gnnNTOTPO

Genesis 32

Djaykup girri'-ŋamathinana gumurr'yunarawu Yetjuwuna

32:1-21 (Jacob prepared to meet Esau)

1-2Yo, marrtjinana walala yukurrana-a-a yana liŋgu ga galki gandarrŋurana, bala walala ŋunhili nhinanana. 3Yo, ŋunhiliyinydja gandarrŋuranydja ŋayi Djaykupthu yänguŋala dhäwu'mirrinha walalanha bala wäwa'mirriŋuwala nhanukalaŋuwala Yetjuwala yäkuwala, 4ga dhäruktja ŋayi wekaŋala bitjarra walalaŋgala. “Biyaka walala waŋiyanydja nhanukala Yetjuwala, ‘Ŋarranydja dhuwala nhuŋu djämamirri Djaykup. Ŋarra yukurrana nhinana ŋunhala Laypangala baman'nha, ga dhuwalanydja ŋarra lili roŋiyirrina marrtji. 5Wäyindja ŋarraku dhuwala dhaŋaŋnha biyapulnha, mirithirrina guḻku' buliki, duŋ'ki, bembi, ga nanikut, ga djämamirrinydja walala ga buluna dhaŋaŋnha. Ŋarra yukurra dhäruktja djuy'yunmirri dhuwala nhuŋu, märr yurru nhe yakana ŋula ŋoy-marimirriyirri ŋarraku, yana nhe märraŋana ŋarranha, gumurr-ŋamathiyana ŋarraku bitjan ŋarranydja nhuŋu dhuwala djämamirrina.’ ”

6Martj-gay walalanydja ŋunhi dhäwu'mirrinydja; marrtjinana walala ga ŋunhala Yetjuwala, ga bunananydja nhanŋu, bala wekaŋalana dhäwuny'tja, ga lilinydja walala wiripuna dhäwu' gäŋala nhanŋu Djaykupkunydja, balanyarana gam', “Liŋgu ŋanapurru wäwa-ŋaliwanydja Yetjuwanydja bunana, ga ŋayinydja ŋunha marrtjina yukurra dhuwalana lili, gumurr'yunna nhuŋu yukurra. Ga malanydja nhanŋu yolŋu'-yulŋunydja marrtji malthun dhika lili 400-nha miriŋunydja.”

7Ŋayi Djaykuptja wirrkina beyaṉiyina ga wirrkina warwuyurruna bitjarra ya' buku-warwumirriyina. Ŋuliŋurunydja ŋayi gulk-gulkthurrunana marrtjina yolŋu'-yulŋunha ga wäyinnha walalanha barrkuwatjkuŋalana märrma'lili miṯtjilili. 8Bili ŋayi bitjarra guyaŋina, “ṉŋuli yurru Yetjunydja marrtji ga miriŋu-wunanydja dhiyala ŋanapurruŋgu, ga djaw'yun yurru dhuwala waŋganynha ŋathili miṯtjinha, märr yurru wiripunydja ŋurruk miṯtjiŋura ga gundupumana walŋathirrina,” bitjarra.

