gnnNTOTPO

YIPATJATJLILI DHÄRUK 1

1Dhuwalanydja djorra' ŋarrakuŋu Bolwuŋu ŋunhi ŋarranydja dhuwala bo'puyŋu Djesu-Christku, yurru Godthu Gunhu'yu ŋayipi ŋarranha nherraranydja dhiyakuyi djämawunydja, bala wukirrina ŋarra yukurra dhuwala dhäruktja nhumalaŋgu Godkalaŋumirriwu walalaŋgu yolŋu'-yulŋuwu ŋunhi nhuma yukurra nhina dhuwali Yipatjatj wäŋaŋura, ŋuriki walalaŋgu nhumalaŋgu ŋunhi nhuma märr-yuwalkthirri yukurra Djesu-Christnha, ga nhina yukurra yuwalk wal'ŋu yana nhanukalay romŋura.

2Ŋarra ŋäŋ'thun yukurra bukumirriyama nhumalaŋgu yulŋunydja, märr yurru Godthu ŋilimurruŋgala Bäpayu ga Garrayyu Djesu-Christthu gäma yukurra nhumalanha galkikuma yana nhanukalay ŋayi märr-ŋamathinyarayu, märr yurru nhumanydja nhina yukurra ŋayaŋu-yal'yunara waŋgany-manapanmirri Djesu-Christkalana.

Gunhu'yu ŋilimurruŋgu wekaŋala biyapulnha wal'ŋu manymak ŋuliwitjan Djesuwalaŋukurrunydja

3Gul' ŋilimurru buku-wurrpanna Godnhanydja wal'ŋu, ŋunhinhanydja ŋunhi ŋayi Bäpa'mirriŋu ŋilimurruŋgalaŋuwu Garraywu Djesu-Christku, liŋgu ŋilimurruŋgunydja ŋayi wekaŋala bukmak nhanŋuwaynydja ŋayi ŋunhi djiwarr'wuynydja nhä malanha ḻatjuny'tja, ga gämanydja ŋayi ŋilimurrunha yukurra ḻatju'kuma dhika wal'ŋu, ŋuriŋiyina ŋunhi ŋayi dhambay-manapara ŋitjalanhanydja Djesu-Christkalana yana. 4-5Ŋunhala ŋurruŋunydja be ŋäthili muka yana, ŋunhi yaka muka ŋayi Godthu djäma dhuwala wäŋa munathany'tja, ŋayi guyaŋinanydja yukurrana ŋilimurrunhawuy muka yana, bala ŋayi djarr'yurrunanydja ŋilimurrunha, nhuna ga ŋarranha ga ŋula yolnha; ŋayi djälnydja ŋitjalaŋgu, ŋali yurru nhanŋuway yana wal'ŋu yolŋu'-yulŋu, ganaŋ'thun yurru yätjŋurunydja, märr yurru ŋilimurru nhina ḏarrtjalknha yana ŋula nhämiriwnha nhanukalana gali'ŋura. Wirrki wal'ŋu yana Godtja ŋilimurruŋgu yukurra märr-ŋamathirri, bala gatjaḻnydja ŋayi nherrarana be ŋäthili muka yana, märr ŋilimurrunydja yurru nhanŋuwaynha yana yumurrku' wal'ŋu ŋuliwitjan Djesu-Christkalaŋukurruna, ŋuriŋina ŋunhi ŋayi yurru burakirri ŋilimurruŋgala dharapulŋura. Bitjarrayinydja ŋayi Godthu ŋayipinydja nherrara ŋurruthaŋala wal'ŋu yana, liŋgu ŋayipi ḏukṯukthina, ŋayipi waŋgany, 6märr yurru yolŋu'-yulŋunydja mirithirrina wal'ŋu wokthun nhanŋu, goŋmirriyirrina wal'ŋu dhikana. Yuwalk muka dhuwala Gunhuny'tja wokthunaramirri yana, ga ḻatju' ŋayi dhika wal'ŋu, liŋgu wekaŋalanydja ŋayi yänana nhanŋuway ŋayi Gäthu'mirriŋunhanydja marrkapthunaramirrinhanydja, märr yurru ŋilimurru nhina walŋana nhanukalaynha dhambay Djesuwalana.

