gnnNTOTPO

PSALMS 34

God yukurra ḻatju'thirri ŋarrakala

34:1-22 (Praising God's goodness)

1Ŋarranydja yurru bitjanna liŋguna buku-wekama Garraynhana,

yakana ŋarra yurru gulyundja Garraywala märr-ŋal'yunaraŋuru.

2Bitjanna bili ŋarra yurru yukurra ḻakarama nhanukalaŋuwuy,

ŋunhi ŋayi yukurra ḻatju'thirri ŋarrakala.

Ŋäka walala, nhumanydja ŋuriŋinydja walala yolŋu'-yulŋuyu, ŋunhi nhuma ṉiṉ'ṉiṉmaranhara, ŋayaŋu-ŋonuŋmirriyunydja,

märraŋa ŋarranha dhäruktja, bala ŋoy-djulŋithiyana.

3Go, ŋilimurru wokthunna Garraywuna yäkuwu,

waŋgany-manapanmirrina ŋilimurru go,

bili ŋayi dhuwala yäku-ḏumurrunydja, bulunydja-wala walŋu.

4Ŋarra bukumirriyaŋala waŋana Garraywala,

bala ŋayi buku-ruŋiyinmaraŋala ŋarrakunydja;

Ŋayinydja ŋarranha marrtjina ŋoy-ḏälkuŋala warray,

märr ŋarra yurru yakana barrarirri biyapulnydja.

5Way yolŋu walala, bakuruŋa walala ŋanya Garraynha, bala nhäŋana,

bala yurru nhuŋu ŋayaŋunydja ḻayyunna;

Yakana nhe yurru ŋaḏi'yundja ŋanya nhäma.

6Ŋunhi nhe ŋuli yukurra nhina gurrupurumirrina yolŋu,

yana Garraywuna wäthurra,

bala ŋayinydja yurru nhuna ŋämana, bala yana walŋakuma,

dhawaṯmarama yurru ŋuliŋuruyi galŋa-yätjthinyamirriŋuru romŋuru.

7Yo, Garraywala ŋuriŋi djiwarr'wuyyunydja yolŋu'-yulŋuyu gungamana ŋuli yukurra ŋunhinhanydja yolŋunha ŋunhi ŋayi yukurra Garraywunydja romgu borrk-beyaṉiyirrina,

ŋapatjkumana ŋanya yukurra burakinyaraŋuruna, ŋula nhäŋuruna romŋuru.

8Gatjuŋga, nhe yurru maḻŋ'marama nhepi,

gatjarr'yurra nhe Garraynha;

Nhe yurru maḻŋ'maramanydja ŋanya, ŋunhi ŋayinydja ḻatju' warray nhuŋu dhika.

Gärriyana-wala nhanukala ŋurrwu'lilina.

bala nhe yurru nhina yukurra ŋoy-djulŋithirrina, dharray-djulŋimirriwalana.

9Nhuma ŋunhi walala yolŋu'-yulŋu ya' Garraywu,

romgu borrk-barrariya nhanŋu.

Ŋayi ŋuli yukurra dharray ŋurikinydja walalaŋgu yolŋu'-yulŋuwu

ŋunhi walala ŋuli yukurra malthun nhanŋuway yana dhärukku.

10Wiripunydja ŋuli wäyin walala martj-martjtjun-dharra djaṉŋarrmirrina,

bili walalaŋgu bäyŋuna ŋula ŋatha.

Yurru ŋunhinydja yolŋu ŋunhi ŋayi yukurra rom-wiyaṉiyirri Garraywu, ga märrama ŋanya,

ŋayinydja yakana yurru warrya'yun ŋula nhäku,

bili ŋanyanydja yurru Garrayyu warray maranhu-wekama.

11Go, gäthu walala gay', lili marrtjiya.

Nhuma yuḏayuḏa yolŋu'-yulŋu, mäkiri'-witjurra,

ŋäkana ŋarranha dhäruk;

Ŋarra yurru nhumalanha marŋgikumanydja,

märr nhumanydja yurru romgu-wiyaṉiyirri Garraywu,

bala malthunna-wala marrtji nhanŋu Garraywu.

12ḏukṯukka nhuma yulŋunydja?... nhuma yurru galŋa-djulŋithirri nhina?...

Walŋa weyin?... ga buta'kuma nhina?

13Ŋuli nhe ŋamathanharawunydja nhinanharawu ḏukṯuk,

yaka waŋiya yätj dhäruk,

ga yaka bothiya ḻakaraŋa.

14Yarrkthurra ŋuliŋuru ŋäŋukkala dhukarrŋuru,

ga marrtjiya ŋamathaŋa bala, rom-dhunupayiya.

Mukthurra nhiniyanydja yukirriya ga ḻunduthiya wiripu-guḻku'wunydja yolŋu'-yulŋuwu,

ga galŋa-ŋamathiya birrka'mirriwu.

Yaka marinydja ŋula nhänydja guyaŋiya,

dharraḏa yana nhiniyanydja yukirriya.

15Liŋgu Garrayyunydja nhäma yukurra ŋunhinha rom-dhunupanhanydja yolŋunha;

djäka marrtji yurru nhanŋu.

Ŋayi yurru Garraynydja mäkiri'-witjunna nhanŋu ŋunhi ŋayi yurru wäthun Garraywu.

16Yurru ŋurikinydja dhuwurr-yätjmirriwu yolŋu'-yulŋuwu ŋayi ŋuli ŋapa-wekanharamirrina

ḻäy-yarryunna ŋayi yukurra Garraynydja walalaŋgu;

Walala yurru murrmurryundja,

ga yäkunydja walalanha yurru meṉgumana walala, buku-dhumukthirrina.

17“Ŋe. Rom-dhunupanydja yolŋu ŋuli wäthun Garraywu,

bala Garraynydja ŋuli mäkiri'-witjunna nhanŋu;

Dhunupana ŋayi yurru guŋga'yunna-wala, dhawaṯmaramana ŋanya,

walŋakumana ŋuliŋuru burakinyamirriŋurunydja romŋuru.

18Ŋunhi nhe yurru ganydjarr-wiḏi'yundja, ŋayaŋumiriwyirrinydja manapan,

Garraynydja yurru ŋunhiliyi galki,

guŋga'yun yurru wuṉḏaŋarrkumayi nhuna.

19Wiripunydja ŋuli rom-dhunupa yolŋu marilili gärri,

yana ŋayi yurru Garrayyunydja ḏälkumana ŋanya mulka,

bala gämana marrtji,

ga yana liŋgu ga dhawaṯmarama yurru.

20Garraynydja yurru djäka yukurra nhanŋu ŋamathama yana,

yakana yurru nhanŋu ŋula ŋarakanydja ḏaw'yun.

21Rom-yätjmirrinydja yolŋu walala yurru rakunydhirrina,

liŋgu yätjthu romdhu ŋuriŋiyi yurru walalanha buma murrkay'kuma.

Ga bitjandhi liŋgu Garrayyunydja yurru ŋurrkamana,

dhä-ḏir'yunna ŋunhinhanydja yolŋunha ŋunhi ŋayi yukurra ŋaramurryirri rom-dhunupawu yolŋuwu.

22Yo, Garrayyunydja yurru walŋakumana nhanŋuwaynydja ŋayi ŋunhi yolŋu'-yulŋunha,

ŋunhinhanydja walalanha ŋunhi walala yurru gärri nhanukala ŋurrwu'lili;

ŋunhinydja walala Garraywunydja yolŋu'-yulŋu yurru yukurra nhina walŋana,

ŋäkirrmaranharana ŋula nhäŋurunydja.