gnnNTOTPO

Daniel 3

Godthu walŋakuŋala ḻurrkun'nha ḏarramuwurrunha gurthaŋuru

3:1-30 (God saved the three men from the fire)

1Yo, yalalaŋumirriyunydja ŋuriŋiyi buŋgawayu yäkuyu Nipukanitjayunydja ŋamaŋamayurruna waŋarrkuŋala be nhäna garwarrwarr'nha guṉḏanha yolŋukuŋalana, yurru milŋ'-milŋdhunarana ŋunhiyi yulŋunydja, ga nhinananydja ŋayi yukurrana ŋunhiyi bena walŋu bathalana ŋanyana, biyapulnha walŋu buku-weyin, ga dhärrananydja ŋayi yukurrana ŋunhiyi baṉarraŋura wäŋaŋuranydja walŋu ŋunhiliyi Bapilundja wäŋaŋura 2Bala ŋayi ŋunhiyi buŋgawanydja wäthurrunana ŋuriki yolŋu'-yulŋuwunydja ŋurru'-ŋurruŋuwunydja malaŋuwu, ḻuŋ'maraŋalana walalanha marrtjina ŋunhimalayina. 3Yo, dhärrananydja walala marrtjina ŋunhi galkina yana walŋu ŋurikalayinayi maliwalana, rrambaŋina walala wiripu-guḻku'na miṯtji dhärrana ŋapaŋuranydja walalaŋgala ŋula nhämunha'na miṯtji.

4Bala ŋayi ŋunhi waŋganydja yolŋu djawarrkmirrinydja waŋana wirrkina galŋu rirrakay bathalayuna, waŋana bitjarrana, “Nhuma yolŋu walala miṯtji bukmak walŋu yana bäpurru' ga dhäruk, ŋäka walala ŋamathaŋa yana. 5Galkina nhuma yurru ŋämana yiḏakinydja ḻoḻthunarana, ga dhunupa yana nhuma yurru ŋunhi ŋämanydja, bala nhuma yurru baḻa-waḻapthunna ŋurikiyi maliwunydja waŋarrwunydja, bukmak yana nhuma yurru ŋurikiyi maliwu buku-ŋal'yundja yukurra, ŋunhi ŋayi dhuwala buŋgawayu nherrara. 6Ga ŋunhi nhe yurru yakanydja dhunupa buku-ŋal'yun dhiyakuyi, ga dhunupa ŋanapurrunydja yurru nhuna djalkthun ŋunha gurthalilina, ŋunha yukurra nhära be galŋu, ŋawyun yukurra mirithirrina.”

7Ga bukmakthu ŋunhi yolŋuyunydja ŋäkulana ŋunhi yiḏakinydja ŋunhi ŋayi ḻoḻthurruna be walŋu rirrakay, ga dhunupana walala marrtjina galkinana yulŋunydja munatha'lilina, buku-ŋal'yurrunana manapara maliwuna ŋurikina waŋarrwu. 8-9Ga walala ŋunhi ḻurrkun'tja yolŋu walala Yitjuralpuyŋunydja, yaka warray buku-ŋal'yurruna; mukthurruna warray marrtjina dhärra'-dharrana yana.

Yo, ŋunhi walala Bapilunbuyŋu ŋurru'-ŋurruŋu yaka ḏukṯuk walalaŋgu ŋuriki Yitjuralpuyŋuwunydja miṯtjiwu, ga dhunupana yana walala marrtjinanydja ŋurikalana buŋgawawalana walŋu, bala ḻakaraŋalana nhanbala walalanhanydja, ḻakaraŋalanydja walala waŋananydja bitjarra, 10-12‘Way buŋgawa, rom muka nhenydja ŋunhi nherrara ŋurukuyinydjayi, bitjarraŋga nhe ŋunhi nherraranydja gam’ romdja. Bukmak yurru yolŋu walala buku-nyilŋ'thun ga buku-ŋal'yun ŋurukuyi maliwu ŋunhi nhe nherrara, bitjarra muka nhe romdja ŋunhi nherrara. Yurru ŋunha ŋunhi ḻurrkun'tja Yitjuralpuyŋunydja yolŋu walala, yaka warray walala buku-nyilŋ'thurruna ga buku-ŋal'yurruna ŋurukuyi maliwunydja. Nhe muka ŋunhi walalanha ŋurruŋukuŋalanydja dhiyakuyinydja wäŋawu, ŋunhayi walalanha Djaturaknha ga Mitjaknha ga Bitnikunha, yurru walalanydja ŋunhi yaka warray nhuna dhäruk-märraŋala. Yaka warray walala yurru buku-ŋal'yun nhokalaŋunydja waŋarrwu, ga yakana yana walala yurru ŋunha buku-nyilŋ'thun ŋurukuyinydjayi maliwunydja ŋunhi nhe nherrara ŋunhayi.”

