gnnNTOTPO

DIMITHIWU NAMBA 2NA DHÄRUK 4

Mukthurra yana-wala ḻakaraŋanydja Godkunydja dhäruknha

1Dimithi, dhuwalanydja ŋarra nhuŋu yukurra nherraṉdja romnha, yurru yuwalktja dhuwala dhäruk ŋulaŋuru Godkuŋu warray ga Djesu-Christkuŋu, ŋurikiŋi ŋunhi ŋayinydja mala-yarr'yunaramirri yolŋu'-yulŋuwu. Yuwalk yana ŋayi yurru roŋiyirrinydja lili galkina dhika, bala ŋayi yurru mala-yarr'yun bukmaknha yana yolŋu'-yulŋunha, ŋunhinhanydja walalanha ŋunhi walala yukurra nhina walŋamirri ŋulinyaramirriyu, ga ŋunhinha walalanha ŋunhi walala marrtjina murrmurryurruna raku'-rakunydhina ŋäthili, bala yana ŋayipinydja yurru nhinana yukurra ŋurruŋuna wal'ŋu bukmakku nhäku malaŋuwu. 2Dhiyakuyina märrwu ŋarra nhuŋu yukurra ḻakaramanydja dhuwala bitjan gam': Ḻakaraŋanydja birrŋ'maraŋanydja Godku dhäruktja bukmakkala yana birrka'mirriwala. Ḻakaraŋa ŋuripanydja walalambala ŋunhi walala yurru ḏukṯukthirri ŋänharawu, ga ŋuripa walalambala ŋunhi walala yaka ḏukṯuk ŋänharawu; ḻakaraŋa bukmakpa yana bukmakkuŋa. Ŋunhi yukurra yurru yolŋu'-yulŋuyu djäma yätjkuma, ḻakaraŋa walalambala Godku dhäruk, raypirri'yurra walalanha biyaka, märr yurru walala gananna ŋunhiyi walalaŋguwaynydja gatjaḻ. Biyaka ḻakaraŋa yolŋu'-yulŋuwanydja nhaltjan walala yurru nhina ŋamathama wal'ŋu, yurru marŋgikuŋana marrtjiya walalanha bala yulŋunydja bulnhana, gurrum'thurrana yana bala. 3Biyaka liŋgu marrtjiya bala marŋgikuŋa yana walalanha, liŋgu ŋunhi walunydja yurru bunana dhuwala, ŋunhi yurru yolŋu walala yaka mäkiri'-witjun ŋuriki yuwalkku dhärukku, yakana walala yurru ḏukṯukthirri nhinanharawu ŋamathanharawunydja bitjanarawuyinydja. Bala walala yurru yukurra maḻŋ'marama walalaŋguwaynha walala marŋgikunhamirrinha walalanha, ŋunhinhana walalanha ŋunhi walala yurru ḻakarama yukurra ŋunhina liŋguna dhäruk ŋunhi walala ḏukṯukthirri yukurra ŋänharawu, märr yurru walala mukthun yana malthun walalaŋguway walala djälwu. 4Dhiyakuyinayi märrwu walala yurru ŋunhi yakanydja mäkiri'-witjun ŋuriki yuwalkkunydja, walala yurru yana dhaḻ'yunmirrina walalaŋguway walala mäkiri'na, bala ŋanydjaḻa'yunna. Bala walala yurru yukurra gurrum'thundja ga wirrkinydja be mäkiri'-witjun ŋurikina dhäwu'wu malaŋuwu, ŋunhi walala ŋuli be nhäna ḻakaramanydja dhäparknha ŋunhi mayali'miriwnha. 5Yurru nhepinydja yurru biyaka liŋgu yana marrtjiya ga guyaŋiya dhunupa yana wal'ŋu, ga dhärriya ŋunhilimi liŋgu waŋganyŋura yana yuwalkŋuŋura wal'ŋu. Ŋuli nhuna yurru yolŋu'-yulŋuyu ŋayaŋu-yätjkumanydja buma, bala nhenydja märraŋa yana walalaŋguŋu, bala mukthurrana-wala yana marrtjiya Godkalana ganydjarryu. Biyaka liŋgu bala yana ḻakaraŋa marrtjiya bukmakkala yolŋu'-yulŋuwalanydja Godku ŋunhi ŋamakurru' wal'ŋu dhäwu', Djesunha yana. Gatjuy marrtjiyana-wala, djämana yana Godkunydja ŋamathaŋana, ga dhawar'maraŋanydja bukmak yana ŋunhiyi djäma ŋunhi ŋayi Godthu nhuŋu wekaŋala.

