gnnNTOTPO

PSALMS 91

Garray dhuwala ŋurrwuny'tja ŋilimurruŋgu

91:1-16 (God is our protector)

1Garray dhuwala ŋurrwuny'tja ŋilimurruŋgu, ŋayi yurru ŋilimurrunha monyguma ŋurrwu'yunmarama,

bili ŋayi ŋunhi biyapulnydja-wala garrwar Waŋarrnydja.

Ŋuli yurru ŋula yol yolŋu gärrinydja nhanukala ŋurrwu'lili,

bala nhinana yukurra yurru nhanukala,

ŋayinydja yurru walŋathirri warray, Garraywala ŋuriŋi gunganharayu.

2Ŋayi yurru waŋa Garraywala bitjanna,

“Nhenydja dhuwala ŋarraku watjarr'mirri, ga ŋurrwu' walŋamirri.

Nhepina ŋarrakunydja Waŋarr; ŋarra yurru nhokalana ŋayaŋu-nherraṉmirri.”

3Ŋe! Ŋunha Yätjthu Ŋäṉukthunydja yukurra ŋayathama raki'na ḏapmaranharawu nhuŋu,

yurru Garrayyunydja nhuna yurru walŋakuma warray, yupmaramana yurru nhokala,

ga walŋakuma ŋayi yurru nhuna gungama rerriŋuru ga rakunydhinyaramirriŋuru.

4Walŋana nhe yurru nhina yukurra Garraywalanydja djäkaŋura,

bitjandhina bitjan ŋunha wäyindhu ŋuli dhangi'yun yothu'nha wäyinnha binbarrlili yaluŋura,

djuḻuḻ'marama ŋuli burakinyaraŋuru;

Bitjandhi bili nhunanydja yurru djuḻuḻ'marama Garrayyunydja nhanukalay ŋurrwu'lili,

walŋakumayi nhuna yurru.

5Munhakunydja nhe yurru nhina yukurra beyaṉumiriwnha,

ga bitjandhi liŋgu walupuynydja,

beyaṉumiriw yana nhe yurru yukurra nhina.

6Yakana nhuna yurru ŋula yolthu djaw'yun, ŋula buma nhuna yurru,

bili Garrayyuna yukurra nhuna gungama,

ŋurrwu'yunmarama yurru walu-ŋupan ga munha-ŋupan.

7Wiripu-guḻku' yolŋu walala yurru galkirrinydja marrtji,

murrmurryundja yurru ŋula nhokala ḻiw'marama.

8Nhenydja yurru yaka warray burakirri ŋula nhäyu,

nhenydja yurru yana nhäma ŋunhi dhuwurr-yätjmirrinha,

walala yurru galkirri marrtji ŋuriŋi Garraywala dhä-ḏir'yunarayu.

9-10Nhunanydja yurru yaka ŋula yätjthu romdhu wutthun,

liŋgu nhanukala Garraywala nhenydja wekanharamina goŋlili;

Ŋayi ŋunhi garrwar walŋu Waŋarr God nhuŋunydja gunganharamirri ga watjarr-mulkanharamirri,

yakana yurru ŋula nhä mari galkithirri nhokalanydja wäŋalili.

11Liŋgu Godthu yurru goŋ-nherraṉ nhuŋu djäkamirrinha yolŋu'-yulŋunha,

walala yurru ŋunhi djiwarr'wuy walala marrtji dharraynydja nhuŋu wanhawitjan nhe yurru marrtji;

12Mulkana yurru walala marrtji nhuna baṯ bitjanna,

märr nhe yurru yakana ŋula galkirri,

ga burakirri ḻukunydja ḏaw'yun guṉḏayunydja.

13Ŋuli nhe yurru nhäma ŋula wakinŋunha wäyinnha maḏakarritjnha,

nhenydja yurru yana bumana ŋanya, gukumana yurru;

Nhämana nhe yurru moḻŋunha maḏakarritjnhanydja,

bala yana muŋdhunna ŋanya nhokalay nhe djalkiriyuna.

14Garray yukurra waŋa bitjan,

“Ŋarranydja yurru walŋakuma yolŋunha ŋunhinha,

ŋunhi ŋayi yukurra mulka rambuma ŋarranha;

Ŋarranydja yurru nhanŋu dharray, ŋapatjkumana ŋanya,

liŋgu ŋayi marŋgina walŋu ŋarraku, nhäyinyara ŋarra yulŋunydja Godtja.

15-16ŋunhi ŋayi yurru wäthun ŋula ŋarraku,

bala ŋarra yurru waŋa buku-wakmarama nhanŋu;

Ga ŋuli ŋayi yurru ŋula marilili gärri,

ŋarranydja yurru ŋunhili nhanukala galki,

walŋakumanydja ŋarra yurru ŋanya, märramana dhawaṯmaramana ŋuliŋuru mariŋuru.

Bala ŋarra yurru märr-ŋal'yunna nhanŋu ŋuriki yolŋuwu ŋunhi ŋayi ŋarrakala yukurra märryu ḏapmarama,

ga buku-ruŋiyinmarama ŋarra yurru nhanŋu;

Weyinnha ŋayi yurru nhina yukurra dhiyala munathaŋuranydja,

liŋgu ŋayi yurru marŋgithirrina ŋarraku walŋamirriwuna romgu.”

Ga bitjan yukurra Garray waŋanydja.