13Ga ŋayinydja ŋunhi buŋgawayunydja ŋäkula, bala mirithinana maḏakarritjthinanydja wirrkina galŋu. Bala ŋayi wäthurrunana walalaŋgu ŋuriki ḻurrkun'kunydja ḏarramuwurruŋgu, bala waŋana walalanha bitjarrana, 14“Nhuma Djaturak ga Mitjak ga Bitniku! Dhäwu' ŋarra dhuwala ŋäkulanydja nhumalaŋgalaŋuwuy. Yuwalk dhikayi yulŋunydja?... ŋunhi nhuma yaka buku-nyilŋ'thurruna ŋarrakalaŋunydja waŋarrwu? Yaka nhuma buku-nyilŋ'thurruna ŋurikiyi waŋarrwunydja ŋunhi ŋarra nherrara ŋunhiyi? 15Ŋunhi nhuma yurru ŋämanydja rirrakaynydja ḻoḻthunaranydja, ga dhunupana yana nhuma yurru buku-nyilŋ'thunna yana yulŋunydja. Ga ŋuli nhuma yurru yakanydja bitjandhiyi, ŋanapurrunydja yurru djalkthunna nhumalanha ŋunha gurthalilina walŋu yanana. Wanhaka dhika be God waŋarr nhumalaŋgunydja?... ŋunhi ŋayi yurru walŋakuma nhumalanhanydja ŋarrakalanydja be goŋŋuru? Bäyŋu warray dhika waŋgany.”

16Ga walala ŋunhi ḻurrkun'tja ḏarramuwurru waŋana buku-wakmaraŋala bitjarra, “Yakana ŋanapurru yukurra dhuwala warwuyundja. 17Manymaknha ŋanapurruŋgu ŋunhinydja, ŋunhi nhuma yurru ŋurrkama ŋanapurrunha gurthalili, liŋgu ŋanapurruŋgunydja ŋunhinydja Waŋarr God biyapul warray walŋu ganydjarr-ḏumurru warray; ŋayi warray ŋanapurrunhanydja yurru walŋakuma beŋuruyi gurthaŋurunydja ŋäṉarrŋurunydja, ga yuwalk yana ŋayi yurru ŋanapurrunha walŋakuma dhipuŋuruyi nhokalanydja goŋŋuru. 18Ŋuli yurru ŋayi yaka ŋanapurrunha walŋakuma dhipuŋuruyi gurthaŋurunydja, ŋunhinydja manymakthi yana, yurru yakana ŋanapurru yurru buku-ŋal'yun nhokalaŋunydja waŋarrwu; yakana yana ŋanapurru yurru ṉepaḻ-nyilŋ'thun ga buku-ŋal'yun ŋurikiyi nhokalaŋunydja waŋarrwu maliwunydja.”

19-20Ga ŋayinydja ŋunhi buŋgawanydja be warray dhika ŋaramurryina, wirrki warray, bala ŋayi waŋana ŋurikiyi djämamirriwu nhanukalaŋuwu ŋayi walalaŋgu bitjarrana, “Ma', dhä-yurrkuŋana ŋunhi gurthanhanydja biyapulnha walŋu yindikuŋana ŋawyunmaraŋana, ga ḏap-ḏapmaraŋana walalanha raki'yuna, dhuwalayi walalanha ḏarramuwurrunhanydja, bala yana djalkthurrana gurthalilina.” 21Bala walala yuwalkthi ḏap-ḏapmaraŋalana goŋ maṉḏanha ga djalkiri raki'yuna malaŋuyu, bala djalkthurrunana yana gurthalilina girri' manaparana yanana. 22Ga dhunupana yana ŋuriŋi gurthayunydja nhäranhamaraŋala ŋunhi warray walalanha ŋunhi walala djalkthurruna walalanha, ŋunhi ḻurrkun'nha ḏarramuwurrunha gurthalili, ŋunhiyina walala nhärananydja, liŋgu biyapulnha ŋunhi gorrmurnha ŋatŋatthurruna yukurrana gurthanydja. 23Ga walala ŋunhiyi ḻurrkun' ḏarramuwurru Djaturak ga Mitjak ga Bitniku galkinanydja ṉapuŋga'lilina yana walŋu ŋäṉarrlilina gurthalilinydja ḏap-ḏapmaranharana.

