gnnNTOTPO

DJONGUŊU NAMBA 1 DHÄRUK DJUY'YUNARA 5

Ŋuriŋi märr-yuwalkthinyarayu yana ŋilimurru yurru djulkmarama munatha'wuynhanydja nhänha malaŋunha.

1Yo, nhumanydja dhuwala nhanŋuway Godku yana yumurrku', ŋunhi nhuma yukurra yuwalkkuma märr-yuwalkthirrinydja Djesunha, ŋunhi ŋayinydja yuwalk yana ŋayipi Christ, Godkuŋu djuy'yunarawuy ŋunhi. Yo, ŋunhi nhe ŋuli märr-ŋamathirrinydja yolŋuwu bäpa'mirriŋuwu, ga nhenydja yurru bitjandhi liŋgu märr-ŋamathirriyi ŋurikalaŋuwuyi yothu'wunydja yana. 2Ga ŋunhi ŋilimurru ŋuli yukurra märr-ŋamathirri Godku, ga dhäruk ŋanya märramanydja yukurra, ŋalinydja yurru märr-ŋamathirriyi Godkalaŋumirriwu yumurrku'wunydja bukmakku yana miṯtjiwu. 3Yo, ŋunhi ŋali yuwalkkumanydja märr-ŋamathirri yukurra Gunhu'wu Godku, ŋali yurru yukurra ŋayathama ŋunhiyi romnha nhanŋu baṯ bitjanna, ga romdja ŋunhiyi ŋayi nherrara ŋitjalaŋgu, yaka ŋunhiyi ḏälnydja ga ŋonuŋdja, yaka ŋitjalanha yukurra ŋula djawar'-wekama ŋuriŋiyi. 4Liŋgu ŋunhinydja nhä malanha ŋunhi ŋuli dhawaṯthun yukurra Godkala, ŋunhiyinydjayi djuḻkmaramana marrtji munatha'wuynhanydja nhänha malaŋunha, ga nhenydja yurru djuḻkmarama yukurra munatha'wuynhanydja dhiyakuynhanydja romnha märr-yuwalkthinyarayuna yana. 5Yakana yurru ŋula yol yolŋu djuḻkthun gänanydja nhanukalaynydja ŋayi ganydjarryu be; ŋuriŋiyi liŋgu yolŋuyu djuḻkmaramanydja yurru dhiyakuynha munatha'wuynydja romnha ŋunhi ŋayi ŋuli märr-yuwalkthirri yukurra Djesunha, ŋunhi ŋayinydja Gäthu'mirriŋu nhanŋu Godku.

