gnnNTOTPO

PSALMS 103

Ŋayaŋu-ŋamathinyara Godku

103:1-22 (The love of God)

1Ŋarranydja liŋguna djarr'yurruna,

ŋarra yurru wokthun nhanŋu Garraywuna;

Bukmakthu ŋarrakalay ŋayaŋuyu ŋarra yurru wokthunna nhanŋu,

liŋgu yäkunydja ŋayi djeŋarra' warray walŋu, biyapul warray-wala wiripu-guḻku'walanydja.

2Bitjanna liŋguna ŋarra yurru wokthun nhanŋu Garraywu,

ga yakana ŋuli meṉgumanydja nhaltjan ŋayi ŋuli yukurra ŋarranha gäma ḻatju'kuma dhika walŋu.

3Ŋayi biḏiwiḏitjkuma marrtji bala ŋuli ŋarrakala yätj malanha,

warrpam ḏarrtjalkkuma ŋarranha,

ga ḏukthunmarama ŋayi ŋuli ŋarranha marrtji bala,

baḏarraŋ'kuma birrka'mirriŋuru rerriŋuru,

4Ŋarranha ŋayi ŋuli walŋakuma rakunydhinyaraŋuru,

ga nhinanydja ŋarra yukurra walŋana yana nhanukalana djäkaŋura.

Ga monyguma ŋarranha ŋayi ŋuli märr-ŋamathinyarayu,

nhanukalay ŋayi ŋoy-wuyunaramirriyu ŋuli yukurra ŋarranha gäma ḻatju'kumana.

5Ŋayi ŋarranha ŋuli maranhu-wekama ḻatju'mirriyu nhäyu malaŋuyu,

yuṯana yana ŋarra ŋuli yukurra nhina ḏälnha, bitjan ŋuli ḏamala,

bili nhanukala goŋŋura Garraywala.

6Wiripuŋuyu yolŋuyu ŋarranha mak wakinŋu-ḻakarama yukurra,

yurru Garraynydja ŋarrakala galiŋura;

ŋayi ŋarranhanydja yukurra gäma ŋamathama dhika walŋu.

7Ŋäthili baman' ŋayi milkuŋala nhanŋuway ŋayi dhukarr ŋurikala ḏarramuwala Mawtjitjkala,

ga bukmakthu yolŋu'-yulŋuyu bäpurru'yu Yitjuralpuyŋuyunydja nhäŋala Garraywu ḻatjuny'tja djäma nhanukala Mawtjitjkala.

8Garraynydja dhuwala mel-wuyunaramirrina,

bitjanna liŋguna ŋayi yukurra ŋayaŋu-ŋamathirrinydja ŋilimurruŋgu.

Yakana ŋayi ŋuli dhika waḏutja ŋaramurryirri;

djäkana ŋuli ŋamathamana, gel'yunna gäma.

9Wiripunydja ŋayi ŋilimurrunha ŋuli waŋa raypirri'yun yätjŋuru,

yurru yaka gupaḏalnydja ŋayi ŋuli ŋilimurrunha murr'marama,

ga yaka ŋayi ŋuli weyinmaramanydja gäma ŋunhi nhanŋuway ŋayi ŋaramurr.

10Wiripunydja ŋilimurru ŋuli ŋanya buma ŋayaŋu-yätjkuma ŋuriŋi ŋilimurruŋgala yätjthu,

yurru Garraynydja ŋuli yaka buku-ruŋiyirri ŋilimurruŋgu, buma ŋitjalanhanydja.

11Godkunydja märr-ŋamathinyara dhiŋgina, bena-wala birr';

wirrki ŋayi yukurra märryu-ḏapmarama märr-ŋamathinyarayu ŋunhinhanydja walalanha ŋunhi walala dhäruk-märranharamirri nhanŋu;

12Liŋguna ŋayi yarrkyarrkmaraŋala ŋilimurruŋgu yätjtja dhuwurr,

barrkulilina wuyupmaraŋalana, bena-wala birr' ŋilimurruŋgala.

13Yo, Garraynydja yukurra wuyun ŋilimurruŋgu,

bitjandhi bitjan ŋuli yolŋu mäḻu'mirriŋu wuyun nhanukalayŋuwu gäthu'mirriŋuwu.

14Bili ŋayi marŋgi ŋilimurruŋgu, ŋunhi ŋilimurrunydja dhuwala munatha',

munatha' muka ŋayi yolŋukuŋala djämanydja.

15Yolŋunydja dhuwala yaka yurru weyin yukurra nhina dhiyala munathaŋura,

gurririŋu yana nhanŋu walŋanydja, balanyara bitjan mulmu.

Mulmu ŋuli ŋuthan ḻatju'thirri,

16bala ŋuli watayunydja bo'yun, buṯthunmaramana,

ḏaŋgalkmaramana ŋuli winya'yunmaramana;

Yakana biyapulnydja yurru nhäma ŋunhiyi ŋula yolthu.

17Yurru Garraywunydja märr-ŋamathinyara yakana ŋuli winya'yun;

Bitjanna liŋguna Garraynydja yukurra ŋayaŋu-ŋamathirri ŋurikinydja walalaŋgu yolŋu'-yulŋuwu,

ŋunhi walala borrk-barrarirri yukurra nhanŋu;

Walalaŋgu ŋayi yukurra ŋayaŋu-ŋamathirrinydja, ga yumurrku'wu walalaŋgalaŋuwu,

ga walalaŋgalaŋuwu yumurrku'walaŋuwu yumurrku'wu.

18Bitjanna liŋguna ŋayi yukurra yurru guyaŋirrinydja ŋunhiyi walalanha,

ŋunhi walala yukurra ḏälkuma rom nhanŋu,

ŋunhi walala yukurra dhärukku malthun nhanŋuway.

19Garraynydja yukurra nhina ŋunha djiwarrŋurana,

djiwarrny'tja ŋunha nhanŋuwayŋga wäŋa;

Ŋayiŋga ŋunha ŋurruŋunydja buŋgawanydja,

nhanukalaynha goŋŋura ŋorra yukurra nhä malanha bukmak.

20Wokthurra Garraywuna, nhuma djiwarr'wuynydja yolŋu'-yulŋu,

ŋunhi nhuma dhäruk-märranhamirri nhanŋu.

21Wokthurra Garraywuna, nhuma djämamirrinydja walala nhanŋu,

ŋunhi nhuma djäma yukurra nhanukalay djälkurru.

22Wokthurra Garraywuna, nhumanydja walala birrka'mirriŋura wäŋaŋura,

bukmak nhä malanha ŋunhi ŋayi bokmara nhumalanha.

Wokthurrana walala,

ga bitjandhiyi liŋgu ŋarranydja yukurra wokthundhi nhanŋu Garraywu,

gupaḏalnha-wala yanana yurru.