gnnNTOTPO

Amos 8

Yolŋu Garraywunydja yukurra yakana ḏukṯukthirri malthunarawu Godkalaŋunydja dhärukku

8:1-14 (Israel didn't really want to follow God's word)

1Yo, dhäŋuru ŋuliŋurunydja ŋayi Garrayyu Godthu milkuŋala ŋarrakala ga wiripuna mali, ŋarra nhäŋala bathimirri borum dhaŋaŋ dhika ŋanya. 2Bala ŋayi Garrayyu ŋarranha dhä-wirrka'yurruna bitjarra, “Wäy Waymutj, nhä nhe nhämanydja yukurra?” bitjarra. Ga ŋarranydja buku-wakmaraŋala waŋana balanydja bitjarra, “Borum ŋarra dhuwala nhämanydja yukurra bathimirri, yurru balwurnha warrpam'nha.”

Ga ŋayinydja waŋana Garraynydja bitjarra, “Yo, ŋarrakunydja dhuwala yolŋu'-yulŋu Yitjuralpuyŋunydja balanyarayinayi bitjan balwurnha borum, girri'-ŋamathirri yukurra dhä-dir'yunarawuna. Yakana ŋarra yurru biyapulnydja djambi ŋarrakuway ŋarra ḻiya, ga walŋakumanydja walalanha yurru; yanana ŋarra yurru dhä-ḏir'yundja walalanha wirrkina walŋu yanana. 3Dhiyaŋunydja-wala dhuwalanydja ŋarraku yolŋunydja walala yukurra miyaman manikaynha, buku-ŋal'yun yukurra bitjan galŋa-djulŋithirrina, yurru yalalaŋumirriyunydja walala yukurra yurru galŋa-yätjthirrina, warwuyunmirrina dhikana ŋäthinyamirrina, liŋgu birrka'mirriŋura wäŋaŋuranydja malaŋumi yurru marrtji yolŋu walala ŋorra rakunymirrinydja. Yolŋuyu walalay yurru ŋurrkamana yana rumbalnydja gayulnha yanana dhärukmiriwnha, ga yakana yurru ŋula yolthu walalanha marrtji dhalkaramanydja.

4“Ŋäka walala, nhuma ŋunhi ŋurru'-ŋurruŋu yolŋu walala ŋaḻapaḻmirri galŋu. Nhumanydja dhuwalanydja yätjmirrina galŋu yanana mirithirrina. Wiripunydja nhuma ŋuli djaw'-djawyun ŋulaŋuru yolŋu'-yulŋuwala ŋurruwuykmirriwala, bala nhuma ŋuli marrtji muŋdhu'-muŋdhunna ganydjarrmiriwyamana ŋunhi yolŋunha walalanha goŋmiriwŋuranydja. 5Wiripunydja nhuma ŋuli waŋa bitjan, ‘Ye-e-e, nhätha yurru dhuwala walu dhulŋuŋunydja buku-ŋal'yunarawu dhawar'yun. Ŋarranydja ḏukṯuk ŋarra yurru märrama rrupiya muka dhiyakuy ŋathawuy muka, liŋgu rrupiyawu ŋarranydja dhuwala ḏukṯuk waŋganygu galŋu.’ Yo, bitjan warray liŋgu nhe ŋuli yukurra baḏuwaḏuyun bitjan mayali'-wilkthun warray yolŋu'-yulŋunha, yana nhunapinyay nhe ŋuli ḻukunydjakunhamirri. 6Wiripunydja nhe ŋuli gombuma mirithirri guḻku' rrupiya malanha ŋunha ŋurruwuyknha yolŋunha ŋurikiynha ŋathawuy be nhäpuynha, ḏulki'wuynha ŋathawuy. Ga ŋunhi ŋayi mak rrupiyamiriwnydja yolŋu, yakana ŋayi yukurra ŋayathama rrupiya ŋula nhäku bäyimgu, bala dhunupana nhenydja yurru ŋanyapinyaynha rumbalnha ŋunhi djaw'yun, bala ŋayi yurru bitjanna bitjan ŋayi nhuŋu djämamirrina ŋunhi yolŋu.”