6Liŋgu ŋarrakunydja dhuwala walu galkina dhawar'yunna yurru; galkina ŋarra yurru dhuwala rakunydhirrina, bala gananna dhuwala munathany'tja wäŋanha. 7Liŋguna ŋarra djämanydja wirrkina dhika wal'ŋu yana Godkunydja, ganydjarryuna yana, bitjarrana bitjan yolŋu ŋuli waṉḏirri bata'yunarawu ganydjarryu ga worr'yu, yana liŋgu ga buku ŋayi yurru mulka. Ga dhuwalanydja ŋarra liŋguna djuḻkmaraŋalana bukmaknhana ŋunhiyinydja ŋunhi walala yukurrana gulmaraŋala ŋarranha. Liŋguna ŋarra dhawar'maraŋalana bukmak nhänydja malanha ŋunhi ŋayi Godthu wekaŋala ŋarrakala djämawu. Ga djäkanydja ŋarra ŋamathaŋala wal'ŋu dhika ŋurikiyi dhäwu'wunydja, ŋunhi ŋayi wekaŋala ŋarrakala dharraylili, bala ŋarra ḻakaraŋalanydja yukurrana dhunupa yana wal'ŋu warraŋulkuŋala. 8Ga ŋunhala dhä-yawar'yunaraŋuranydja Garrayyu yurru ŋarrakunydja wekama nhä malanha ŋamakurru' warray ŋunhi ŋayi yukurra ŋayathama ŋarraku, bala ŋarra yurru nhina yukurra ŋayaŋu-dhunupana yana, ŋunhala nhanukalanydja wäŋaŋura. Yo, ŋuriŋi dhä-yawar'yunaramirriyunydja waluyu ŋayi yurru Garrayyunydja mala-yarr'yun marrtji dhunupa yana, bala ŋayi yurru wekama ŋarrakunydja ŋamakurru'na dhika wal'ŋu. Yurru yaka yana ŋunhi ŋarrakuwaynydja, bukmakku yana yolŋu'-yulŋuwu ŋunhi walala ŋuli yuwalkkuma dhika wal'ŋu märr-ŋamathirri Djesuwu, bala märr-nhämana walala ŋuli yukurra, gatjpu'yunna yulŋunydja nhanŋu roŋiyinyarawuna.

Dhawar'yunaramirrina dhuwalanydja dhäruk

9Buku-djulŋi Dimithi marrkapmirri, go marrtjiyana lili ŋarrakala waḏutjana, 10liŋgu Dematjthunydja ŋarranha gonha'yurrunana liŋguna. Märr-ŋamathina ŋayi dhiyakuywu munatha'wuywu nhäku malaŋuwu, ŋurikiyi warray ŋayinydja yukurrana märr-nhäŋala, bala ŋayi gonha'yurrunana ŋarranha, bala marrtjina ŋunhana-wala Dhatjalunikalilina. Ga ŋayinydja Guritjindja marrtjina ŋunha Galatjiyalili, ga Dätitjtja marrtjina ŋunha Dalmatjalili. 11Ga waŋganynha dhuwala Loknha yolŋunydja dhuwala ŋarrakalanydja. Märraŋa garr'yurranydja Mäknha, bala gäŋana ŋanya lili ŋarrakala, liŋgu ŋayina yurru ŋarranha guŋga'yundja. 12Yo, djuy'yurrunanydja ŋarra Ditjikanha ŋunha Yipatjatjlilinydja. 13Ŋunhi ŋarra gonha'yurruna Dhurawatjtja wäŋa ga ŋunhayina ŋarra gonha'yurruna ŋarrakuway guyŋarrwuynydja girri', ŋunhayina Gäpatjkalana yolŋuwala djäkalili. Märraŋana lili ŋunhiyi guyŋarrwuynydja ŋarraku, bala gäŋana lili, ga biyapul ŋarra ḏukṯuk nhe yurru gäma ŋunhi djorra' malanha, yurru yuwalktja ŋarra ḏukṯuk wal'ŋu ŋuriki djorra'wu ŋunhi wukirriwuy barrwaṉ'lili wäyinlili ŋurikiyi.

