gnnNTOTPO

YIPURUWU MALAWU DHÄRUK 3

Djesunydja dhuwala biyapul wal'ŋu ŋayinydja Mawtjitjkala

1Yo gutha walala, nhumanydja dhuwala yolŋu'-yulŋu ŋunhi nhumalanha ŋayi Godthu ganaŋ'thunmaraŋala nhanŋuwayliliyaŋalana ŋayi. Ŋilimurrunydja dhuwala dhulŋuŋu nhanŋu Godku, liŋgu Godtja ŋilimurruŋgu wäthurruna, märr yurru ŋilimurru yukurra ŋunhalanydja nhina nhanukalana wäŋaŋura, galkina yana.

Guyaŋiya wirrki wal'ŋu ŋanya Djesunha, ŋunhinha ŋunhi ŋilimurru ŋuli yukurra ḻakarama ŋanya bo'puyŋu Godku bitjan, ga bitjandhiyi liŋgu ŋilimurru ŋuli yäku-ḻakarama ŋanya Ḻiya-ŋärra'mirri yolŋu, bitjan. 2Yo, Godthunydja ŋunhi ŋayipinydja nherrara ŋanya Djesunha ŋurikiyi djämawu, ga djämanydja ŋayi ŋunhiyi ŋuli yukurra yuwalkkuma yana wal'ŋu dhika, bitjan yana liŋgu bitjarra ŋayi Mawtjitjthu djäma yukurrana ŋamathaŋala nhanŋuway ŋunhi djäma, yuwalkkuŋala yana ŋayi djäma yukurrana Godkalaŋuwalanydja yolŋu'-yulŋuwala. 3Ga wokthun warray ŋilimurru ŋuli nhanŋu Mawtjitjku yulŋunydja, yurru biyapulnydja wal'ŋu ŋilimurru yurru wokthun nhanŋu Djesuwuna. Ŋunhi ŋayi ŋuli yolŋuyu dhuḻ'yun buṉbu ḻatju' dhika wal'ŋu, yakana ŋali yurru wokthun ŋurikiyi buṉbuwunydja, yana ŋali yurru wokthundja ŋuriki djäma-waṯaŋuwuna, buṉbu-dhuḻ'yunaramirriwuna ŋurikina, ga Godkunydja dhuwala miṯtji balanyara bitjan buṉbu Djesuwuŋu dhuḻ'yunara. 4Liŋgu bawala'mirri buṉbu malanha dhuḻ'yunara ŋunhi ŋula yolŋuwuŋu warray yana, yurru bukmaktja dhuwalanydja nhä malanha djämawuy nhanukuŋuwuy Godkuŋuna yana. 5Yo, ŋayi ŋuli Mawtjitjtja djäka yukurranha Godkalaŋunydja miṯtjiwu yuwalkkunha yana, yurru ŋayinydja ŋunhi Godku djämamirri warray yana, ŋayi ŋuli ŋunhi ḻakaranha yana dhunupamirriyanha yukurranha ŋunha bala nhä malanha ŋunhi ŋayi yurru Godthu ḻakarama yalala. 6Ga Djesu-Christthunydja ŋayipinydja djäma yukurrana yuwalkkuŋala dhika wal'ŋu yana, liŋgu ŋayinydja ŋunhi Gäthu'mirriŋuna wal'ŋu nhanŋu Godku, ga buṉbunydja ŋunhiyi Godkunydja miṯtji nhanukuŋuway yana djämawuy. Ga ŋilimurrunydja dhuwala Godku ŋunhi buṉbu, ŋunhi ŋali yurru yukurra marrtjinydja-wala yana märr-yuwalkthirri mukthundja, ŋoy-warrinyamiriwnydja-wala, dhukarr-nhäma yukurra ŋurikiyinydja bili waŋganygunydja ŋunhi ŋayi yurru Godthu yalala warraŋulkuma maḻŋ'thunmaramana ŋilimurruŋgu.

Yolŋu walala Godkunydja ŋayaŋuna nhina yukurra yurru

7Yo, ŋilimurrunydja dhuwala nhanŋu Godku yolŋu walala, bala ŋilimurru yurru märrama nhanŋuway ŋunhi dhäruktja yana, liŋgu Garrkuḻukthunydja wal'ŋu Walŋayu yukurra ḻakarama bitjan,

“Ŋunhi nhuna yurru Godthu waŋa gäthuranydja,

dhäruktja yana ŋanya märraŋa;

8yaka ŋayaŋu-ḏälthiya biyakanydja, bitjarra nhuma ŋäthili Godku mäkiri'-yarryurruna,

ŋulinyaramirriyu ŋunhi nhuma gatjarr'yurruna ŋanya yukurrana ŋunhala ŋanhdarkŋura wäŋaŋura.

9Yo, wirrki yana nhumalaŋgala märi'muyunydja walalay ŋarranha gatjarr'yurruna yukurrana, bitjarrana liŋguna,

yana lingu-u-u ga 40 dhuŋgarra ŋupara,” bitjarra ŋayi God waŋana.

