gnnNTOTPO

MICAH 2

Godthu yurru dhä-ḏir'yunna ŋunhinydja yolŋu'-yulŋunha ŋunhi walala ŋuli djaw'-djawyun marrtji ŋurruwuykmirriwala

2:1-13 (God will punish the rich who oppress the poor)

1“Yo, bathalana ŋanyana marinydja yurru nhumalaŋgu marrtji, ŋurikinydja nhumalaŋgunydja ŋunhi munhakunydja nhe ŋuli ŋunhinydja ḻäy-ŋorrana, guyaŋirrina marrtji ŋurikina dhukarrnha-nherraṉ ŋunhi nhe yurru djäma yätj gal'ŋu malanha, ga ŋunhi ŋayi ŋuli djaḏaw'yundja goḏarr'mirrinydja, nhenydja ŋuli gaŋgathirri, bala djämana yana ŋunhiyi be nhänydja nhäŋiniŋ'tja rom, ŋunhi nhe yukurrana djarr'yurruna. 2Nhe djäl-ḏumurruyirri yukurra wäŋawu ga bala'wu malaŋuwu, bala nhe ŋuli djaw'-djawyunna ŋuliŋuru wiripu-guḻku'walanydja yana. Yakana yurru ŋula yolthu yukurra ŋayathamanydja nhanŋuway ŋayi nhä malanha nhanukalayŋuwunydja ŋayi yumurrku'wu, liŋgu nhenydja ŋuli ŋunhi djaw'-djawyunna yana walalaŋgalaŋuŋuru. 3Ga dhiyakuyinayi märrwu ŋarra yukurra djarr'yun dhukarrnydja, märr yurru ŋayi ŋunhiyinydja yätjtja maḻŋ'thunna yana nhuŋu ga nhokalaŋuwu djamarrkuḻi'wunydja, yakana nhe yurru winya'yun dhä-ḏir'yunamiriwnydja. Yuwalk yana marinydja nhuŋu yurru bathala ŋanya marrtji lili, ga yakana biyapulnydja nhe yurru marrtji yukurra be milkunharamirrinydja nhunapinyay nhe, bathala ḻakaranhamirrinydja yukurra yurru.

4Yo, ŋulinyaramirriyunydjayi yolŋuyu walalay yurru marrtji miyaman manikaynha nhumalaŋgalaŋuwuy, yana nhumalanha warku'yunna bitjanna dhiyaŋuna manikayyunydja gam',

“Warrpam'thunara yana nhuma dhuwala baḏuwaḏuyunaranydja.

Garrayyu djaw'-djawyurruna nhumalaŋgu wäŋanydja ŋarakanydja,

bala barrku'-barrkuwatjkuŋalana guḻk-guḻkthurruna,

ga goŋ-wekaŋala ŋurikalana ŋunhi nhumalaŋgalaŋuwala miriŋuwalana walalaŋgala.”

5Yo, yakana biyapulnydja nhuma yurru ŋayathama yukurra ŋunhiyi nhumalaŋguway wäŋanha, liŋgu yakana biyapulnydja nhuma yurru nhanŋu Garraywunydja yolŋu'-yulŋu.

6Yo, yolŋu walala ŋuli wiripunydja waŋa ŋarrakala bitjan, “Yaka ŋanapurruŋgala ḻakaraŋa dhäwu' biyakayi, yaka ŋanapurrunydja dhuwala ḏukṯuk dhiyakuyi. Yaka warray Godthunydja yurru ŋanapurrunha gora-wekama; yaka warray yurru bitjandhiyi yätj ŋula nhä maḻŋ'thun ŋanapurruŋgunydja.” Bitjan nhuma ŋuli waŋa.

7Yo, nhumanydja dhuwala Yitjuralnydja ŋuli guyaŋinyamirri be yindikunharamirri wal'ŋu, liŋgu ŋulaŋuru nhuma Djaykupkala dhuwala yarraṯaŋuru. Nhumanydja guyaŋirri yukurra yanapi Godtja ḏukṯuk baḏuwaḏuyunarawu nhumalaŋgu? Yaka warray ŋayinydja ḏukṯuk nhumalaŋgunydja baḏuwaḏuyunarawu, ga ŋunhi nhuma yurru nhina yukurra rom-dhunupa, nhumanydja yurru yakana barrarirri ŋurikiyinydjayi nhanukalaŋuwu dhärukkunydja. Ŋuli nhuma bini djäma ŋamathanha wal'ŋu, ga nhumanydja bini märranha ŋamakurru, yana wal'ŋu, yaka yätj.