9Bala ŋayi Djaykup bukukurru waŋana ŋäŋ'thurruna Godnha bitjarrana, “Nhenydja dhuwalinydja waŋarr ŋarrakalaŋuwu märi'mirriŋuwu Yipurayimgu, ga ŋarrakalaŋuwu bäpa'mirriŋuwu Yitjakku. Ŋäka ŋarranha. Garray nhepi ŋarraku ḻakaraŋala roŋiyinyarawu dhiyakunydja ŋarrakiyingalaŋuwunydja wäŋawu gurruṯu'mirriwu walalaŋgu. Ga nhepi dhäruk-nherraṉmina ŋunhi nhepi ŋarranha yurru gämanydja marrtji lili, djäkanydja marrtji ŋarraku ŋamathama yana. 10Ŋarranydja dhuwala yätjnha yolŋu, yakana ŋamakurru', yurru nhe mukthurruna ŋarraku djäka marrtjina, gäŋala ŋarranha ŋamathaŋala yana, guŋga'yurruna ŋarranha nhe nhuŋuway djämamirrinha. ŋunhi ŋarra gonha'yurruna dhuwala wäŋa ŋäthili bala marrtjina, goŋ-wayŋu ŋarra marrtjinanydja yana ŋula nhämiriw, waŋgany wapitja yana dharpa gäŋala, ga dhuwalanydja ŋarra lilinydja roŋiyina malamirrina, djämamirrinydja dhaŋaŋnha ga wäyindja; ga bukmak nhä malanha nhe wekama yawungu ŋarraku. 11Walŋakuŋa ŋarranha Garray, liŋgu ŋarra dhuwala beyaṉiyirri yukurra ŋuruku wäwa'mirriŋuwu ŋarrakalaŋuwu Yetjuwu. Dhuwala ŋayi ŋuli gonhana marrtji lili bunharawuna ŋanapurruŋgu, bukmakkuna dhiyaku walalaŋgu, dhäykawurruŋgu ga yumurrku'wu ga bukmakku dhiyaku. 12Guyaŋiya ŋunhiyi ŋunhi nhe dhawu'-nherrara ŋarraku djäkawu ŋamathanharawu. Ga bitjarrayi bili nhe dhawu'-nherrara ŋarranha malawunydja guḻku'kunharawu yumurrku'wunydja, märr yurru ŋarraku mala dhaŋaŋdhirri guḻku'thirri galŋu miṯtjinydja, dhaŋaŋdhirrina walŋu yurru bitjan dhuwala munatha' ya' raŋiŋura.” Bitjarra ŋayi Djaykup yukurrana bukumirriyaŋalanydja.

13-16Yo, ŋunhiliyi walala wäŋaraŋalanydja, ga munhakumirrina wiripuŋuyuna waluyu, bala Djaykupthu guḻk-guḻkthurrunana marrtjina dhaŋaŋnha mirithirrina wäyin, mundhurrnha wäwa'mirriŋuwuna Yetjuwuna wekanharawu, bala djuy'yurrunana yukurrana ŋunhiyi wäyin malanha ga djämamirri waŋgany. Ga dhäruktja-gathanmina ŋayi yukurrana waŋga'-waŋganygu ŋurikiyi djämamirriwunydja walalaŋgu bitjarra. “Ŋay', dhuwala wäyin malanha gäŋa nhanbala, nhanŋuna Yetjuwuna, 17ga ŋunhi ŋayi dhä-wirrka'yundja yurru nhuna bitjandja, ‘Yol nhuŋu buŋgawa'mirriŋunydja?... ga yolku dhuwala wäyindja malanha?’ 18ga yurruna nhenydja yurru waŋiya biyaka. ‘Dhuwalanydja wäyin nhokalaŋuwuŋu djämamirriwuŋu Djaykupkuŋuna; ŋayi djuy'yurruna dhuwalanydja nhuŋuna mundhurrnha. Ga ŋayinydja Djaykuptja, ŋayipinydja dhuwala lili marrtji nhina dhuḏikurru.’ ” 19-20Djaykup bitjarrayinydja waŋana, liŋgu ŋayi guyaŋina bitjarra, bitjanarayunydja dhiyaŋunydja mundhurryunydja wekanharayu ŋayi yurru goyulŋu'thirrina ŋarraku, ŋamathirrina ḻunduthirrina. Ga ŋunhi ŋilinyu yurru bunanhamirrinydja, mak ŋayinydja yurru ŋarraku bäy-ḻakaramana ŋurikinydja bamanŋuwuynydja ŋunhi ŋarra nhaltjarra ŋanya yätjkuŋala. 21Bala ŋayi ŋunhiyi mundhurrnydja malanha djuy'yurrunana yukurrana ŋathil'yurrunana ŋurruŋuna, ga ŋayipinydja bulnha yukurrana nhinana.

Djaykup ga be yol ganydjarr-warryunmina

32:22-31 (Jacob wrestled with the Lord's angel)

22-23Ŋulinyaramirriyu munhaku ŋayi Djaykup gaŋgathinana, bala djuy'yurruna dhäykawurrunha nhanŋuway ga yumurrku'nha ga nhä malanha nhanŋuway ŋunhi bukmak; bukmaknha yana warrpam'thurrunana djuy'yurruna ŋäthilina, 24ga ŋayipinydja ŋunhilina bäymana nhinana yukurrana gänana ŋayipina.

