gnnNTOTPO

DEUTERONOMY 12

Buku-ŋal'yurranydja waŋganygu yana yuwalkŋuwu waŋarrwu

12:1—14:28 (Worship only the one true God)

1“Dhuwalanydja Godku nhanŋuway rom, nhuma yurru mäkiri'-witjun nhanŋuway yana. Biyaka liŋgu yana djämanydja ŋunhiyi liŋgu ŋunhi ŋayi yukurra Godthu ḻakarama. 2-3Ŋunha wiripunydja mala miṯtji yolŋu'-yulŋu yukurra buku-ŋal'yun wiripuŋuwu waŋarrwu malanyŋuwu birrka'mirriŋura ŋunha wäŋaŋura, ga nhumanydja yurru marrtjiyana ŋunhimalayinydja walalaŋgala be dhuyulilinydja wäŋalili, bala buḻwa'-buḻwaŋmaraŋana buŋana ḏaw'-ḏawyurrana ŋunhiyi nhänydja malanha, muṉguykuŋana walalaŋgu maḏayin' malanha ga ŋula nhä dharpa ga barŋ dhika nhä malanha. Gulk-gulkthurrana ŋunhiyi walalaŋgu be maḏayin'tja malanha, bala dhuŋgur'yurrana walalambala ŋunhinydja be nhänydja maḏayin'nhanydja, ŋunhiyinydja waŋarr malanha ŋunhi walala ŋuli djäma goŋdhu walalawuy, bala märr-ŋal'yunna.

4“Ŋunha wiripu-guḻkuny'tja ŋunhayi yolŋu walala ŋuli yukurra buku-ŋal'yun walalaŋgalaŋunydja waŋarrwu djarrpi'kumana yanana, ga nhumanydja yurru yaka nhumalaŋgalaŋuwunydja Garraywunydja buku-ŋal'yun ŋuliwitjandhi walalaŋgalanydja romgurru dhukarrkurru. 5Ŋayipi yurru Garrayyunydja djarr'yun waŋgany yana wäŋa, märr yurru ŋunhiliyinydjayi waŋganyŋuranydja wäŋaŋura yolŋu walala yurru marrtji galkithirri galŋu nhanukalanydja, ga buku-ŋal'yun nhanŋuway yana waŋganygu. 6Ŋunhiliyina wäŋaŋura dharapulŋura waŋganyŋurana nhuma yurru yukurra wekama mundhurrnydja nhanŋu Godku, nhä nhe yurru ŋula wekama nhanŋu; ŋunhiliyina wäŋaŋura nhuma yurru marrtji galkithirrinydja galŋu yana ŋuliwitjannayi maŋgu'-waṉḏinyarakurru wäyingalana. 7Ŋunhalayinydjayi wäŋaŋura dharapulŋura nhuma yurru yukurra ḻuka ŋathana gumurrŋura nhanukalanydja bena goŋmirriyirrina walŋu dhikana, liŋgu ŋayipinydja Garrayyunydja nhumalanha bitjarra goŋmirriyaŋala warray dhipali nhumalaŋgala djämalili. 8Yakana. biyapulnydja nhuma yurru buku-ŋal'yun yukurra Godku ŋuliwitjan nhumalaŋgalaynydja nhuma guyaŋinyarakurru ga romgurru. Ŋunhi nhuma yurru gulŋiyirrinydja ŋunhiwalayi wäŋalili ŋunhi ŋayi yurru Garrayyu wekama nhumalaŋgu, ŋunhalayinydjayi nhuma yurru buku-ŋal'yun yukurra waŋarrwu Godkunydja nhanukalaynha yana romgurru, 9liŋgu ŋunhalayinydjayi nhuma yurru nhina ŋayaŋuna, bitjan ŋayaŋu-yal'yunna bukmakthu ŋuriŋi ŋunhi ŋayi wekaŋala marrtjina nhumalaŋgu.