7-8Yo, Godtja ŋunhi mel-wuyunaramirri ŋayi ŋilimurruŋgu, bala ŋayi djaw'yurrunana yänana ŋilimurrunha ŋuliŋuru miriŋuwalanydja goŋŋuru, ŋuliwitjarrana maŋgu'-waṉḏinyarayu Djesu-Christkalana, bala ŋayi buwayakkuŋalana yätjtja dhuwurr ŋilimurruŋgu liŋguna. Wirrki wal'ŋu yana ŋayi märr-ŋamathirrinydja yukurra ŋilimurruŋgu, bala ŋayi yänana rarryurrunanydja nhanŋuway nhä malanha ŋamakurruny'tja, bala walŋakuŋalana yänana ŋilimurrunha. 9Liŋgu muka ŋayi marŋgi-wekaŋala ŋilimurrunha, märr yurru ŋilimurru dharaŋanna nhäma ŋunhi dhukarrnydja, ŋunhi ŋayi nherrara be ŋäthili baman'. Ŋäthilinydja wal'ŋu ŋunhinydja ŋorrana yukurrana djuḻuḻ'maranhara, yaka muka yolŋunydja marŋgi ŋäthilinydja, yurru dhiyaŋunydja-wala ŋilimurru marŋgina, liŋgu ŋilimurruŋgala Godthu maḻŋ'maraŋala warraŋulkuŋalana, liŋgu ŋayi djäl ŋitjalaŋgu ŋali yurru marŋgiyirri ŋuriki ŋunhi ŋayipi yurru djäma yukurra ŋuruku bala. 10Ga dhuwala ŋunhi ŋayi nherraranydja gam', ŋayipi yana nherrara walunydja, ga ŋunhi yurru ŋayi walu ŋunhiyi bunanydja, ŋayi yurru Godthunydja ḻuŋ'marama marrtji bukmaknhana nhänha malaŋunha waŋgany-manapanmirrina, bukmak ŋunha djiwarr'wuy nhä malanha, ga bukmak nhä malanha dhiyakuy munatha'wuy, bukmakthirrina walala yurru dhambay-manapanmirrinydja marrtji waŋganylilina ŋuliyina Christkalana, ga ŋayipina yurru Garraynha Djesu-Christnha ŋurruŋunydja ŋurikiyi bukmakku.

11Yo, ŋunha ŋurruthaŋalanydja wal'ŋu Godthu djarr'yurruna ŋitjalanha, märr yurru ŋilimurrunydja nhanŋuwaynha wal'ŋu gupaḏalnha yurru, ga bukmak nhä ŋunhi Godthu nherrara yurru yuwalknha maḻŋ'thundja warraŋulthirrina rumbalthirrina, liŋgu bukmak ŋunhiyi yukurra marrtjinydja Godkalana yana djälkurrunydja. 12Ŋayi märraŋalanydja ŋilimurrunha ŋuliyina Djesu-Christkala, märr yurru yolŋu'-yulŋuyunydja nhämana Godku ḻatjuny'tja dhikanydja wal'ŋu ŋurikalana ŋilimurruŋgala ŋunhi ŋalinydja ŋurruŋumirri dhuwala dhukarr-nhänharamirri Garraywunydja bunanharawu. Bala walala yurru yukurra wokthunna nhanŋu bitjanna gam', “Gunhuny'tja ḻatju'na wal'ŋu ŋiniya dhuwala,” bitjanna.