Munhakuna dhika, bala ḏarramuna bunana nhanbala ŋunhiliyi ŋula yolnha, bala maṉḏa yukurrana mulkanhaminana bala ganydjarr-warryunminana maṉḏakuway maṉḏa. Ganydjarr-warryunminana maṉḏa yukurrana-a-a, yana liŋgu-u-u, galki djaḏaw'yurrunana marrtjina. 25Ŋayi ŋunhi ŋula yolnydja marŋgithinana ŋunhi ŋayi yakana yurru djuḻkmarama ŋanya Djaykupnhanydja ganydjarr, bala ŋayi marrtjina mulkanana ŋanya Djaykupnhanydja dhiyala bili yuṯuŋgurr, dhuwala dhä-manapanara, bala dhayapmaraŋalana ḏulŋurr'yurrunana, märr ŋayi yurru yakana marrtji ŋamathama. 26Ga ŋunhi yolŋunydja be-yolnydja waŋana, “Gonha'yurrana ŋarranha, ŋarra marrtjina, liŋgu djaḏaw'yunna marrtji dhuwala wäŋanydja.”

Yurru ŋayi Djaykupthunydja baṯ bitjarra yukurrana yana ŋayathaŋala mukthurruna ŋanya, ga waŋana bitjarra, “Yakana ŋarra yurru nhuna dhuwalanydja djuy'yun-wala. Ŋäthilinydja nhe yurru waŋa goŋmirriyama ŋarranha, märr yurru ŋarra yukurra marrtji nhokalaynha yana djälkurru.”

27Bala ŋayi ŋunhiyinydja yolŋu waŋana bitjarra, “Yol dhuwala nhe yäkunydja?”

Ga ŋayinydja waŋana bitjarra, “Ŋarra dhuwala Djaykup, mayali' bitjan rom-guḻku'mirri ŋarranydja.”

28Ga ŋunhi be yolnydja yolŋu waŋana bitjarra, “Yakana nhe yurru yukurra yäku djingaryun Djaykuptja; ŋarranydja yurru dhuwala nhuna yäku-nherraṉ yuṯana yäku. Dhipuŋurunydja-wala dhurrwaraŋuru nhe yurru yäkunydja yukurra djingaryun Yitjuralnha, liŋgu nhe yukurrana ganydjarr-warryurruna Godku ga yolŋuwu, bala liŋguna nhe dhuwala djuḻkmaraŋalana.”

29Ga ŋayi Djaykuptja buku-ḏuwaṯthurruna waŋana dhä-wirrka'yurruna nhanŋu yäkuwu bitjarra, “Ma', nhenydja yäku ḻakaranhamiyana ŋarrakala. Yol nhenydja yäku?”

Ga ŋayinydja ŋunhi be yolnydja yolŋu waŋana bitjarra, “Nhäku nhe yukurra ŋarrakunydja dhä-wirrka'yun yäkuwu? Marŋgi muka nhe ŋarrakunydja.” Bala ŋayi waŋana dhäruktja goŋmirriyaŋalana ŋanya Djaykupnha.

30Bala ŋayi Djaykup waŋanana, “Liŋguna ŋarra nhäŋalanydja Garraynha rumbalnydja. Ŋarra nhäŋala ŋanya bukuna, ga dhuwalana ŋarra gay' walŋa yana.” Bala ŋayi yäkunydja nherrara ŋunhi wäŋanydja Biniyalnha, ŋunhinydja mayali' bitjan Garraywu bukuna.

31Bala ŋayi Djaykupthu wäŋanydja ŋunhi gonha'yurrunana, dhiyaŋu liŋgu ŋayi marrtjina walunydja lili walmana, yurru ŋayi marrtjina djuka'-djukaṯthurrunana bala yulŋunydja, bili yuṯuŋgurr ŋayi ŋunhi dhayapthurruna.