14Ŋunhinydja Yaliktjandayunydja yolŋuyu djäma yätjkuŋalana dhikana ŋarranha, ŋuriŋinydja ŋunhi ŋayi ŋuli yukurra djäma garwarrwarr nhä malanha. Garrayyunydja yurru dhä-ḏir'yunna yanana ŋanya, bala wekama nhanŋu buku-ruŋinyamarama ŋurikiyina ŋunhi nhaltjarra ŋayi djäma yätjkuŋala. 15Dharray yulŋunydja nhuŋuway nhe, liŋgu ŋayi wirrki yana ŋilimurruŋgu dhäruktja ḏaḏawmaraŋala.

16Ŋunhi ŋäthilinydja ŋarra yukurrana dhärrana ŋurikala ŋaḻapaḻmirriwala walalaŋgala dhä-wirrka'yunarawunydja, bala ŋarra nhinananydja yukurrana gänana ŋarrapina, liŋgu bukmakthunydja ŋarranha gonha'yurrunana, yakana ŋula waŋgany dhuḏi'yurruna ga nhinana ŋarrakala. Ŋarranydja ḏukṯuk ŋayi yurru Godthu bäy-ḻakarama walalaŋgu ŋurikiyi. 17Yurru yaka ŋarra gänanydja ŋarrapinydja ŋunhiyi, ŋayinydja Garraynydja ŋunhili ŋarrakala; ŋayi ŋarranha ganydjarr-wekaŋalanydja, märr ŋuriŋinydjayi nhanukala ganydjarryu ŋarra ḻakaraŋalana bukmaknha yana warrpam'thurrunana dhäwuny'tja, ŋurikinydja yolŋu'-yulŋuwu ŋunhi walala waŋgany-manapanmina ḻuŋ'thurruna ŋunhimalayi, birrka'mirri bäpurruny'tja. Yo, walalanydja yukurrana ŋunhi ŋaḻapaḻmirrinydja ŋayan'-dharrana ŋarraku bunharawuna, bitjarrana bitjan ŋuli wäyin maḏakarritj dhärra ḻirra-nyikthirri yolŋuwuna ḻäwunharawu. Yurru ŋayinydja Garrayyunydja ŋarranha walŋakuŋala warray, djaw'yurruna ŋuliŋuruyi mariŋuru bathalaŋurunydja. 18Ga ŋayinydja yurru Garrayyunydja ŋarranha walŋakuma djaw'yun dhipuŋuru bukmakŋuru nhäŋuru malaŋuru yätjŋurunydja, bala ŋayi yurru ŋarranha gäma ŋunhana nhanukalay djiwarr'lilina wal'ŋu wäŋalili, ŋunha ŋayi yukurra nhina ŋurruŋuna wal'ŋu yana-wala. Go ŋilimurru wokthunna-wala nhanŋu ḻatju'wunydja dhikanydja wal'ŋu romgu, gupaḏalkumana yana yurru. Yo yuwalk.

19Biyaka wekaŋa ŋarraku märr-ŋamathinyaranydja Burutjawunydja ga Guwilawunydja, ga biyakayi wekaŋa märr-ŋamathinyara Nitjipurawunydja ga nhanukalaŋuwu gurruṯu'mirriwu walalaŋgu. 20Ŋayi Rathatjtja ŋunhayi bäyma Gorin wäŋaŋura, yaka ŋayi malthurruna ŋarrakunydja dhipala, ga Dopamatjnhanydja ŋarra gonha'yurruna ŋunhayi Militalili, liŋgu ŋayi rirrikthurruna yukurrana. 21Go buku-djulŋu marrtjiya lili waḏutja, yurruna yurru wäŋa dhuwala ŋulwitjmirriyirrinydja.

Ŋayinydja Yupuluyunydja djuy'yurrunayi märr-ŋamathinyara nhumalaŋgu, ga biyapul wiripu-guḻku'yu Butundhu, ga Läniyayu, ga Guludiyayu. Ga wiripu-guḻku'yu Garraywalaŋumirriyu yolŋuyu walalay bukmakthu yana yänguŋalanydja märr-ŋamathinyaranydja nhumalaŋgu.

22Ŋarranydja yukurra bukumirriyama nhuŋu yulŋunydja Dimithi, märr yurru nhe wuṉḏaŋarryirri ŋunha ŋayaŋuyu wal'ŋu, ŋuriŋi Garraywala ganydjarryu. Godthu yurru gämanydja yukurra nhuna nhanukalay ŋayi märr-ŋamathinyarayunydja. Ga liŋguna.