gnnNTOTPO

Genesis 33

Djaykup ga Yetju bunanhaminana maṉḏa

33:1-20 (Jacob met Esau)

1-3Yo, ŋayi Djaykuptja ŋurruŋuna djuḻkthurruna, ga nhanŋu miyalktja maṉḏa ga yumurrkuny'tja nhanŋu dhuḏikurru malthurruna yukurrana nhanŋu, bala marrtjinana yukurrana walala yana-wala.

Martj-martjtjurrunanydja walala-a-a, yana liŋgu ga ŋunhala gandarrŋuranydja, dharr-way nhäŋala Yetjunhanydja, bala walala ŋunhalana bunanhaminanydja. Bala yana Djaykuptja buku-nyilŋ'thurrunana nhanukala Yetjuwala ŋunhi ŋayi marrtjina galkililinydja, gumurrlilinydja nhanukala walŋu. 4Yurru ŋayi ṉaŋ'-ṉaŋdhurrunana gay' Yetjunydja gumurr'yurrunana nhanŋu, bala yana dhangi'yurrunana ŋanya, wälkuŋalana wiṯthurrunana dhikana, yurru maṉḏa märrma'na ŋäthinyaminanydja bala-lili'yunminana.

5Ŋuliŋurunydja dhurrwaraŋuru ŋayi Yetjuyunydja nhäŋa'-nhaŋala marrtjina ḻiw'maraŋala, dharr-way nhäŋala, bala dhä-wirrka'yurrunana waŋana bitjarrana. “Yol walala dhuwala dhäykawurrunydja ga yumurrkuny'tja? Yolku walala dhuwala yolŋunydja?” bitjarra.

Ga ŋayi Djaykuptja waŋana, “Dhuwalanydja gay yolŋu'-yulŋu ŋunhi ŋayipi Godthu wekaŋala walalanha ŋarraku, liŋgu ŋarranha Godthu yukurrana guŋga'yurrunanydja, ga gäŋala ḻatju'kuŋala yana.”

6-16Bala ŋayi Djaykupthu rarr'yurrunana marrtjina Yetjuwuna wäyindja malanha ga wiripu malanha ŋunhi mundhurr nhanbala Yetjuwana, yurruna ŋayi Yetju marrtjina balayi wäŋalili nhanukalanydja, nhayikayu Yedamlilinydja.

17-20Ga ŋayi Djaykuptja bitjarrayi liŋgu marrtjinayi bala wäŋalili Djikamlili yäkulili, makarrlili wäŋalili Gaynanlili, ga ŋunhalayina ŋayinydja nhinana. Ga ŋunhalayina ŋayi guṉḏana ŋal'-ŋalmaraŋala, mundhurrwuna wekanharawu ga buku-ŋal'yunarawuna Godku.