gnnNTOTPO

Exodus 13

1Bala Garray waŋana Mawtjitjkala bitjarra gam', 2“Ŋarrakunydja nhe yurru gulk-gulkthurra barrkuwatjkuŋa yolŋu'-yulŋunha maḻamarrmirrinha yana, ga wäyinnha walalanha maḻamarrmirrinha, liŋgu bukmak yurru maḻamarrmirrinydja ḏarramuwurru ŋarrakuwaynha yana, bitjanna liŋguna yurru weyinŋumirrina.”

3-4Bala ŋayi Mawtjitjthunydja ḻakaraŋalana yolŋu'-yulŋuwalanydja bitjarrana, “Yaka meṉguŋa dhuwalayinydja walu ŋunhi nhuma dhawaṯthurruna ŋulaŋuru Yetjipŋuru. Guyaŋiya ŋunhiyi ŋunhi nhuma yukurrana garrpiṉara nhinana ŋonuŋdhu ŋuriŋi romdhu, Yurru ŋayi Godthunydja nhumalanha ŋuliŋuruyi dhawaṯmaraŋalana nhanukiyingalana ŋayi walŋu yana ganydjarryu. Ga ŋunhi nhuma yurru waŋgany-manapanmirri ḻuŋ'maranharamirri guyaŋinyarawunydja, nhuma yurru ḻukanydja yukurra ruwaŋga'miriw ŋathanydja yana. 5-7Nhuma yurru mukthun yana-wala marrtjina yukurra dhipuŋuru wäŋaŋurunydja, bala ŋayi yurru Garrayyunydja Godthunydja gämana nhumalanha ŋunhamalayina wäŋalili ŋunhi ŋayi dhawu'mirriyaŋala nhumalaŋgalaŋuwala märi'muwala. Ŋunhayinydjayi wäŋa ḻatju' dhika walŋu, ŋatha guḻku'mirri ga guku guḻku'mirri, ga wäŋanydja ŋunhiyi yurru nhumalaŋguwaynha gupaḏalnha-wala, bäy ŋunhi yukurra wiripunydja miṯtji bäpurru' nhina ŋunhiliyi wäŋaŋura. Ga ŋunhi nhuma yurru gulŋiyirrinydja ŋunhiwalayi wäŋalili, nhumanydja yurru ŋayathamana yana dhuwalayi romdja yukurra, ga djämanydja yurru bitjanna liŋgu dhuŋgarra-ŋupanna. 8-10Bala nhuma yurru ḻakarama nhumalaŋgalaŋuwu yumurrku'wunydja, marŋgikuŋanydja biyaka gam', ‘Garrayyu ŋarranha walŋakuŋalanydja, ŋayi märraŋala ŋilimurrunhanydja dhawaṯmaraŋala Yetjipŋuru nhanukalay ŋayi yana ŋuriŋi ganydjarryu walŋu, ga dhiyakuna märrwu ŋunhi ŋilimurru ŋuli djäma yukurra bitjandhinydja dhuŋgarra-ŋupan, märr yurru ŋilimurru guyaŋirrina yukurra bitjanna liŋguna gupaḏalnha-wala, ga yakana buku-dhumukthirrinydja meṉgumanydja.’

11-13“Yo, yuwalk yana Garrayyu yurru gämanydja nhumalanha ŋunhimalayi wäŋalilinydja, ŋunhi walala yukurra Gaynanbuyŋu nhina ŋunhiliyi. Ŋunhiyinydja yurru nhumalaŋgu yana wäŋa, liŋgu Garrayyu dhawu'-nherrara ŋunhiyinydja wäŋa nhumalaŋgalaŋuwala märi'muwala walalaŋgala. Ga ŋunhi nhuma yurru gulŋiyirrinydja ŋunhimalayi wäŋalilinydja, nhuma yurru ganaŋ'maraŋa maḻamarrnhanydja ḏarramunha yothu'nha, ŋayinydja yurru ŋunhiyi nhanŋuway yana Godku yolŋunydja, yurru nhenydja buku-ruŋinyamarama bäyim yolŋunydja ŋanya, märr yurru ŋayi nhina walŋathirri. Ga bitjandhi yana liŋgu ŋurruŋu maḻamarr wäyindja yurru nhanŋuway yana Godku, nhuma yurru wekama bathan ŋunhiyinydja wäyin nhanŋuwuy Garraywu. 14Ga ŋunhi yurru nhokala gäthu'mirriŋuyu dhä-wirrka'yun nhuna bitjandja ŋula, ‘Nhä dhuwalanydja rom mayali'?’ Ga nhenydja yurru ḻakaraŋa nhanŋu biyaka gam', ‘Garrayyu ŋunhi maḻamarrmirrinhanydja walalanha walŋakuŋala warray, ŋurrwu'yunmaraŋala gulaŋdhu warray ŋuriŋiyi, ŋulinyaramirriyu ŋunhi ŋayi Garrayyu ŋilimurrunha dhawaṯmaraŋala ŋulaŋuru Yetjipŋuru, ŋunhi ŋilimurru nhinana yukurrana ḏirrwiḏirrwiŋura walalaŋgala ŋäthili. Ŋayi dhawaṯthunmaraŋalanydja ŋilimurrunha nhanukalay ganydjarryu wuṉḏaŋarryu, ŋutu'yuna ganydjarryu. 15Ŋunhi ŋayi yukurrana Yetjippuyŋuyu buŋgawayu baṯ bitjarra mulkana ŋilimurrunha, ga yakana ŋayi ŋilimurrunha ŋula djuy'yurrunanydja, bala Garrayyunydja marrtjina bumara rakunyguŋala warray Yetjippuyŋunhanydja maḻamarrmirrinha ḏarramuwurrunha yolŋu'-yulŋunha ga wäyinnha walalanha, walala bukmakthinana murrmurryurrunanydja, yurru ŋayi walŋakuŋalanydja Yitjuralpuyŋunha warray maḻamarrmirrinha, yaka warray murrmurryurruna walalanydja. Yo, ŋurru'-ŋurruŋunydja ŋunhi maḻamarrmirri yolŋu'-yulŋu ga wäyin walala nhanŋuwaynydja yana Garraywuna, ga dhiyakuna ŋayaŋuwu ŋarra ŋuli Godkuna wekama ŋunhiyi ŋurruŋunhanydja wäyinnha maḻamarrnhanydja, ga ŋurruŋunhanydja gäthu'mirriŋunha maḻamarrnhanydja ŋarra ŋuli buku-ruŋinyamarama warray bäyim, liŋgu ŋayi ŋunhi Godkuna nhanŋuwaynha yana. 16Ga dhiyaŋuyi romdhu ŋilimurru yukurra yurru bitjanna liŋgu guyaŋirrina Garraynhanydja, ŋunhi ŋayipi ŋilimurrunha dhawaṯmaraŋalanydja ŋulaŋuru Yetjipŋurunydja, nhanukalaynha ŋayi ŋutu'yuna ganydjarryu.’ ”

