gnnNTOTPO

PSALMS 42

Godku ŋarŋaryun

42:1-5 (Thirsting for God)

1Gunhu' Waŋarr. Ŋarra yukurra dhuwala ŋanhdharkthirrina;

Ŋarranydja nhuŋu ḏukṯukthirri yukurra wirrkina,

bitjan ŋuli wäyin ḏukṯukthirri gapuwu, wirrkina ŋarŋaryun.

2Ŋarraku ŋayaŋunydja yukurra ŋanhdharkthirrina, baṉḏanynha.

Nhepina dhuwala walŋa-ḏikṯiktja waŋarr,

nhuŋunydja ŋarra yukurra ḏukṯukthirri wirrkina.

Nhäthana ŋarra yurru balanydja marrtji?

Wirrki yana ŋarra ḏukṯukthirri yukurra nhänharawu bukuwunydja nhuŋu,

ga buku-ŋal'yunarawunydja nhuŋu yana.

3Bitjanna liŋguna ŋarra ŋuli ŋäthinydja marrtji, munha-ŋupan ga walu-ŋupan,

liŋgu bitjanna liŋgu walala ŋuli miriŋuyunydja waŋa marrtji ŋarranha,

“Wanhaka be nhuŋu Waŋarrnydja?” bitjanna ŋuli.

4Roŋiyirri ŋarra ŋuli guyaŋirri ŋurikiy ŋäthiliŋuwuy,

bala ŋarraku ŋuli ŋayaŋunydja yätjthirrina.

Yo, marrtjinya ŋarra ŋuli Buṉbulili Dhuyulili, rrambaŋi wiripu-guḻku'wala miṯtjiwala;

marrtjinya ŋarra ŋuli, ŋurru-warryuna yolŋunha miṯtjinha;

Rrambaŋi ŋanapurru ŋuli marrtjinya Godkalanydja Buṉbulili,

bala ŋanapurru ŋuli miyamana manikay, märr-yiŋgathinya rrambaŋi,

wokthuna ŋuli yukurranha Garraywu.

5Nhäku ŋarra yukurra dhuwala galŋa-yätjthirrinydja?

Nhäku ŋarra warwuyundja yukurra?

Ŋarra yurru yana märr-nherraṉmirri Garraywalana,

gatjpu'yun yukurra galkunna nhanŋu;

Ŋarra yurru biyapul wokthun yukurra Garraywunydja,

bili ŋayi ŋarraku Walŋakunharamirrinydja ga Waŋarr Godtja,

nhanukalaynha yana ŋarra yurru ŋayaŋu-nherraṉmirrinydja.