24Ga ŋayinydja ŋunhi buŋgawanydja nhinana yukurrana, nhäŋala walalanha ŋunhiwalayi gurthalilinydja, ga beŋuruyinydja ŋayi wapthurruna, bitjarra ŋayi ṉirryurrunana nhäŋala walalanha, bala ŋayi waŋana bitjarrana, “Way, nhämunha'nha muka ŋunhi ŋilimurru ḏupthurruna ḏarramuwurrunhanydja gurthalilinydja?... ḻurrkun'nha muka?” bitjarra.

Ga walalanydja waŋana buku-wakmaraŋala bitjarra, “Yo, ḻurrkun'nha muka,” bitjarra.

25Ga ŋayinydja waŋana ŋunhi buŋgawanydja walŋu bitjarra, “Way, ŋunha ŋarra yukurra nhämanydja ga ḏämbumiriwnhana ŋunha gurthaŋuranydja, marrtji'-marrtji walala yukurra. Yaka warray walala ŋunha ḏap-ḏapmaranhara raki'wuynydja, ŋamakurru'mirri warray dhika wäŋgamanydja walala yukurra rerrimiriw warray ŋunha gurthakurrunydja. Ga wiripunydja ŋunhayi waŋganydja ga ganaŋ'thun warray yukurra, balanyara warray bitjan waŋarrnha ŋayi ŋunhayi.”

26Bala ŋayi marrtjinana ŋunhi buŋgawanydja märr-galkithinana galŋu, ga nhäŋala galkiŋuruna walalanha, ga waŋana bitjarrana, “Way, nhuma djämamirri walala ŋuriki Walŋa-ḏikṯikku galŋu Waŋarrwu! Go dhawa-yawaṯthurrana walala,” bitjarra.

Ga dhunupana yana walalanydja dhawa-yawaṯthurrunana beŋuruyi gurthaŋurunydja yukurrana. 27Bala walala yolŋu'-yulŋunydja ŋunhi giṯthunminana marrtjina, nhäŋalana marrtjina walalanha, ga nhäŋalanydja walala ŋunhi walalanha dhärranharanydja ḻatju'mirri warray, ŋanya dhika warray, yaka warray nhäranharanydja marwat walalaŋgu ga girri', warrpam' warray dhika ḻatju' warray. Ga yaka walala ŋunhi waŋgi'yurruna buŋgan gurthanhanydja walalaŋgala, bäyŋu warray.

28Bala ŋayi waŋana ŋunhi buŋgawanydja bitjarrana, “Dhiyakunydja walalaŋgu ḏarramuwurruŋgu Waŋarr biyapul warray dhika ŋanya, dhapirrk warray, ḻatju' warray. Ŋayinydja djuy'yurruna ŋunha djiwarr'wuynha warray yolŋunha walalaŋgala walŋakunharawunydja walalaŋgu, liŋgu walala märr-nherraṉmina nhanukala yuwalkkuŋala walŋu. Walala waŋana yukurrana bitjarra, ‘Bäyyi ŋunhi ŋanapurru yurru murrmurryun, yakana ŋanapurrunydja yurru buku-ŋal'yun yukurra ŋula yolkunydja wiripuŋuwunydja waŋarrwu malaŋuwu.’ Yo, walalanydja ŋunhi dhäruk-djuḻkmaraŋala ŋarranha, liŋgu walala ŋunhi djarr'yurruna ga dhärukku malthurruna ŋurikiyi liŋgu walalaŋgalaŋuwu yana waŋarrwu. 29Ga dhiyaŋunydja-wala ŋarranydja yukurra nherraṉ yuṯana galŋu rom wiripuna. Ŋunhi nhuma yurru dhiyaŋu-wala ŋula yolthu yätj-ḻakaramanydja Godnha dhiyakunydja walalaŋgu ḻurrkun'kunydja ŋunhi ḏarramuwurruŋgu, ŋunhiyinydjayi ŋanapurru yurru yolŋunha bumana murrkay'kumana, ŋayi yurru rakunydhirrina. Liŋgu yakana ŋula yolthu wiripuŋuyunydja waŋarryu ŋuli walŋakuŋu yolŋu'-yulŋunha, ŋuruŋuna bili waŋganydhuna walalaŋgalana Godthu yukurra ganydjarr gäma walŋakunharawunydja yolŋu'-yulŋuwu.”

30Ga dhurrwaraŋuru ŋuliŋurunydja ŋuriŋi buŋgawayunydja wekaŋala bukmaknha ŋunhi wäŋa Bapilunbuynydja ŋurikalayina walalaŋgala dharraylili ga goŋlili.