuŋala wirrkina, djämana ḻakaraŋala ŋutu'na.

15-21Bala Yitjuralpuyŋuyunydja yolŋuyu walalay waŋana ŋarrtjurruna maṉḏanhana Mawtjitjnhana ga Yärunnhana bitjarra, “Nhuma maṉḏa dhiyaŋu maṉḏathu ŋunhi buŋgawanhanydja ŋayaŋu-yätjkuŋala, bala ŋayi yukurra ŋunha ŋaramurryirrina ŋanapurruŋgu, ga nhanŋu djämamirri walala bitjandhi yana liŋgu ŋaramurryirri yukurra ŋanapurruŋguway yana. Gatjpu' nhumalanha ŋayi Garrayyu rakunyguŋu, liŋgu nhuma yukurra goŋ-wekama gara dhuwala walalaŋgala, ŋanapurruŋgu dharpunharawu.”

22Bala Mawtjitjtja balayi roŋiyina, ga waŋana Garraynha bitjarra, “Garray gay'. Nhäku warray nhe dhuwala galŋa-yätjkuŋala dhuwala yolŋu'-yulŋunhanydja? Nhäku nhe ŋarranhanydja yawungu djuy'yun lili dhipala? 23Liŋgu beŋurunydja ŋunhi ŋarra yawungu dhäwu' ḻakarama buŋgawawalanydja nhunanydja yäku, ga ŋayinydja ŋuli yukurra buŋgawanydja bitjanna liŋguna yätjthirrina dhiyaku yolŋu'-yulŋuwunydja. Nhenydja yaka warray yawungu guŋga'yunanydja walalanha; yaka nhe walalanha dhawaṯmaranha, ga ŋoy-ḻayyunmaranhanydja.”