gnnNTOTPO

Isaiah 42

Ḻakarama yukurra Garraywalaŋuwuy Djämamirriwalaŋuwuy

42:1-9 (The Lord's Servant)

1Yo, Garraynydja waŋa yukurra bitjan, “Dhuwalana gay' ŋarraku djämamirrinydja yolŋu, ŋarrakuŋuwaynydja djarr'yunara,

ga ŋarranydja yukurra nhanukala wirrki yana ŋayaŋu-djulŋithirrinydja.

Ŋarrapi ŋanyanydja yukurra gäma ŋarrakalay ŋarra goŋdhu,

ga ŋarrakuway Walŋa Birrimbirr ŋarra nherraranydja nhanukala,

ga ŋayina yurru gäma yolŋu'-yulŋunhanydja birrka'mirrinha, miṯtjinha ga miṯtjinha rom-waŋganydhirri yana.

2Yo, ŋayipi yurru waŋanydja marrtji gurrum'thun yana,

yakana ŋayi yurru ŋunhi benydja galŋu rirrakay bathalayunydja waŋa marrtji ŋuliwitjan dhukarrkurrunydja.

3Ŋunhi yurru ŋayi ŋula yol yalŋgi'yirrinydja, bitjandja bitjan guḻwaṉi gupa-nyaḻyunara,

yakana ŋayi yurru ŋunhiyi ḏaw'yundja,

ga yakana ŋayi yurru ŋultjikuma yolŋunha, ŋunhinhanydja ŋunhi ŋayi yurru galki yaŋara-yawar'yun.

4Yaka ŋayi yurru ŋunhiyi djämamirri yolŋu märr-yawaryundja,

yakana ŋanya yurru ŋula yolthu ḏaḏawmaramanydja gulmaramanydja,

yana liŋgu-u-u ga dhuwala wäŋa munatha' yurru dhärra rom-waŋganydhirri yana,

ga birrka'mirriyu yolŋuyu walalay märramanydja yukurra yurru ŋulaŋuru nhanukuŋu nhäyinyara dhunupa.

Liŋgu birrka'mirriŋura yolŋunydja walala galkunna yukurra ŋurikiyi nhanukalaŋuwu ŋamakurru'wunydja romgu.”

5Yo, Godthu djäma ŋunha djiwarr' ga dhuwala munatha' ga bukmak nhä malanha ŋunhilimi, ga djämayi ŋayi yolŋu'-yulŋunhanydja, bala yana walala walŋathinana ŋuriŋinayi nhanukala walŋayuna ŋir'yunarayu. Ga ŋayinydja Garraynydja waŋa ŋuli yukurra nhanukalaŋuwala ŋurikala djämamirriwalanydja bitjan,

6“Ŋarra wäthurruna nhuŋu, märr yurru ŋarrakunydja ŋunhinydja rom-dhunupanydja baḻaka'yunna birrka'mirrikurruna wäŋakurru monyguma yurru.

Ŋarranydja yukurra mulka nhuna goŋdja,

ga nhenydja dhuwala balanyarana bitjan nhe dhawu'-nherraṉarawuynha ŋuruku yolŋu'-yulŋuwuna,

ga balanyara liŋgu nhe djarraṯawun'thi bukmakku wäŋawu.

7Nhe yurru maŋutjimirriyama bambaynhanydja,

ga dhawaṯmaramayi nhe yurru ŋunhinydja yolŋunha ŋunhi ŋayi yukurra nhina garrpiṉara ŋula nhäkuŋu buku-munhaŋura.

8Ŋarranydja dhuwala ŋarrapi waŋgany Waŋarr Godtja.

Yaka yana nhuma yurru wokthun ga ḻatju'-ḻakarama ŋula yolnha wiripuŋunhanydja waŋarrnha,

ga yaka yana märr-ŋal'yurra ŋula nhälilinydja maḏayin'lilinydja malaŋulili,

yanapi ŋayinydja ŋunhiyinydja rrambaŋina ŋilinyuna maṉḏa.

9Yo, ŋäthilinydja ŋarra liŋgu ḻakaraŋala nhumalaŋgu,

bala yuwalkthi maḻŋ'thunarana dhuwala yulŋunydja.

