gnnNTOTPO

Isaiah 11

Yolŋu yurru nhina yukurra wapurarrnha mäwayaŋurana

11:1-9 (The peaceful kingdom)

1Yo, Daypitkuŋunydja mala-wunharawuy yurru balanyarana bitjan dharpa gulkthunarawuy dhuḏi-wumbunhara yana, yurru ŋuliŋuruyi ŋunhi gulkthunaraŋurunydja ŋayi yurru biyapul dhamany'tjun, yuṯana dhawaṯthun yurru, yuṯana ŋayi yurru buŋgawa walma ŋuliŋuruyi Daypitkalanydja yarraṯaŋuru mala-wunharawuy.

2Ŋunhiyi yuṯanydja yurru buŋgawa bitjan ḻiya-djambatjnha ŋayi,

ga marŋgina ŋayi biyapul'nha walŋu,

liŋgu Garraywunydja yurru ŋunhi Birrimbirrnydja walŋanydja nhinana yukurra ŋunhili nhanukala.

Yuwalk galŋu yana ŋayi yurru Godku marŋgiyirrinydja,

ga märr-ŋal'yun ŋayi yurru yuwalkkuma nhanukala,

bala ŋayi yurru gämana yolŋu'yulŋunhana yukurra ŋamathamana,

ga marŋgikumana ŋayi yurru yukurra walalanha dhunupakumana walŋu yana.

3-4Yanana ŋayi yurru marrtjinydja yukurra nhanukalaynha Garraywalana gatjaḻkurrunydja-wala,

liŋgu ŋayi djäl ŋayi yurru dhäruk-märrama ŋanyapinyay yana waŋganynha.

Ŋayi yurru mala-yarr'yundja yolŋu'-yulŋunhanydja ŋamathama yana dhunupa walŋu, rom-waŋganydhirri yana,

ga gali'lilinydja ŋayi yurru wapthun ŋurikala ŋurruwuykkala walŋu yolŋuwala ga goŋmiriwŋura ŋunhi,

ŋunhiyinhana ŋayi yurru guŋga'yundja.

Ŋayi yurru dhäruknha waŋanydja yana waŋganynha,

bala ŋunhinydja dhuwurr-yätjnhanydja yolŋunha yurru dhä-ḏir'yunna, rakunydhirrina yurru.

5Liŋgu bitjan liŋgu ŋayi yurru djämanydja nhä ŋunhi dhunupa ga ŋamakurru' Godkala maŋutjiŋura.

6-7Yo, ŋulinyaramirriyuyinydjayi dhuwala munathany'tja wäŋa yurru wiripuŋuyirrina ŋanydjaḻa'yunna,

bitjan liŋgu wapurarryirrina warrpam'nha yurru marimiriwnha nhämiriwnha.

Yo, maṉḏa yurru wäyin maṉḏa wakinŋu wuŋgan ga läm, maḏakarritj ga boḏiny nhina-dharra rrambaŋina yurru,

ŋaḻwa'yunna maṉḏa yurru yana ḻundu'manydjina,

ga yothu' buliki' ga läyin, maṉḏa yurru ḻuka marrtji ŋatha rrambaŋina yana mulmunydja,

ga yumurrku' yurru yolŋu walala djäkanydja yukurra ŋurikiyi wäyingu.

Yo, ŋuriŋiyinydjayi maḏakarritjthunydja wäyindhu malaŋuyu yurru ḻuka marrtji mulmuna,

bitjan yana liŋgu bitjan ŋuli buliki'yu ḻuka,

yakana walala yurru buma yolŋunha wo wiripuŋunha wäyinnha.

8Ga ŋuli yurru yothu' ŋaḻwa'yun nhina galki bäpiwalanydja,

ŋuriŋi bäpiyunydja yurru yakana läwuma ŋunhiyi yothu'nha.

9Ŋunhi yurru ŋayi ŋunhiyinydjayi buŋgawa nhina yukurra ŋunhiliyinydja bukuŋura Djurutjalamdja wäŋaŋura,

yakana yurru ŋula yol yolŋu ga wäyin burakirrinydja ŋulinyaramirriyu ŋula nhäyu,

ga yakana yurru ŋula yolthu djäma yätjkumanydja, yätjtja ŋunhili.

Liŋgu bukmaknha yurru. miṯtji bukmakŋurana wäŋaŋuranydja buku-ḻiw'marama marŋgiyirrina nhanŋu Garraywu,

liŋgu bukmak yurru dhuwala buku-ḻiw'marama wäŋanydja monyguma yukurra ŋuriŋina bili nhanukala ḻatju'yuna dhikana walŋu.