Djiramayawuŋu djorra' wukirriwuy Djuwwu miṯtjiwu Bapilunlili
29:1-23 (Jeremiah's letter to the Jews in Babylon)
1-3Ŋäthilinydja ŋunhinydja buŋgawa wäŋawuy Bapilunbuy ga nhanŋu miriŋu miṯtji marrtjina bala Djurutjalamlili, märraŋalanydja walala marrtjina garr'yurrunanydja guḻku'nhana mirithirrina yolŋu'-yulŋunhanydja, bala djaw'-djawyurruna balayi walalaŋgalayyi wäŋalili. Bala ŋayi Djiramayayunydja wukirrina djorra'na ŋurikiyinydja Walalaŋgu Yitjuralpuyŋuwunydja yolŋu'-yulŋuwu, bukmakku yana ŋunhi walala yukurrana Bapilun wäŋaŋura nhinana. Ga dhuwala ŋunhi ŋayi djorrany'tja wukirri gam':
4Way walala, dhuwala Garraywuŋunydja dhäruk nhumalaŋgu ŋunhi Djurutjalambuyŋuwu yolŋu'-yulŋuwu ŋunhi nhuma djaw'-djawyunarawuy walala. 5Dhiyaliyinydja nhuma yurru yukurra nhina märr-weyinŋumirrina. Nhumanydja yurru djäma wäŋana nhumalaŋguway buṉbuna, bala nhuma yurru nhinana yukurra. 6Märranhamiya walala, märr yurru nhumalaŋgu djamarrkuḻi' ŋuthan yukurra miṯtji guḻku'yirri. 7Wirrki yana djämanydja walŋu, märr yurru dhuwaliyi wäŋanydja ŋamakurru' yana, ga bukumirriyaŋa yukirriya ŋuriki wäŋawunydja, märr yurru ḻatju' dhika marimiriw nhämiriw djingaryun yukurra, ga bukmak yurru nhumalaŋgu nhä malanha ḻatju'yirri yana.
8-9Yaka mäkiri'-witjurra ŋurikinydja dhäwu'-gänharamirriwu walalaŋgu ŋunhi walala yurru ḻakarama nhumalaŋgu bitjan, “Galkina dhuwala walunydja, ŋilimurru yurru marrtji balayi Djurutjalamliliyi,” bitjan yurru. Yaka walalaŋgu yana ŋurikinydja yolŋu'-yulŋuwu mäkiri'-witjurra, ŋunhi walala ŋuli ḻakarama be bukaway'wuy. Liŋgu dhäruktja ŋunhiyi mayali'-wilkthunaramirri bothinyarayŋu, yaka ŋarrakuŋu wekanhara, bitjarra ŋayi Garraynydja waŋana. 10Yuwalk yana märr-weyinŋumirri nhuma yukurra yurru nhinanydja ŋunhalayi Bapilundja wäŋaŋura, ŋula nhämunha' dhuŋgarra 70, ga dhäŋuru ŋuliŋurunydja ŋarra yurru marrtjina-wala nhumalaŋgala, ga märramana nhumalanha, bala gäma nhumalaŋgalaynha wäŋalili roŋinyamarama. 11Liŋgu ŋarra nherrara ŋäthilimirriyaŋalanydja nhumalaŋgu ŋunhayi, ga ŋunhiyi nherraṉara ŋarrakuŋu ŋamakurru' yana, yaka yätjtja; yuwalk yana yurru ŋunhiyi maḻŋ'thun yalalanydja, nhina nhuma yukurra yurru ḻatju'kuma dhika walŋu galŋa-djulŋithirri goŋmirriyirri, ŋunhilinydja wäŋaŋura ŋunhi ŋarra dhawu'mirriyaŋala nhumalaŋgu. 12Yo, ŋulinyaramirriyu nhumanydja yurru gawaw'yun, bukumirriyama yukurra ŋarrakala, ga ŋarranydja yurru nhumalanha ŋämana, bala wekama buku-ruŋinyamaranharawuynha. 13Nhuma yurru ḻarruma ŋarraku warrya'yun, bala nhuma yurru maḻŋ'maramana ŋarranha, ŋunhi nhuma yurru yuwalktja walŋu yana malthun ŋarrakalaŋuwu romgu nhokalay bukmakthu yana ŋayaŋuyunydja. 14Yuwalk nhuma yurru maḻŋ'maramanydja yana ŋarranha, bala ŋarranydja yurru marrtji märra'-marramana nhumalanha birrka'mirriŋuru wäŋaŋurunydja malaŋuŋuru, ga gäma balayina ŋunhiwalayina wäŋalili roŋinyamaramana yurru. Ga dhuwalanydja dhäruk Garraywuŋu nhanukuŋuway.
15Nhumanydja ŋunhi guyaŋina yanapi ŋuriŋi dhäwu'-ḻakaranhamirriyu walalay ḻakaraŋala nhumalaŋgu yukurrana be Garraywuŋu dhäwu' ŋunhili Bapilundja, yurru bäyŋu warray. 16-18Dhuwala warray ŋunhi Garray dhäruktja gam': Marinydja yurru dhuwala bathala galŋu yana dhiyala Djurutjalamdja. Yolŋunydja walala yurru marrtji murrmurryun rerriyu ga marrya'yinyarayu ga mariyu ga dhika nhäyu malaŋuyu. Ga wiripu-guḻku'yunydja yurru nhäma ŋoy-wiḻaŋ'thunna, bala warku'yunna nhumalanha yurru. 19Yo, dhuwalayinydja yurru maḻŋ'thun bitjandhinydja, liŋgu yaka nhuma märraŋala Godkuŋu dhäruk, ŋunhi ŋayi ḻakaraŋala yukurrana ŋurikala nhanukalaŋuwala yuwalkŋuwala dhäwu'-gänharamirriwala; yakana nhuma ŋuli yukurranha mäkiri'-witjunanydja.
20Yo, Yitjuralwunydja Waŋarr Garray Godtja waŋana bitjarra, “Bukmak nhuma ŋunhi yolŋu walala, ŋunhi nhuma djaw'-djawyunapuyŋu walala dhuwali Bapilun wäŋaŋura, mäkiri'-witjurra dhiyaku dhärukku ŋarrakalaŋuwunydja. 21-23Yo, ŋarra marŋgi dhiyakiyinydja dhäwu'-gänharamirriwu walalaŋgu, ŋunhi walala ŋuli waŋa ŋarrakala be yäkuyu, yurru yuwalktja walala ŋuli ŋunhi bothirri warray ḻakaramanydja. Märr-yuwalk yana ŋarranydja yurru walalanha dhä-ḏir'yun, walala yurru burakirrinydja yukurra Buŋgawawuŋu Bapilunbuyŋuwuŋuna. Marŋgi ŋarra walalaŋgu yulŋunydja dhuwala; yakana walala yurru gundupuma winya'-winyayun dhä-ḏir'yunamiriwnydja walala yana.” Ga bitjarra ŋayi Garray waŋananydja.