Märryu-ŋupan Garraynha
63:1-11 (Longing for God)
1God Waŋarr, Waŋarr ŋarraku, 63 nhuŋuwaynha ŋarra yukurra warrya'yun dhika bukmakthunydja ŋayaŋuyu ŋarrakalay;
Nhuŋunydja ŋarra yukurra ḏukṯukthirri wirrkina dhika walŋu.
Ŋayaŋunydja ŋarra dhika yukurra baṉḏanydhirrina,
bitjan ŋuli wäŋa ŋula gapumiriw;
ŋayaŋu-ŋanhdharkthirrina ŋarra yukurra nhinanydja ŋuli nhuŋu.
2Ŋarranydja ḏukṯuk ŋarra yurru nhäma nhuna, Garray, dhiyali nhokala wäŋaŋura,
liŋgu nhenydja dhuwala ganydjarr-ḏumurru, ga ḻatju' walŋu dhika.
3Yo, manymaknha ŋunhi nhinanharawu, ŋarra yurru nhina walŋanydja,
yurru bulunydja walŋu ḻatju' nhokalana ŋarra ŋuli nhina märr-ŋamathinyaraŋura.
4Bala ŋarra nhuŋu wokthunna yukurra yurru,
bitjanna liŋgu weyinŋumirrina ŋarra yurru buku-wekamanydja nhuŋu,
yakana yurru ḏaḏawyun;
Goŋdja ŋarra yurru garrwarthirri yana, wokthunna yukurra nhuŋu bukumirriyamanydja manapan.
5Yo, ŋarrakala ŋayaŋuyunydja bitjanna liŋgu ŋuli yukurra ḻukana maranhukunharamirrina,
yurru ŋuriŋina bili nhokalay märr-ŋamathinyarayunydja ŋayaŋu-ḏaw'yun;
Manikaynha ŋarra yurru yukurra miyaman, goŋmirriyirrina dhika walŋu,
wokthunna yurru nhuŋu, Garray God.
6Wiripunydja ŋarra ŋuli ŋorra nhina, bira'yun ŋuli ya',
bala ŋarra ŋuli guyaŋirrina nhina,
märryu-ŋupan nhuna ŋuli munha-ŋupan.
7Liŋgu bitjanna liŋgu nhepiŋga yana ŋarraku ŋuli djäkanydja,
guŋga'yundja ŋuli ŋarranha;
Ŋoy-djulŋithirrina ŋarra ŋuli nhina nhokala djäkaŋura,
bitjanna bitjan ŋuli yothu wäyin ŋäṉḏi'mirriŋuwala binbarrŋura djuḻuḻ'yun nhina;
barkparkthunna ŋarra ŋuli manikay galŋa-djulŋithinyarayunydja.
8Ŋarra yukurra baṯ bitjanna mulkanydja nhuna,
ga nheŋga ŋarranha yukurra goŋdhu mulka baṯ bitjandja,
walŋakumanydja yukurra ŋarranha.
9-10Wiripu-guḻkuny'tja yolŋu'-yulŋu ŋuli ŋarraku yukurra ŋaramurryirri,
bunharawu walala ŋarraku ḏukṯuk;
Walalana yurru raku'-rakunydhirrinydja bunharaminyarayunydja,
bala yurru rumbalnydja walalanha ḻuka waṯuyuna wakinŋuyuna.
11Ga ŋarranydja yurru märr-yiŋgathirrina,
goŋmirriyirrina dhika walŋu Godkala.
Yo, Godkuna ŋunhi yolŋu walala yurru galŋa-ŋamathirrinydja,
liŋgu Godthunydja yurru dhäruk-mukmaramana ŋunhinydja bothinyaramirrinhanydja walalanha yolŋu'-yulŋunha.