8Yo, ŋayi Garray waŋanydja yukurra bitjan, “Ŋäthili ŋunhi baman', yana liŋgu ga dhiyaŋu-wala wapthun, nhuma ŋarrakunydja yolŋu walala nyinyaŋdhurrunana ga ŋapana-wekaŋala ŋarraku; yaka warray nhuma ŋayathaŋala ŋarraku rom baṯ bitjarra. Yanana nhumanydja ŋuli yukurra djaw'-djawyunna ŋuliŋuru yolŋu'-yulŋuwalanydja, yanapi nhenydja walalaŋgu buŋgawana; yananydja nhe ŋuli girriny'tja djaw'-djawyunna walalambala, ŋuripa yolŋu'-yulŋuwa ŋunhi walala ŋuli nhina yukurra dhäruk mukthun wurrkurrum'. 9Ga wiripunydja nhuma ŋuli gukuma ŋarrakunydja yolŋu'-yulŋunha dhäykawurrunha walalaŋgalay wäŋaŋuru buṉbuŋuru malanyŋuŋuru, ga djaw'-djawyunna marrtji nhuma ŋuli nhänydja malanha walalaŋgalaŋuwu yumurrku'wunydja. ŋunhiyinydjayi girri' malanha mundhurr ŋarrakuŋuway warray wekanhara, yurru nhumanydja ŋuli yana djaw'-djawyunna-wala, ga yakana nhuma ŋuli roŋinyamaramanydja balayi.

10“Yana gaŋgathiyana ga marrtjiyana-wala gatjaḻa! Yakana yurru biyapulnydja dhuwala wäŋa nhumalaŋgunydja nhinanharawu. Dhiyaŋunydja wäŋayunydja nhumalanha yurru yana baduwaḏuyunna, liŋgu nhuma baduwaḏuyurruna dhuwala wäŋanha dhiyaŋi nhumalaŋgalay dhuwurryu-yätjthu. 11Nhumanydja yaka ḏukṯuk yuwalkŋuwunydja wal'ŋu dhäwu'wu, ŋunhi ŋayi yurru ŋunhi Garrayyu dhäruk-wekama yolŋu'-yulŋuwala. Dhiyaku warray djawarrkmirriwu nhumanydja ḏukṯuk gam', wiripuŋuwu warray ŋunhi ŋayi yurru bothirri warray ḻakarama, ga nhäŋiniŋ' dhäruk bitjan gam', ‘Bitjan warray liŋgu yurru dhuwalanydja wäŋa borum-mäypamirri warray dhika warray, ŋunhi yaka warray yurru be räwakthirri ga winya'yun weyikany'tja.’ Balanyarawuyi nhumanydja yolŋuwu djawarrkmirriwu mirithirrinydja ḏukṯuk.”

12Yurru ŋayinydja Garraynydja yukurra waŋa bitjan warray, “Märr-ḻurrkun'nha yurru ŋurikala yarraṯaŋuru Djaykupkalanydja nhina yukurra walŋamirrinydja, ga yuwalk yana ŋarra yurru waŋgany-manapandja marrtji walalanha bukmaknha yana, bala ŋarra yurru gäma roŋinyamaramana ŋarrakiyingalana ŋarra; walala yurru nhinanydja yukurra rrambaŋina yana, waŋganynha miṯtji, ga dhuwalanydja wäŋa biyapul yurru ŋayi dhaŋaŋdhirri miṯtjiyu yolŋu'-yulŋuwala, ga biyapul yurru ŋayi rirrakaymirriyirri dhuwala wäŋanydja, goŋmirriyirri dhika wal'ŋu djulŋithirri yurru yukurra wäŋa djingaryun.” 13Liŋgu ŋunhinydja ŋunhi ŋayi Walŋakunharamirri Garray wal'ŋu, bakmaramana yurru ŋayi ŋunhi rakiny'tja ŋunhi yukurra ŋayathama walalanha be-wala barrku wäŋaŋura, ga dhawaṯthunna walala yurru yänana yulŋunydja-wala beŋuru mulkuruwalanydja wäŋaŋuru, bala roŋiyirrina lili walalaŋgalaynha walala wäŋalili. Yo, walalaŋgu ŋurruŋunydja buŋgawanydja ŋayina yukurra yurru marrtji ŋurruŋunydja, ga walalanydja yurru muṉguyunna, malthunna marrtji nhanbala Garraywana.