6Liŋgu Djesu-Christtja ŋayipinydja marrtjinayi lili dhipala munatha'lilinydja, ga marrtjinanydja ŋayi gapukurru ga gulaŋgurru, märrma'kurru. Yuwalk muka ŋayi ḻiya-ḻupthurruna gapuyunydja, bala ŋayi Gunhu'yunydja ḻakaraŋala ŋanya, “Dhuwaliyina ŋarraku Gäthu'mirriŋunydja,” bitjarra. Yurru yaka ŋayi ŋunhi yana ḻiya-ḻupthurruna ga liŋguna; ŋuliŋuruyi dhäŋuru ḻiya-ḻupthunaraŋurunydja nhanŋu gulaŋdja waṉḏinayi walŋakunharawu ŋitjalaŋgunydja. 7Yuwalk ŋunhiyinydja. Ŋali marŋgina liŋgu ŋuriŋi Godkalanydja Birrimbirryu Garrkuḻukthunydja warraŋulkumana yukurra maḻŋ'maramana ŋunha ŋayaŋuŋuranydja ŋitjalaŋgala, ga ŋunhiyi Godku Garrkuḻuktja Birrimbirr yuwalk ŋayi, yakana ŋayi yurru bothirrinydja ḻakarama. 8Yo, ŋuriŋiyi ḻurrkun'thunydja malaŋuyu ŋayi yukurra Godthunydja ḻakaramana ŋanya Djesunha, ŋuriŋiyi Garrkuḻukthu Birrimbirryu ga gapuyu ga ŋuriŋi gulaŋdhu, ga dhiyaŋuyi malaŋuyu ḻurrkun'thunydja yukurra ḻakarama ŋunhiyi liŋgu ŋupanayŋu yana waŋganynha, ŋunhi Djesunydja Gäthu'mirriŋu Godku nhanŋuway. 9Ŋunhi ŋayi ŋuli yolŋuyu marŋgiŋuyu ḻakarama yukurra dhäwu', ŋalinydja yurru ŋunhiyi märr-yuwalkthirri muka, yurru ŋayinydja Godtja biyapul wal'ŋu ŋunha-bala bathala, wakin wal'ŋu yolŋuwalanydja. Ŋalinydja yurru yana ŋaḏupthunna ŋurikiyi dhäwu'wu ŋunhi ŋayi yukurra Godthu ŋayipina ḻakarama ŋitjalaŋgu, ga ŋayi yukurra ḻakarama Djesunhanydja bitjanna, “Ŋayinydja ŋarraku ŋunhi Gäthu'mirriŋu yana.” 10Ga ŋunhi nhe ŋuli märr-yuwalkthirrinydja yukurra Djesuwu ŋuriki Gäthu'mirriŋuwu Godkalaŋuwunydja, nhenydja yurru marŋgiyirri ŋunha ŋayaŋu nhuŋu, ŋunhi ŋayinydja yuwalk yana wal'ŋu Gäthu'mirriŋu Godku nhanŋuway. Ga ŋuli nhe yurru yakanydja märr-yuwalkthirri Godku, ŋunhi nhaltjan ŋayi yukurra waŋa Djesunha ḻakarama, ŋunhiyinydjayi bitjan nhe yukurra ḻakarama Godnhanydja bothinyaramirrina, liŋgu yaka warray nhenydja märr-yuwalkthirri yukurra nhanŋu Godku, ŋunhi ŋayinydja yukurra ḻakarama warraŋulkuma dhika wal'ŋu yana ŋanya Djesunha. 11Liŋgu Godthu ḻakarama yukurra bitjan, “Liŋguna ŋarra wekaŋalanydja ŋunhi yuwalkŋunydja wal'ŋu walŋa nhumalaŋgu, yurru märramanydja nhuma yurru ŋunhiyi walŋanha ŋuliwitjan ŋarrakalaŋuwala Gäthu'mirriŋuwalana, waŋganygalana yana.” 12Yo, ŋunhi nhe liŋguna märraŋalana Godkunydja Gäthu'mirriŋunha, liŋguna nhe ŋayathama yukurra ŋunhi yuwalkŋunydja walŋa, bala nhe yurru nhinanydja yukurra walŋana yana gupaḏalnha-wala. Ga ŋunhi ŋayi ŋula yolthu yolŋuyu yakanydja märraŋala Godku Gäthu'mirriŋunha, yakanydja ŋayi yukurra nhina Djesu ŋurikala yolŋuwala ŋayaŋuŋura, ŋunhinayi yolŋu ŋayaŋu-rakunydja, yakanydja ŋayi ŋayathama yukurra yuwalkŋunydja walŋa.

Ḻakarama yukurra gupaḏalŋuwuynha walŋawuy

13Yurru nhumanydja märr-yuwalkthirri yukurra yana Godkalaŋuwala Gäthu'mirriŋuwala, bala ŋarra wukirrina nhumalaŋgu dhuwala yulŋunydja, märr yurru nhuma marŋgiyirri ŋunhi nhumanydja liŋguna märraŋalana yuwalkŋunydja walŋanha, bala nhuma yurru nhinanydja yukurra gupaḏalnha-wala yana. 14Godtja dhuwala märr-yuwalkthinyaramirri ŋayi, ga ŋunhi ŋali yurru ŋäŋ'thundja ŋanya ŋula nhäku nhanukalay djälkurrunydja yana, ŋayinydja yurru ŋämana ŋinyalanha. 15Yo, ŋäŋ'thundja ŋali yurru ŋula nhäkunydja, ga ŋayinydja yurru ŋämana, bala ŋali marŋgina ŋunhi ŋali märraŋalana liŋguna ŋunhiyinydja ŋunhi nhäku ŋali ŋäŋ'thurruna ŋanya.

