gnnNTOTPO

PSALMS 8

Godthu gurrunhara ḻatju'kuŋala yolŋuwu

8:1-9 (God honoured man)

1Garray gay' marrkapmirri, nhe muka ŋanapurruŋgu Garraynydja,

bukmak dhuwala munathaŋura ŋorra marrtji, nhunana yukurra mel-ḻakarama;

ḻatju' dhuwala nhe yolŋunydja, Garray.

2Dhuwali djiwarrŋura wokthun yukurra nhuŋu yana,

ga yutjuwaḻa'mirrinydja yumurrku' yolŋu'-yulŋu nhuŋu yukurra yana märr-gorruma,

wokthundhi nhuŋu ga ḻatju'-ḻakarama.

Nhinanydja nhe yukurra wuṉḏaŋarr yana walŋu dhika,

ga yakana yurru ŋula miriŋunydja marrtji galkithirrinydja,

liŋgu nhe yukurra gulmaramana ŋula yolnhanydja ŋunhi ŋayi ŋuli nhuŋu ŋapa-nherraṉmirri.

3Wiripunydja ŋarra ŋuli bakuruma garrwar,

bala nhämana ŋuli gäraktja ŋunhi nhokuŋu bokmanaranydja.

Nhe bokmara ŋaḻindi ga ganyu' malanha,

ga nherrara nhe walalanha gäraklili.

Nhäma ŋarra ŋuli yulŋunydja,

bala ŋarra ŋuli guyaŋirrina bitjan,

4“Nhäku warray Garrayyu yukurra guyaŋirri ga ḻayḻayyun yolŋuwalanydja?

Yolŋunydja dhuwala yutjuwaḻa'na, nyumukuṉiny'nha yana,

yurru mukthun ŋayi ŋuli Garraynydja yolŋuwu djäka.

Nhäyinyarana dhuwala ŋayi yolŋunydja?”

Bitjan ŋarra ŋuli guyaŋirri.

5Yuwalk muka nhe bokmara yolŋunhanydja,

bala ŋurrulilina nhe ŋanya nherraranydja.

Yolŋunydja dhuwala yaka nyumukuṉiny' nhokala maŋutjiŋura.

Nhepina walŋu biyapulnydja-wala ŋurruŋu yolŋuwu,

ga yolŋunydja ŋurruŋu dhiyaku malanyŋuwu ŋunhi nhe goŋ.

6-8Goŋ-nherraranydja nhe ŋanya yolŋunhanydja;

Nhanukala yolŋuwala goŋŋura bukmak dhika ŋorra yukurra;

boḏiny wäyin ga wäyin wakinŋu,

buṯthunaramirri wäyin ga gaḻ'yunaramirri, ga gapuŋura guya.

Bukmaknha yana nhe wekaŋala yolŋuwala dharraylili.

9Garray gay', marrkapmirri,

nhe muka ŋanapurruŋgu Garraynydja.

Bukmakthu dhiyaŋu malaŋuyu nhuna yukurra mel-ḻakaramana.

ḻatjuŋ'ka dhuwala nhe yulŋunydja, Garray.