13Ga nhumanydja liŋgu muka ŋäkulayi ŋunhi yuwalkŋu dhäwu', ŋunhiyinydja dhäwu' ŋunhi yukurra waŋa bitjan gam', “Godthunydja yurru nhuna walŋakuma ŋuliwitjan Djesuwalaŋukurrunydja,” bitjan, bala nhuma märr-nherraṉminana yana Christkalanydja. Ga ŋunhi nhe wekanhamina bitjarrayinydja Garraywala Christkala, bala ŋayi Gunhu'yu nherrarana nhanŋuwaynha Garrkuḻuknha wal'ŋu Birrimbirr ŋayaŋulilinydja nhokala, bitjarra yana liŋgu bitjarra ŋayi dhawu'mirriyaŋala ŋäthili, ga ŋunhiyinydja nhanŋuwaynha wal'ŋu ŋunha ŋayaŋuŋura nhokala bitjan yiŋarray'nha ŋunhiyi, ḻakaramanydja yukurra nhuna, ŋunhi nhenydja dhuwala nhanŋuway Godku yolŋu. 14Liŋgu ŋayinydja Godkunydja ŋunhiyi Walŋa ŋunha ŋayaŋuŋura nhokalana, ŋunhiyinydja ŋäthili yana, dhambay ŋuruku dhuḏiŋuwu, märr yurru nhe marŋgiyirri dharaŋan ŋunhi yalalanydja ŋayi yurru wekama bukmaknha nhuŋu, nhä ŋayi dhawu'mirriyaŋala ŋilimurruŋgu. Bala nhe yurru marrtjina-wala yana ŋuriŋi märr-yuwalkthinyarayunydja, yana liŋgu ga märrama nhe yurru bukmakkuma. Gul' ŋilimurru wirrkina wal'ŋu wokthundja nhanŋu, liŋgu yuwalk muka dhuwala Gunhuny'tja ḻatju' dhika wal'ŋu ŋiniya.