Ga dhiyaŋunydja-wala ŋarra yukurra ḻakarama yuṯawuynha galŋu nhäwuy malaŋuwuy, yurruna yurru ŋunhiyi maḻŋ'thundja.” Bitjarrana ŋayi yukurrana Garray waŋananydja.

Wokthunara Manikaykurru

42:10-17 (A song of praise)

10Yo, miyamala yuṯana manikay Garraywalanydja,

biyaka wokthurrana walŋu nhanŋu bukmak yana bäpurru' buku-ḻiw'marama.

Wokthurra bukmak nhanŋu nhuma, ŋunhi nhuma yukurra nhina gapuŋura moṉukŋura,

ga nhuma yolŋu walala ŋunhi nhuma yukurra nhina runu'-runuŋura be-wala barrku walŋu,

biyakayi liŋgu wokthurrayi nhanŋu Garraywu manikayyu miyamanarayu.

11Wokthurrayi nhumanydja ŋanhdharkŋuranydja wäŋaŋura ḏiltjiŋuranydja,

ga ŋunhiliyi yolŋumirriŋuranydja wäŋaŋura biyakayi liŋgu yana.

Biyaka yatjurra walŋu märr-yiŋgathiyanydja beŋuru bukuŋuru wäŋaŋuru,

12ga ŋunhi nhuma yukurra barrku be-wala nhina, biyakayi wokthurrayi nhanŋu Garraywu,

ḻakaraŋa ŋanya biyaka ŋunhi ŋayinydja ḻatju' dhika walŋu.

13Liŋgu Garraynydja dhuwalana marrtji yukurra lili,

ŋayinydja biyapul warray walŋu ḏäl ga wuṉḏaŋarr warray,

ga ŋoynha ŋayi yukurra dhärra nhanukalay ŋayi ŋaramurryunydja ŋuriki yätjkunydja.

Ga waŋanydja ŋayi yukurra bitjanna, Gaya'-gayaw bitjanna ŋayi yukurra;

yuwalk yana ŋayi yurru baḏuwaḏuyunna ŋunhi yätjmirrinhanydja birrimbirrnha.

14Bitjanna ŋayi yukurra Garray waŋanydja gam',

“Märr-weyinŋumirrina ŋarra yukurrana nhinana mukthurrunanydja galkurrunanydja,

ŋarra bitjarra ŋarranhay ŋarra yarrkmaranhaminana,

bala dhiyaŋunydja-wala ŋarra yukurra yatjunna, gawaw'yunna ŋarra yukurra,

bitjanna bitjan ŋuli dhäyka ŋurrŋurryun rerriyu ŋuriŋi yothuwala dhawal-wuyaŋinyarayu,

liŋgu dhuwalana galkina walunydja.

15Yo, yuwalk yana ŋarra yurru djäma dhiyaŋu-wala,

baḏuwaḏuyunna yurru ŋunhiyi miriŋunhanydja walalanha,

ga dhuwala munathany'tja wäŋa yurru wiripuŋuyirrina mulkuruyirrina,

yakana yurru märr-weyin yukurra djingaryun baḏuwaḏuyunara ŋurikiŋi yätjkuŋunydja.

16“Yo, ŋarra yurru goŋ-gulama ŋunhi bambaynhanydja yolŋunha ŋuliwitjan ḻatju'kurruna dhikana yuṯakurruna dhukarrkurru,

ŋunhi walala yaka marŋgi ŋäthili ŋurikiyi dhukarrwu.

Ŋarrakunydja yolŋu walala yukurrana marrtjina buku-munha'kurru yana,

yurru dhiyaŋunydja-wala ŋarra yurru räkukumana dhukarrnydja marrtjinyarawuna walalaŋgu,

ga ŋunhinydja dhukarr ŋarra yurru bitjanna buyuwuyu'kumana walŋu ḻatju'kumana,

märr yurru walala yukurra marrtji ḻatju'kumana dhikana walŋu, ga yakana galkirri.

Yuwalk dhuwala yulŋunydja dhawuny'tja ŋarra nherrara,

ga yuwalk yurru yana dhuwalayi maḻŋ'thundja,

yaka yana ŋarra yurru ganan ŋarrakuwaynydja yolŋu'-yulŋunha.