“Weyinnha walala yukurrana nhäŋala ŋarrakuŋu djämawuynydja,

ŋunhi ŋarra yukurrana walalanha mirithina wal'ŋu ŋamathaŋala gäŋala,

yurru walalanydja bitjarrayi warray liŋgu yukurrana ŋarranha gatjarr'yurruna.

10Ga ŋurikina ŋunhi ŋarranydja ŋayaŋuna ŋunha ŋaramurrthina wal'ŋu walalaŋgu,

bala ŋarra waŋana bitjarrana,

‘Bitjanna liŋguna walala yukurra ŋunha gatjpal'yunna ga ŋapana-wekama ŋarrakunydja,

yaka warray walala ŋarranha dhäruktja yukurra märrama.

Yakana yana walala ḏukṯukthirri yukurra ŋarrakalaŋuwunydja dhukarrwu malthunarawu.’

11Yo, wirrkina yana ŋarra maḏakarritjthinanydja walalaŋgu,

bala ŋarranydja ŋapayi-wekaŋala walalaŋgunydja.

Bala ŋarra dhäruktja nherrara dhuwalana gam',

‘Dhuwalanydja walala yolŋu'-yulŋu yurru yakana nhina yukurra ŋayaŋu-yal'yunaraŋuranydja,

Yakana walala yurru yana ŋayaŋu yukurra nhina ŋarrakalanydja galki.’”

12Yo, nhuma Garraywalaŋumirri yolŋu walala, gutha walala ŋarraku, marrtjiya mukthurra märr-yuwalkthiya yana, dhäruk-märranhamirriyu yana, märr yurru nhe yaka bitjandhiyi ŋayaŋu-yätjthirrinydja, liŋgu ŋuriŋiyinydja yurru nhumalanha gatjpaḻ'maramana ŋulaŋurunydja ŋunhi Godkala walŋa-ḏikṯikkalanydja wal'ŋu. 13Biyaka liŋgu walu-ŋuparra guŋga'yunmiyanydja waŋanharamiya, biyakanydja marrparaŋ'kunhamiyanydja nhumalanhay nhuma, märr yurru nhumalanha yakana ŋula mayali'-wilkthun yätjthunydja, märr yurru nhe yakana ŋayaŋu-ḏälthirrinydja, bala mäkiri'-yarryundja Godku. Liŋgu galkina nhuŋu dhuḏitjnha ŋunhinydja. 14Yo, ŋunhi ŋali yurru ŋayathama baṯ bitjandja yukurra yurru, yana liŋgu-u-u ga dhä-yawar'yunaraŋurana, yuwalk yana ŋalinydja yurru nhina yukurra waŋganyŋurana nhanukalana galkina, dhambay Djesuwalana. 15Liŋgu dharuktja dhuwalayi yukurra dhärra yana,

“Ŋunhi nhuna yurru Godthu waŋa gäthuranydja, dhäruktja yana ŋanya märraŋa;

yaka ŋayaŋunydja-ḏälthiya biyakanydja, bitjarra nhuma ŋäthili Godku mäkiri'-yarryurruna.”

16Liŋgu ŋäthilinydja baman'tja ŋilimurruŋgala märi'muyu walalay ŋäkula Godnha rirrakay, bala mäkiri'-yarryurruna ŋuyulkthinana, ŋuriŋinydja yolŋu'-yulŋuyu ŋunhi walala gonha'yurruna Yetjip, ŋulinyaramirriyu ŋunhi ŋayi Mawtjitjthu walalanha yukurrana gäŋala ŋurru-warryurruna ŋuliŋuruyi garrpiṉminyaraŋurunydja romŋuru ŋunhi. Walala ŋäkula warray Godnha rirrakaynydja, bala yana mäkiri'-yarryurrunana, yakana walala ŋanya dhäruk märraŋala. 17Yana walala yukurrana ŋunhili liŋgu nhinana yätjŋura, ga yätjnha djäma bitjarra liŋgu weyinŋumirrina, 40-na dhuŋgarra ŋupara. Bala Godtja maḏakarritjthinana ŋurikiyinydja yolŋu'-yulŋuwu, bala walala murrmurryurrunana ŋunhilinayi ŋanhdharkŋurana wäŋaŋura. 18Liŋgu ŋayi Godthu dhäruktja nherrara bitjarra, “Yakana walala yurru yana gulŋiyirrinydja, ga ŋayaŋunydja nhina yukurra ŋunhalayinydja yakana,” yurru waŋananydja ŋayi yukurrana ŋunhi ŋunhinha walalanha ŋunhi walala yaka ŋanya dhäruk märraŋala. 19Bala ŋali yukurra dharaŋanna dhuwala, ŋunhi ŋunhiyinydja walala yolŋu'-yulŋu yakana gulŋiyina ŋunhimalayinydja wäŋalili ŋunhi ŋayi Godthu dhawu'-nherrara ŋunhiyi walalaŋgu; yakana yana walala ŋunhi gulŋiyinanydja, liŋgu yakana walala märr-yuwalkthina ga märr-nherraṉmina Godkala.