gnnNTOTPO

NEHEMIAH 1

Niyamaya warwuyurruna yukurrana Djurutjalambuyŋu wäŋawu

1:1-11 (Nehemiah was worried about Jerusalem)

1Yo, dhuwalanydja gay' dhäwu ŋunhi ŋayi Niyamaya yukurrana ḻakaranhamina ŋanyapinyay ŋayi, ŋayi ḻakaraŋalanydja bitjarra gam': Ŋarranydja dhuwala yäku Niyamaya, ga nhinanhanydja ŋarra yukurranha ŋuli ŋunhala Bapilun, ga djämanydja ŋarra ŋuli yukurranha buŋgawawu wal'ŋu ŋurikiyyi wäŋawuywu.

2Waŋganymirri wäwa'mirriŋu ŋarraku bunana Bapilun ŋunhala ŋulaŋuru Djurutjalamŋuru, wiripu-guḻku'walaŋumirri galki ŋayi bunananydja, ga dhunupana ŋarra dhä-wirrka'yurrunana walalanha bitjarrana, “Wanhana wäŋanydja ŋunhi Djurutjalambuynydja?... Manymakka wäŋanydja? Yolŋunydja walala ŋamathama yukurra nhina?... ŋunhinydja walala ŋunhi walala wäŋa-roŋiyina yukurrana ŋäthili Bapilunŋuru?”

3Bala walalanydja ŋarraku buku-yalkyalkthurruna, bala yana ḻakaraŋala bitjarrana, “Wäŋanydja ŋunha yakana manymak; dhakaṉnha yukurra djingaryun. Yolŋunydja walala ŋunha nhina yukurra ganydjarrmiriwnha, galŋa-yätjthirrina yukurra nhina, ga ḻoḻunydja ŋunha bukmak yana ḻiw'marama ḏaw'-ḏaw, buḻŋu'na marrtji ŋorra.”

4Ga ŋarranydja ŋäkula ŋunhi dhäwuny'tja ŋoynydja yätjthinana dhikana, galŋa-warwumirriyinana wirrkina dhikana ŋuruku miṯtjiwu yolŋu'-yulŋuwu. Bala ŋarra ŋäthinana gay' wiṯthurrunana dhika; wirrkina ŋarra ḏukṯukthinanydja walalaŋgu guŋga'yunarawuna. Nhinananydja ŋarra yukurrana ŋoy-ŋathamiriwnha ḻurrkun' walunydja ŋupara, yana ŋarra yukurrana märryu-ŋupara märrliliyaŋala ŋunha yolŋu'-yulŋunha. 5Ga bitjarrana ŋarra yukurrana bukumirriyaŋalanydja gam', “Garray Waŋarr wal'ŋu, djiwarr'wuy nhenydja God. Biyapul nhe dhuwala wakin wal'ŋu yulŋunydja, ga dhärranydja ŋanapurru yukurra dhuwala bitjan rom-wiyaṉiyirrina nhuŋu, liŋgu nhuŋu dhawu'-nherraṉaranydja yurru yukurra dhärrana yana-wala gupaḏalnha, ga bitjanna liŋguna nhe yukurra yurru märr-ŋamathirrina ŋurikinydja walalaŋgu, ŋunhi walala märr-ŋamathirri ŋuli yukurra nhuŋu ga dhäruk nhuna märrama. 6Bitjanna liŋgu ŋarra ŋuli yukurra bukumirriyamanydja ŋuriki nhokalaŋuwu yolŋu'-yulŋuwunydja, Yitjuralwunydja bäpurru'wu. Garray, ŋäka ŋarranha, ŋarrakuŋu bukumirriyanharanydja dhuwala. Garray bitjan ŋarra yukurra ḻakaranhamirri dhuwala yulŋunydja, ŋunhi ŋanapurru Yitjuralpuyŋuyu dhuwurr-yätjkuŋala. Ŋuriŋi ŋarrakala märi'muyu dhuwurr-yätjkuŋala, ga ŋarranydja bitjarra yana liŋgu dhuwurr-yätjthinayi. 7Yaka ŋanapurru djäma ŋamakurruny'tja wal'ŋu, ga yaka ŋanapurru dhäruk-märraŋala ga rom, ŋunhi nhe gurrunhara ŋanapurruŋgu ŋuliwitjarra Mawtjitjkala nhokalaŋuwala djämamirriwala. 8Garray, nhe ŋunhi waŋananydja Mawtjitjkala bitjarra, ‘Ŋuli yurru ŋarrakunydja yolŋu walala ḏiltji-wekama ŋapa-nherraṉmirri, ŋarranydja yurru yana djuy'yunna walalanha bena-wala barrkuwatjkumana. 9Ga ŋunhi walala yurru roŋiyirri nhanukala märr-roŋiyirri ga ŋayathama ŋarraku rom, ga ŋarranydja yurru walalanha beŋuruyi barrkuŋurunydja wäŋaŋuru roŋinyamaramayi liliyi, bala nherraṉdja ŋarra yukurra walalanha ŋunhimalana wäŋalili dharapullili ŋunhi ŋarra nherrara walalaŋgu. Ga ŋunhalayinayi walala yurru yukurra buku-ŋal'yundja ŋarraku.’ Bitjarraŋga, ŋunhi nhe waŋananydja Garray. 10Garray, ŋanapurrunydja dhuwala nhuŋuway djämamirri walala, nhuŋuway gal'ŋu yana dhulŋuŋu. Nhepi muka ŋunhi ŋanapurrunha dhawaṯmaraŋalanydja dhipuŋurunydja wäŋaŋuru, ga roŋinyamaraŋala Djurutjalamlilinydja, ŋuriŋi bili yana nhokalay ganydjarryu. 11Garray, ŋarra yukurra märr-ŋal'yun yulŋunydja nhokalay. Ga ŋäka ŋarrakuŋu dhuwalayi bukumirriyanharawuynydja, ga biyaka guŋga'yurrana ŋarranha, märr yurru gäthuranydja waluyu ŋunhi buŋgawanydja maŋutji-wuyunna ŋarraku.” Ga bitjarrayina ŋunhi ŋarra bukumirriyaŋalanydja yukurrana, liŋgu ŋarranydja dhuwala ŋurikiyi buŋgawawu djämamirri ŋarra, ŋarrapi ŋuli ŋathanydja yukurra gäma ŋuriki buŋgawawunydja, ga gapu.