gnnNTOTPO

Isaiah 62

Biyaka marrtjinyamirriyaŋana yana bukumirriyaŋanydja-wala

62:1-12 (Pray until God has fulfilled his promise to save his people)

1Yo, yuwalk yana märr-yuwalk ŋarra yukurra märr-ŋamathirri mirithirri galŋu wäŋawu Djäyanbuyŋunydja, Godkalaŋunydja miṯtjiwu. Yakana ŋarra yurru dhäruk-mukthundja, yana ŋarra yurru marrtjinyamirriyamana bukumirriyamanydja yukurra, bitjan märrliliyama märryu-ŋupan Godnhanydja yurru, yanana liŋgu ga miṯtji nhanŋuway yurru yolŋu walala nhina yukurra yuwalkkumana walŋu nhanukalaynha Godkalana dhunupaŋuŋurana romŋura, yana liŋgu-u-u ga Godkala djarraṯawun'thunydja yurru räkukumana ŋunhi bukumunha'nhanydja warrpam'nha ŋuliŋuruna nhanukalayŋuwalana yolŋu'-yulŋuwala miṯtjiwala. 2Yo, nhumalaŋgalanydja yurru yolŋuyu walalay miṯtjiyu nhämana Godkunydja rom-dhunupanydja walŋu, ga ŋuriŋi buŋgawamirriyu walŋu nhämana yurru nhanŋunydja ḻatju' ŋanya dhika walŋu nhumalaŋgalana, bala ŋayi yurru Garrayyunydja wekama yuṯana galŋu yäku nhumalaŋgunydja. 3Ga bitjanna ŋayi yurru yulŋunydja garrwarkumana nhumalanhanydja nhanukalay ŋayi goŋdhu, liŋgu nhumanydja yurru ŋunhi dhapirrknha dhikana walŋu, balanyarana bitjan buŋgawawu ŋuriki muḻkurrwuy girri', miny'tjimirrina ŋanyana dhapirrknha nhanŋuna Godkuna, ŋunhi ŋayina yuwalktja walŋu buŋgawa bukmakkunydja. 4Yakana yurru biyapulnydja yolŋuyu walalay waŋa nhumalanha bitjan, “Godthunydja nhanŋuwaynydja ŋayi yolŋu'-yulŋunha meṉguŋalana liŋguna, gonha'yurrunana ŋayi walalanha.” Yo, walala yurru yana waŋa ḻakaramana nhumalanha bitjanna, “Way, wirrki warray ŋunha Godtja yukurra märr-ŋamathirri ŋurukunydja walalaŋgu, ŋayi märraŋala walalanhanydja bitjan nhanŋuwayliliyaŋalana. Walalanydja ŋunha bitjan nhanŋu dhäykana, ŋunhi ŋayipina märraŋala.” 5Yo, yuṯayu ḏarramuyu ŋuli märrama nhanŋuway ŋayi miyalknha, bala ŋayi ŋuli mirithirrina walŋu galŋa-djulŋithirrinydja, ga bitjandhina ŋayinydja yurru Godthunydja märrama bitjan nhanŋuwayliliyama ŋayi nhumalanha, ga wirrkina ŋayi yurru dhika walŋu goŋmirriyirrinydja ŋayaŋu-djulŋithirrina nhumalaŋgala.

6-7Yo, Godtja yukurra waŋa bitjan, “Djurutjalam ŋarrakuway galŋu wäŋa ga miṯtji. Ŋarranydja djarr'yurruna yolŋu'-yulŋunha, walala yurru yukurra dhärra bitjanna bitjan dhukarr-nhänharamirri walala, nhäma yukurra yurru dhukarr-nhäma miriŋuwu walalaŋgu. Bitjan liŋgu walu-ŋupan ga munha-ŋupan walala yurru yukurra bukumirriyamanydja Godkala, yakana walala yurru ḏaḏawyun ga nhina mukthundja yukurra; bitjanna liŋguna walala yurru yukurra Godkala waŋanydja bitjanna gam', ‘Garray, nhe dhawu'-nherrara ŋunhi nhenydja yurru walŋakuma nhuŋuwaynydja yolŋu'-yulŋunha.’ ” Yo, nhuma yolŋu walala ŋunhi nhuma ŋuli yukurra bukumirriyama, yaka walala ḏaḏawyurra ga gulyurra ŋuliŋuruyinydja ga nhiniya ganydjarr märr-yawaryurranydja; mukthurra-wala yana bukumirriyaŋa yukirriya, buku-ḻayyunmaraŋa ŋanya Godnhanydja marrtjiya, märr yurru ŋayi Godtja yaka nhina galŋa-mukthun ga gulyun, yanana liŋgu ga yuṯakuma ŋayi yurru nhanŋuway ŋayi miṯtjinha Djurutjalam, märr yurru bukmakthuna nhämanydja nhanŋu ḻatjuny'tja ŋanyanydja rom, bala wokthunna yurru walalaŋgu Garraywalaŋumirriwunydja yolŋu'-yulŋuwu. 8-9Yo, Garrayyu dhawu'-nherrara Djurutjalamgunydja bitjarra gam', “Yakana biyapulnydja yurru ŋuruŋu miriŋuyunydja ḻuka yukurra ŋathanydja ŋunhi nhokuŋu ŋuthanmaranhara; nhumapi yurru marrtji wapmarama ŋunhi ŋathanydja malanha, bala ḻukana yana wokthunna manapan goŋmirriyirrina; ŋunhalanydja ŋarrakalanydja Buṉbuŋura nhuma yurru yukurra ḻuka ŋatha ga borum weyikany'tja, buku-ŋal'yunna yurru yukurra Garraywuna.”

10-11Gatjuy marrtjiyana walala, yäkthurrana marrtjiya biyakana dhukarrnha ŋurikina walalaŋgu nhokalaŋumirriwuna yolŋu'-yulŋuwu gumurr-roŋiyinyarawu; biyaka yäkthurrana ḻaparra'kuŋana dhukarrnydja, liŋgu Garrayyunydja waŋa yukurra bukmakkala yana buku-ḻiw'marama wäŋaŋuranydja malaŋuŋura bitjanna, “ḻakaraŋana ŋarrakalaŋuwa yolŋu'-yulŋuwanydja biyakana, ‘Nhäŋana ya', Garraynydja marrtjina yukurra lili walŋakunharawuna nhumalaŋgu, ga gämanydja ŋayi yukurra buku-ruŋinyamaranharawuynha nhumalaŋgu djämawuynha.’ ” 12Yo, yolŋunydja walala yurru waŋa nhumalanha bitjanna, “Ŋunhanydja walala yolŋuŋ-yulŋu'Jarrtjalkmirrina galŋu, ganaŋ'maranharana nhanŋuwaynha Godkuna, liŋgu ŋayipi Godthu walalanhanydja märraŋala dhawaṯmaraŋala ŋulaŋuru miriŋuwalanydja goŋŋuru.” Yo, walala yurru waŋa wiripunydja bitjan, “Djurutjalam, nhenydja dhuwala wäŋa ŋunhi ŋayi God yukurra mirithirri walŋu märr-ŋamathirri, yaka ŋayi nhuna gonha'yurruna gupaḏalkuŋalanydja.”