gnnNTOTPO

HOSEA 14

Bilyurrana roŋiyiya Garraywalana

14:1-9 (A call to repent)

1Yo, nhuma Yitjuralpuyŋu yolŋu'-yulŋu, bilyurrana walala lili Garraywalana nhumalaŋgalaŋuwala Godkalana, liŋgu nhumalaŋgala ŋuriŋi yätjthunydja djämayu bitjarra nhumalanha galkinyamaraŋalana, gaṯmaraŋalana yana. 2Bilyurrana lili, marrtjiya roŋiyiyana Garraywalana galkithiyana, ga waŋiya nhanukala biyakana, “Garray, buwayakkuŋana, biḏiwiḏitjkuŋana ŋanapurruŋgu yätjtja malanha dhuwurr. Märraŋana biyakana galkikuŋana wal'ŋu ŋanapurrunha nhokalaynha nhe, bala ŋanapurrunydja yurru nhuŋu wokthunna yukurra ŋanapurruŋgala dhiyaŋu dhärukthunydja yurru, bitjan ŋanapurru yurru ŋunhinydja mundhurr-wekamana nhuŋu yukurra. 3Ŋuruŋu Yatjiriyawuyyunydja wäŋayu yakana ŋanapurrunha yurru walŋakuma, ga yakana yurru ŋanapurru walŋakunharamirri be ŋanapurruŋgalay ganydjarryu. Yaka yana biyapul ŋanapurru yurru waŋarr-ḻakarama ŋula nhä ŋunhi djämawuy goŋbuy, ŋunhi ŋanapurru yukurrana djäma dhiyaŋu ŋanapurruŋgalay goŋdhu. Garray, ŋanapurrunydja dhuwalanydja yolŋu'-yulŋu balanyarana bitjan bäpamiriwnha walala; nhepi yana waŋganydhu yukurra gämanydja ŋanapurrunha mel-wuyunaramirriyunydja dhikanydja wal'ŋu.”

4Ga ŋayinydja Garraynydja waŋana bitjarra, “Ŋarranydja yurru walŋakumana ŋunha ŋarrakuwaynydja yolŋu'-yulŋunha, ga gäma lili roŋinyamaramana yurru ŋarrakalaynha ŋarra. Ŋarra yurru walalaŋgu märr-ŋamathirrinydja märryu-ḏapmaranhamirriyu yana dhika wal'ŋu, gupaḏalnha-wala yanana. Liŋguna dhuwala dhawar'yurrunana; yakana biyapulnydja ŋarra yurru ŋaramurryirri walalaŋgu, ŋarrakalaŋuwunydja yolŋu'-yulŋuwu. 5Ŋarra yurru walalanha biyapul rumbalnydja djalkapthunmarama, liŋgu Yitjuralnydja yurru ŋunhanydja biyapul walŋathirriyi, bitjan yana liŋgu bitjan dhuwala wäŋa munatha' ŋuli djalkapthunmarama ŋuriŋi wakuluŋgul'yu. Yo, ŋunhiyi miṯtjinydja yurru ŋuthan dhapirrkthirrina dhikana, bitjan wurrki malanha, ga dhärranydja walala yurru ḻukuyunydja ŋayathama yana wuṉḏaŋarryirri wal'ŋu be-wala ṉiṉ'ṉiṉdhun, bitjan dharpa ŋunhi dhuḏi-yuḻkunhara, 6ga baṉdja'-baṉdjaŋuranydja yurru man'tjarrnydja ŋuthan bena wal'ŋu waḻatjthirrina birrŋ'thunna. Yo, bukmakthuna yurru yolŋuyu walalay nhämanydja, bala ḻakarama Yitjuralnhanydja mirithirrina manymak, bitjanna yurru, dhapirrk-ḻakaramana. 7Yo, yolŋunydja walala yurru marrtjina lili wäŋa-roŋiyirrina, ga nhinanydja walala yurru ŋunhiliyina dhapirrkŋurana ŋurrŋgitjŋura waḻatjŋurana, ga ŋunhiyi wäŋanydja yurru biyapul dhika walŋathirriyi. Ga ŋarrapi yana waŋgany yurru ŋarambiya'-nherrailmirrinydja dhiyakuyi wäŋawunydja, ga dhuwalayi wäŋanydja yurru dhapirrkthirrina dhikana wal'ŋu ŋanyana, ḻiw'maramana yurru, bitjanna bitjan dhapirrk dhika ŋanya gärul borum-mäypamirri. 8Bala ŋunhi ŋarrakunydja yurru yolŋu walala Yitjuralnydja waŋa bitjanna, ‘Liŋguna dhuwala dhawar'yurrunana. Yakana yana biyapulnydja ŋilimurru yurru buku-ŋal'yun be nhäku wiripuŋuwunydja waŋarrwu ga maḏayin'kunydja malaŋuwu ŋula nhäku.’ Yo, ŋarra yurru ŋäma rirrakaynydja Yitjuralnha waŋanhara bitjanarayinydjayi bukumirriyanhara, ga ŋarrapina yurru ŋanya mulkanydja yukurra dhangi'yunna yana, baṯ bitjanna, galkikumana yurru. Liŋgu ŋarranydja dhuwala balanyara bitjan dharpa ŋunhi yukurra dhärra bitjan liŋgu walŋa yana wal'ŋu; ŋuliŋuruyi ŋarrakalanydja nhuma yurru yukurra märrama ŋamakurru'na dhikana wal'ŋu, ga nhinanydja nhuma yurru yukurra goŋmirriyanhara yana ŋarrakuŋunydja, gupaḏalnha-wala yurru.”

9Yo, ŋuli nhe ḻiya-djambatjtja wal'ŋu, ga nhenydja yurru mayaliny'tja dharaŋan dhuwalayi malanha dhäruktja, bala marŋgiyirrina nhe yurru dhiyaŋu dhärukthu. Liŋgu Garraywunydja ŋunhi dhukarr ḻatju' warray dhika wal'ŋu, dhunupa warray ŋanya, ga ŋunhinydja ŋayaŋu-dhunupamirrinydja yolŋu walala yurru yukurra martj-martjtjunna yana ŋuliwitjandhiyi dhukarrkurru dhunupakurruna yana-wala. Ga ŋunhi dhuwurr-yätjtja yolŋu, ŋayinydja yurru ŋunhi dhä-ŋal'ŋalyunna marrtji, ga galkirrina yurru, liŋgu ŋayi yaka djäl ŋuriki Godkalaŋunydja romgu.

Ga liŋguna dhuwala dhawar'yurrunana Yutjiyawuŋunydja dhäruk.