7Bala ŋayi Garrayyunydja ŋuriŋi Yitjuralwalanydja Godthu nherrara dhuwalana dhäruktja gam', “Yakana ŋarranydja yurru meṉguma ŋunhiyi yätjtja mirithirrinydja ŋunhi nhuma djäma yukurrana; yuwalknha yana walŋu ŋarranydja yurru nhumalanha dhä-ḏir'yunna-wala. 8Dhuwala munathany'tja wäŋa yurru marrmarryunna walŋu mirithirrina, ga yolŋunydja walala yurru dhiyalaŋumiyinydjayi wäŋaŋura mirithirrina barrarirrinydja walŋu. Yana ŋayi yurru dhuwala munatha' wäŋa gaŋgathirri, ga rurr'-rurryunna yukurra yurru, ga biyapul ŋayi yurru nyilŋ'thundhi, bitjanna bitjan ŋunhi gapu mayaŋŋura ŋuli dhawaṯthun ŋurruthirri, ga biyapul ŋayi ŋuli nyilŋ'thundhi. 9Yo, ŋuriŋiyi dhä-yawar'yunarayunydja waluyu, walunydja ŋunhinydja ḏämbuyunydja waluyu bitjan buku-munha'yirrina yurru; ga walupuynydja yurru ŋunhinydja walŋu dhuwala munathany'tja wäŋa buku-munha'yuna warrpam'nha monyguma. Bitjarrayi ŋarrapinydja Garrayyunydja nherrara. 10Dhiyaŋunydja-wala nhuma yukurra ḻuŋ'maranhamirri, waŋgany-manapanmirri dhika galŋa-djulŋithirri miyamanarawu manikaywu dhika nhäku malanyŋuwu, yurru ŋuriŋiyinydjayi waluyu nhuma yurru waŋgany-manapanmirri ḻuŋ'maranhamirri marrtji ŋäthinyaminyarawuna ŋuriŋina ŋayaŋu-yätjthinyaramirriyuna romdhu, galŋa-yätjthinyaramirriyuna warwuyuna ŋuriŋina. Ŋäthina nhe yurru wirrkina walŋu dhikana dhiyakunydja wäŋawu; bitjanna nhe yurru ŋäthi bitjan ŋuli dhäyka ŋäthi nhanukalayŋuwu waŋganygu ŋuriki waku'mirriŋuwu. Yuwalk yana nhe yurru yulŋunydja mirithirri yana walŋu galŋa-yätjthirrinydja ŋuriŋiyinydjayi waluyu.”

11Yo, Garraynydja waŋa yukurra bitjan, “Ŋulinyaramirriyunydjayi waluyu, ŋarranydja yurru yukurra ŋayathamana mukthunna, gulmaramana ŋarra yurru waltjaṉnhanydja, bala yurru yolŋunydja walala ŋanhdharkthirrina wirrkina walŋu, ḻarruma yurru gapuwunydja, ga bitjandhi liŋgu walala yurru marrya'yirrina dhikana walŋu nhina yukurra, wirrkina walŋu yurru ŋayaŋu-nhäma marrya'yirrina manapan ŋathawuna. Yurru yaka walala yukurra yuwalktja ḏukṯukthirri dhiyaku munatha'wuywunydja ŋathawu ga gapuwu; walalanydja ŋunhi yukurra yurru marrya'yirrinydja ga ŋanhdharkthirrinydja yuwalktja galŋu ŋurikina Garraywalaŋuwuna dhärukku, märr yurru walala yaka dhä-ḏir'yunara märrama Garraywuŋunydja. 12Yo, yolŋunydja walala yurru marrtjinydja yukurra birrka'mirriŋuru dhika wäŋaŋurunydja malaŋuru, ḻarruma marrtji yurru warrya'yunna bitjanna Godkalaŋuwu dhärukkunydja, dhipuŋuru bäyma ga beŋuru barrkuŋuru. Walala yurru waṉḏirri ŋunha bala, ga bitjan bala, ḻarruma yurru warrya'yunna bitjanna ŋänharawu ŋuriki Godkalaŋuwunydja dhärukku. Yurru yakana walala yurru maḻŋ'maramanydja ŋunhi, liŋgu yuwalktja walala yukurra ŋunhi barrarirrinydja dhä-ḏir'yunarawuna; yaka walala ŋunhi yuwalktja galŋu Godkalaŋuwunydja dhärukku ḏukṯuk malthunarawu.” Ga bitjarra ŋayi Garray waŋananydja.

13“Yo, ŋulinyaramirriyunydjayi waluyu yuḏayuḏana dhäykawurru ga ḏarramuwurru yurru marrtji ganydjarr-winya'yunna, buku-wirwiryunna ŋuriŋiyi ŋanhdharkthinyarayuna. 14Yo, ŋunha Djamariyanydja walala yukurra buku-ŋal'yunna wiripuŋuwuna dhikana waŋarrwu, ŋuriki goŋbuywuna djämawuywu buliki'wu ga ŋula nhäku malaŋuwu, yaka warray walala buku-ŋal'yun yukurra yuwalkŋuwunydja galŋu Godku, bala walala yurru yana galkirrina marrtji, ga yakana yurru ŋuliŋuruyi gaŋgathirri biyapulnydja.” Bitjarra ŋayi Garray waŋananydja.