17Ŋunhinydja walala yolŋu'-yulŋu ŋunhi walala yukurra märr-nherraṉmirri ŋunhi maḏayin'ku nhäku malanyŋuwu,

ga waŋarr ḻakarama yukurra goŋbuy ŋunhi djämawuy,

ŋuli'-ŋulinyaranydja yolŋu walala yurru goramirriyirrina wirrkina,

liŋgu ŋarranydja yurru walalanha ŋunhi djuy'yunna-wala yana,

yakana walala yurru nhina yukurra galki ŋarrakalanydja,” bitjarrana ŋayi Garray waŋananydja.

Yitjural miṯtji yaka yana marŋgithina

42:18-25 (Israel didn't learn)

18Yo, bitjan ŋayi yukurra God waŋanydja gam',

“Nhuma mäkiri'-dhumukmirri yolŋu walala mäkiri'-witjurra,

ga nhuma bambaymirri yolŋu'-yulŋu nhäŋa ga marŋgithiya.

19Ŋarra djarr'yurrunanydja nhumalanha bitjan nhenydja ŋarraku djämamirrina ḻakaranharawu ŋarrakalaŋuwu dhäwu'wuna,

yurru nhenydja mäkiri'-dhumukthina warray ga bambaythina warray,

yakana nhe marŋgithina yuwalkkuŋala galŋu yuwalkku.

20Nhäma warray nhuma yukurra yulŋunydja nhaltjan ŋarra yukurra djäma ŋamakurru' walŋu,

yurru nhumanydja yakana ḏukṯukthirri yukurra djämawu dhiyakuyi dhunupawunydja.

ŋäma warray nhuma ŋuli dhäruktja ŋarranha,

yurru yakana nhe yuwalktja mäkiri'-witjun yukurra,

ga yakana nhe yukurra ŋarranha dhäruk märrama.”

21Wirrki yana ŋayi Garraynydja ḏukṯuk bukmakku yolŋu'-yulŋuwu,

walala yurru marŋgithirri ŋunhi ŋayinydja rom-dhunupa walŋu Waŋarr God,

bala ŋayi ŋunhi nhanŋuway romnhanydja garrwarkuŋalana walŋu;

walala bini birrka'mirriyu yolŋuyu nhänha nhanŋu ŋamakurruny'tja walŋu rom nhumalaŋgala.

22Yurru nhuma nhanŋunydja yolŋu'-yulŋu gaṯmaranharana ŋurikiŋi miriŋuwuŋuna yätjkuŋuna,

ŋayinydja bitjarra nhumalanha djaw'-djawyurrunana,

bala garrpi'-garrpirana nhumalanha;

Ŋayathamanydja ŋayi yukurra baṯ bitjanna nhumalanha goŋdhu nhanukalaynydja,

ga yakana yol guŋga'yunarawunydja nhumalaŋgu,

yakana ŋula yolthu nhumalanha dhawaṯmaraŋalanydja beŋuruyi miriŋuwalanydja goŋŋuru.

23“Yolnha dhika nhe yurru yolŋu mäkiri'-witjundja ŋarraku?...

märr yurru ŋarra walŋakumana nhuna, yurruna ŋunhi dhuḏitjtja nhuŋu yurru,”

bitjarra ŋayi Garray waŋananydja.

24Yolthu nhumalanha wekaŋalanydja ŋunhi ŋurikalayi miriŋuwalanydja goŋlili?...

ŋurikalanydja ŋunhi ŋayi manaŋina nhumalanha?

Ŋarrapi ŋunhi Garrayyu Godthu nhumalanha wekaŋalanydja nhanukala goŋlilinydja,

liŋgu dhuwurr-djarrpi'yina warray nhenydja,

ŋunhi nhe ŋuyulkthina ŋapa-wekaŋala ŋarrakalaŋunydja romgu,

ga yakana dhäruk märraŋala ŋarranhanydja.

25Yo, ŋayipinydja ŋunhi Garraynydja mirithinana yana ŋaramurryina Yitjuralwalanydja,

bala walala gulŋiyina ŋunhimalayina yindililina walŋu marililinydja,

ga wirrkina yana walala ŋunhi galŋa-yätjthinanydja.

Nhaltjarra walala ŋunhi?... marŋgithina ŋuriŋinydjayi?

Bäyŋu warray. Yakana walala gonha'yurruna yätj rom ŋunhiyi walalaŋguway,

yaka yana walala bilyurruna Godkalanydja roŋiyina.