10-11“Yo, Garrayyu yurru ŋayipi nhumalanha gunganhamirriyamanydja, yakana ŋayi yurru miriŋuyunydja buma nhumalanha, bala nhuma yurru nhinanydja yukurra ŋayaŋu-yal'yunna wurrkurrum'nha. Nhuma yurru buku-ŋal'yundja yukurra nhanukalaynha yana Garraywalana romgurru, ŋunhilina liŋgu ŋunhi ŋayipi djarr'yurruna ŋunhiyi wäŋa, ga wekamanydja nhuma yurru Garraywunydja ŋunhiyi yana liŋgu ŋunhi ŋayipi waŋana nhumalanha wekanharawu. 12Nhumapi ga nhumalaŋgu djamarrkuḻi' yumurrku' ga ḏalkarra'mirri walala ŋunhiyi, djulŋithiyana dhikana goŋmirriyiyana ŋunhili Godkala gumurrŋuranydja. 13-14Yaka dhuŋgur'yurra mundhurr Godku birrka'mirriŋuranydja; nhuma yurru wekamanydja ŋunhiliyi liŋgu dharapulŋuranydja wäŋaŋuranydja ŋunhi ŋayipi djarr'yurruna nhumalaŋgu.

28“Dhäruktja märraŋa ŋarraku, dhiyakunydja dhärukku ŋunhi ŋarra yukurra wekama nhumalaŋgu, bukmakku yana, bala yurru nhuma ga nhumalaŋgu mala-wunharanydja yukurra nhina ŋamathamana dhikana yurru goŋmirriyirrina, ŋunhi nhuma yurru djäma yukurra ŋunhiyi yana liŋgu ŋunhi Godthu ŋayipi ḻakarama yukurra dhunupa walŋu.”

Yaka buku-ŋal'yurra wiripuŋuwunydja waŋarrwu

12:29—13:4 (Warning against worshipping other gods)

29“Yo, nhuma yurru mukthun yana marrtjinydja ga gulŋiyirri ŋunhimalayi wäŋalili, ga ŋayinydja yurru nhumalaŋgu Waŋarrnydja Garraynydja marrtji galki yana nhumalaŋgala, bitjan ŋayi yurru bumana marrtji ŋunhiyinydjayi yolŋu'-yulŋunha ŋunhi walala yukurra nhina. ŋunhili wäŋaŋura, märr yurru ŋunhiyinydjayi wäŋa nhumalaŋguwaynha yana nhinanharawu. 30Yurru yaka walalaŋgalaŋuwu romgunydja malthurra ŋurikiyi mulku'-mulkuruwalaŋunydja, ga yaka Walalaŋgalaŋuwu waŋarrwu marŋgithiya yukirriya. Yaka walalanha waŋiya dhä-wirrka'yurra biyakanydja, ‘Nhaltjan dhika nhuma ŋuli buku-ŋal'yun yukurra nhumalaŋgalaŋuwunydja waŋarrwu?’ Yaka biyakayinydja dhä-wirrka'yurra, märr yurru nhumalanha yaka gaṯmaramanydja ŋuriŋi walalaŋgalay romdhunydja. 31Ŋunhiyinydja rom walalaŋgunydja yätjnha galŋu yanana, yakana yana nhuma yurru buku-ŋal'yun Garraywu bitjandja bitjan ŋunhi walala yukurra buku-ŋal'yun walalaŋgalaŋuwu waŋarrwu. Liŋgu Garraynydja ŋayipinydja yukurra nyinyaŋdhun ŋurikiyinydjayi ŋunhi walala ŋuli yukurra djäma walalaŋgalay buŋgulkurru, bitjan märr-ŋal'yun walalaŋgalaŋuwu waŋarrwu. Wiripunydja walala ŋuli mundhurr-wekama walalaŋguway yumurrku'nha, bitjan bathan gurthalili mundhurr walalaŋgalaŋuwu waŋarrwu. 32Gurrum'thurra biyaka nhumalaŋguway nhuma yulŋunydja. Yaka biyakayi bukulili ŋal'maraŋa ŋunhiwalayi ŋula nhä rom ŋunhi ŋayi gurrunhara Garrayyu ŋayipi, ga yaka ŋula waŋgany meṉguŋanydja yana.