Godthu ŋurru-warryurruna Yitjuralnhanydja ŋanhdharkkurruna dhukarrkurru

13:17-22 (God led his people through the desert)

17Yo. Ŋunhi ŋayi buŋgawayu gukuŋalanydja Yitjuralnha ŋulaŋuru Yetjipŋuru, bala ŋayi Garrayyu yukurrana gäŋalanydja walalanha wäŋalili ŋunhimalana ŋunhi ŋayi ŋäthili dhawu'mirriyaŋala nherrara walalaŋguway yana, yurru yakana ŋayi gäŋala walalanha ŋuliyinydja ŋunhi gurriri marrtji dhukarr bala ŋorra, ŋunhiyinydja walala bini marrtjinya Bilitjiyawuykurrunydja wäŋakurru. Ŋayi Garraynydja waŋana bitjarra, “Yaka walala yurru marrtji balakurrunydja-wala. Ŋuli walala gonhana ŋula miriŋunhana nhäŋu, walalanydja mak ŋuli gundupuŋu roŋi'-ruŋiyina balayi Yetjipliliyi.” 18Bala Garrayyu gäŋalanydja walalanha wiripuŋukurruna dhukarrkurru, yolŋumiriwkurruna yana wäŋakurru.

Yo, yolŋu'-yulŋuyu ŋuriŋi Yitjuralpuyŋuyunydja gutjkutjurruna mariwuy gara ŋunhi walala gonha'yurruna ŋunha Yetjippuynydja. 19Ga bitjarrayi liŋgu ŋayi Mawtjitjthu gäŋalayi Djotjipnhanydja ŋaraka, liŋgu ŋayi Djotjip dhä-ŋäthiliŋga waŋananydja yukurrana, yurruna ŋayi rakunydhina; ŋayi ḻakaraŋala Yitjuralpuyŋuwala bitjarra gam', “Garrayyu yurru nhumalanha withiyandja, dhawaṯmaramanydja dhipuŋuru, ga ŋunhi yurru nhuma ganandja dhuwala Yetjiptja wäŋa, ga gäŋayi ŋarranha ŋarakanydja dhipuŋurunydja wäŋaŋuru.” Bala yuwalkthi Mawtjitjthu märraŋala Djotjipnha ŋarakanydja, bala djaw'yurrunana.

20Yo, baḏak walala yukurrana marrtjinaŋga yana bala-a-a, yana liŋgu ŋunhala gandarrŋura walala yuku'-yukurrana galki ŋunhili wiraŋŋura wäŋaŋura, 21ga bitjana liŋgu ŋayipi Garrayyunydja ŋuli yukurranha walalanha ŋurru-warryuna. Ŋayi nherrara Maŋan ŋurrulilinydja walalaŋgu, ga ŋayinydja ŋunhilimiyi maŋanŋuranydja ŋurru-warryuna walalanha marrtjinya ŋuli walu-ŋupana ga munha-ŋupana, liŋgu munhakunydja ŋuli ŋunhi waŋupini gurthayinyana, djarraṯawun'nha walalaŋgu wekanha, bala walala ŋuli yukurranha marrtjinyana walupuy ga munhaku. 22Yo, maŋandja ŋunhiyi yakana ŋula yarrkthuna ŋurikala yolŋu'-yulŋuwalanydja; bitjanana liŋguna mel-warryunana walalanha yukurranha ŋuli.