16Ŋuli yurru nhe yolŋunha nhäma Garraywalaŋumirrinha, ŋayi djäma yukurra ŋuli yätj, nhenydja yurru bukumirriyaŋa ŋurikiyinydjayi yolŋuwu dhuwurr-yätjkunydja, märr yurru ŋayi ŋanya Godthunydja walŋakuma muka. Ga ŋunhi ŋayi yolŋu liŋgunydja dhaḻ'yunminanydja ŋanyapinyay ŋayi buthuru, liŋgu ŋayi yaka djäl Godkalaŋuwu romgu, ŋuriŋiyinydja yätjthu ŋanya gäma yukurra rakunydhinyaramirrililina. Yakana ŋurikiyinydjayi nhe yurru bukumirriyaŋa, liŋgu ŋuriŋiyinydjayi yolŋuyu liŋguna djarr'yurruna ŋayi yurru yakana Godnha dhäruk-märrama; yakana yurru Godthu ŋanya ŋunhiyi walŋakuma. Yurru wiripuŋuyunydja yolŋuyu ŋuli djäma yätj, liŋgu ŋayi yaka marŋgi Godku, ga ŋurikiyinayi yolŋuwu nhe yurru bukumirriyaŋanydja, märr yurru ŋanya Godthu walŋakumana. Yo, wiripuŋuyunydja ŋuriŋiyi yätjthu ŋuli yolŋunha gäma rakunydhinyaramirrililina yana; yaka nhe yurru ŋurikiyinydjayi bukumirriyaŋa. 17Bukmakthu nhäyunydja malaŋuyu yätjthunydja yukurra yarrkmaramana ganaŋ'maramana ŋilimurrunha Godkalanydja, yurru Godthunydja bäy-ḻakarama warray yurru ŋuriki yolŋuwu, ŋunhi ŋayi yurru ŋäma rirrakay Godnha, bala ganandja yurru nhanŋuway yätj; ŋunhiyinhanydjayi yolŋunha yurru ŋayi Godthunydja walŋakuma, yakana ŋayi yurru ganaŋ'thun Godkalanydja gupaḏal.

18Yo, dhiyakuna ŋilimurru marŋginydja gam': Dhäŋuru ŋuliŋurunydja ŋunhi ŋali walŋathinana ŋuriŋi Godkala walŋayu liŋguna, ŋalinydja yaka ḏukṯukthirri yätjkunydja. Yakana yurru ŋali biyapul djäma yätj, liŋgu ŋali ŋunhi yumurrku' Godkuna nhanŋuwaynha, ga ŋayinydja yukurra Godkunydja Gäthu'mirriŋu djäka ŋitjalaŋgu, gunganhamarama yukurra ŋitjalanha, märr ŋayi yurru ŋuriŋiyinydja yätjthunydja Mokuyyu yakana ŋitjalanha dhanu'yun.

19Yo, liŋguna ŋali marŋgithinana, ŋalinydja dhuwala nhanŋuwaynha wal'ŋu yana Godkuna yumurrku', ga nhina ŋali yukurra nhanukalana ŋarambiya'ŋura, bäyyi ŋunhi dhuwala munathany'tja wäŋa bukmaknha yana nhanukala ŋurikalayi yätjkala goŋŋura.

20Ga bitjarrayi ŋilimurru marŋgithina ŋurikinydja ŋunhi Godkunydja Gäthu'mirriŋu marrtjina lili dhipala munatha'lilinydja wäŋalili, bala ŋayi maḻŋ'maranharaminana ŋanyapinyay ŋayi liŋguna ŋilimurruŋgalaynydja, märr yurru ŋilimurru marŋgiyirri nhanŋu, ga dharaŋan ŋanya ŋunhi ŋayipina yuwalktja wal'ŋu waŋarr God. Ga ŋalinydja yukurra nhina ŋunhiliyinayi yuwalkŋuŋurana, liŋgu ŋali waŋganynha dhambay nhanukalaŋuwala Gäthu'mirriŋuwalana yana, Djesu-Christkalana. Yo, ŋayipina yuwalktja wal'ŋu God yana, ga dhambay-manapanmirrina nhanukala ŋalinydja yurru nhina yukurra gupaḏalnha-wala yana.

21Yumurrku' ŋarraku, dharray walala yulŋunydja. Yaka waŋarrkuŋa dhiyakuy munatha'wuynhanydja nhänha malaŋunha, ga yaka yana nhänydja malanha nherrala ŋäthilinydja. Ŋurruŋukuŋa ŋanyana Djesunhana ŋäthilinydja, ga märr-ŋal'yurra nhanukiyingala yana waŋganygala. Ga liŋguna dhuwala.