gnnNTOTPO

Ŋanhdharkpuy dhäwu 3

Ḻakarama yukurra Lepaynha walalanha ga djäma walalaŋgu

3:1—4:33 (Telling about the Levites and their work)

1-10Yo, ŋayi Garrayyu djarr'yurruna Yärunnha ga nhanŋu gäthu'mirriŋunha walalanha ḏämbumiriwnha, walalana ŋunhiyina walala Godku ḏalkarra'mirrinydja walala, walalawuy yana ŋuriŋiyi ŋuli djäma ŋunhiyinydjayi rom ŋunhi walala ŋuli yolŋu'-yulŋu marrtjinya galkithinya gal'ŋu Gunhu'wala ŋuliwitjanayinydjayi romgurru. Ga wiripu-guḻkuny'tja ŋunhiyi Lepay miṯtji ga djämamirrina walala ŋurikiyina walalaŋgu ḏalkarra'mirriwuna; walalana ŋuli djäka yukurranha Godkalaŋunydja buṉbuwu, guŋga'yuna ŋunhiyi ḏalkarra'mirrinhanydja yolŋu'-yulŋunha, ga bukmaknha ŋunhi yolŋu'-yulŋunha.

11-13Bala ŋayi Garray waŋana Mawtjitjkala bitjarra, “Dhuwali Lepaynydja yolŋu'-yulŋu ŋarrakuwaynha walala yana. Ŋäthilinydja ŋunhinydja malamarrmirri ŋurru'-ŋurruŋu ḏarramuwurru dhawal-wuyaŋinyara ŋarrakuway yana ŋunhiyinydja, liŋgu ŋunhili ŋarra walalanha walŋakuŋalanydja, ŋulinyaramirriyu ŋunhi ŋarra marrtjina bumara bala Yetjippuyŋunha malamarrmirrinha yolŋu'-yulŋunha. Ga dhiyaŋunydja-wala Lepaynydja miṯtji ŋunhinydja yurru ŋarrakuwaynha, dharapulŋura ŋurikalana walalaŋgala malamarrmirriwalana birrka'mirriwala ŋurikala miṯtjiwala. Nhumanydja yurru walalanha miṯtjinha Lepaynhanydja barrkuwatjkumana ganaŋ'maramana ŋarrakuwaynha yana dhiyaŋunydja-wala. Ga bitjandhi yurru wäyindja malanha walalaŋgu Lepaywu ŋarrakuway yana.” Ga bitjarra ŋayi Garray waŋananydja.