Bolwuŋu bukumirriyanhara Garraywalaŋumirriwu yolŋu'-yulŋuwu

15Yo, yuwalk ŋayi yurru Godthunydja rarryun ŋilimurruŋgu biyapulnydja wal'ŋu dhikanydja ḻatju' nhanŋuway, ga dhiyakuyina ŋayaŋuwu ŋarra ŋuli yukurra bukumirriyamanydja bitjan liŋgu nhumalaŋgu. Ŋarra ŋäkula warray nhumalanha yulŋunydja, ŋunhi nhuma yuwalkkuŋala märr-yuwalkthina Garraynha Djesunha ga yuwalkkuma nhuma yukurra märr-ŋamathirrinydja Godkalaŋunydja yolŋu'-yulŋuwu, bukmakku yana. 16Bitjan liŋgu ŋarra yukurra buku-wurrpandja Godnhanydja nhumalaŋgu, ga bitjan liŋgu bukumirriyama ŋarra yukurra nhumalaŋgu. 17Liŋgu Godtja maḻŋ'maranhamina warraŋulkunharamina ŋanyapinyay ŋayi ŋuliwitjarra ŋilimurruŋgalaŋuwala Garraywala Djesu-Christkala, ga ŋayinydja ŋunhi djarraṯawun'mirri ŋilimurruŋgu dhika wal'ŋu Bäpa'mirriŋunydja. Bala ŋarra yukurra bitjan liŋgu ŋäŋ'thundja ŋanya, märr yurru ŋayi wekama nhanŋuway Garrkuḻuk Birrimbirr nhumalaŋgala, märr nhumanydja yurru marŋgiyirri yuwalkkuma wal'ŋu, liŋgu ŋayinydja yurru ŋuriŋiyinydja maḻŋ'maramana Godnhanydja nhumalaŋgala, märr yurru nhuma yuwalk marŋgiyirri nhanŋu Godku. 18Ga bitjandhiyi bili ŋarra yukurra ŋäŋ'thundhi ŋanya, märr ŋayi yurru räkukuma nhumalanha ŋayaŋu nhanukalay ŋayi djarraṯawun'thu, märr nhuma yurru yuwalkkuma wal'ŋu nhämanydja dharaŋan nhäku ŋayi nhumalaŋgu wäthurruna nhanŋuwayliliyaŋalanydja, ga nhä ŋayi yukurra ŋayathama ŋunha djiwarr'ŋura nhumalaŋgu, ŋunhiyinydja nhä mala ŋamakurru' ŋunhi nhäku nhuma yukurra dhukarr-nhäma gatjpu'yun märranharawu. Yuwalk yana nhuma yurru nhanukalayŋumirrinydja wal'ŋu yolŋu'-yulŋu nhina yukurra rrambaŋina, galkina nhanukalanydja ŋunhala djarraṯawun'ŋuranydja, ga ŋunhiyinydja bitjan nhumanydja nhanŋuwaynha yanana wal'ŋu dhulŋuŋuna. 19-20Yo, ŋayinydja biyapul wal'ŋu ganydjarr-ḏumurru dhika wal'ŋu, ga ganydjarrnydja nhanŋu bena wal'ŋu ŋanyana, biyapulnha wal'ŋu ŋunha bala garrwar ŋurikalanydja be ganydjarr ḏilkurruwurruŋgalanydja. Ga ŋarranydja ḏukṯuk nhuma yurru marŋgithirriyi, ŋunhi ŋayi yukurra Godthu djämana ŋilimurruŋgalanydja dhuwala märr-yuwalkthinyaramirriwala walalaŋgala, ŋuriŋiyi liŋgu ganydjarryunydja ŋunhi ŋayi ŋuriŋinydja ganydjarryu gaŋgathinyamirriyaŋala walŋakuŋala Christnha beŋuru ŋunhi rakunyŋuru, bala roŋinyamaraŋalana märraŋala djiwarr'lilina, bala ŋunhalanydja ŋanya nherraranydja nhanukalaynha ŋayi gali'lili wapmaraŋala; ga ŋunhana ŋayi nhinanydja yukurra ŋurruŋuna wal'ŋu yana. 21Yo, Djesunydja dhuwala biyapul wal'ŋu ŋurruŋu ŋayinydja, be-wala wal'ŋu birr ŋurikala wiripu-guḻku'walanydja be ganydjarr-ḏilkurruwala walalaŋgala. Ŋayinydja ŋunhi biyapul wal'ŋu ŋurruŋu ŋurikalanydja buŋgawamirriwalanydja wal'ŋu dhiyakuy munatha'wuywala, ga biyapul ŋayi waŋarr wal'ŋu, djuḻkmarama yukurra Djesuyu be ganydjarr-ḏumurrunhanydja mokuynhanydja walalanha ga waŋarrnha be wal'ŋu, ga ŋula nhänha malaŋunha ŋunhi walala nhina yukurra ŋurruŋu wal'ŋu be ŋula nhäku. Yo, ŋayinydja ŋunhi yäku biyapul wal'ŋu yana ŋurikala wiripu-guḻku'walanydja yäkuwala walalaŋgala, bala yurru bukmak nhä malanha ŋunhi yäkumirri nyilŋ'thunna nhanukalaynha Djesuwalana yana, dhiyaŋu-wala dhiyala munatha'ŋuranydja wäŋaŋura, ga bitjandhi yurru ŋunha yuṯaŋuranydja wäŋaŋura ŋunhi yurru yalala maḻŋ'thun. 22Liŋgu Godthunydja Gunhu'yu nherrara bukmak nhänydja malanha ŋunha ḻukulili ŋoylilina wal'ŋu nhanukala Djesuwala, ga nhinanydja ŋayi yukurra ŋunha ŋurruŋuna wal'ŋu, bitjan' muḻkurrnha ŋayi bukmakku, märr yurru ŋilimurrunydja Godkunydja ŋunhi yolŋu'-yulŋu nhina yukurra ŋurru'-ŋurruŋuna wal'ŋu nhäku malaŋuwu bukmakkuna dhambay Djesu-Christkalana yana.

23Liŋgu Godkunydja miṯtji yolŋu walala dhuwala balanyarana bitjan rumbalnha nhanŋuwaynha Christkuna, ga Djesu-Christtja ŋunhi, balanyara ŋayipinydja bitjan muḻkurrnha ŋurikiyi rumbalwu. Ŋayipinydja ŋunhi Djesu-Christtja bawala'mirriŋura warray, ga ŋayinydja ŋunhi dhapirrk yäna ŋula nhämiriw. Yurru yakana yurru ŋayi muḻkurryunydja rumbalmiriwyunydja djäma yukurra ŋula nhä, bala ŋilimurrunydja nhanukala yurru rumbalyunydja ŋanyana dhawar'marama; liŋgu rumbal-manapanarayuna yurru yana ŋayi Garrayyu djäma yukurra dhiyala munatha'ŋuranydja, ŋilimurruŋgalana goŋgurru yana, ga dhärukkurru ŋula nhäkurru.