Djatjuwana djarr'yunara Godkuŋunydja nherraṉara ŋurruŋunydja
27:12-23 (Joshua was appointed to be leader after Moses died)
12-13Bala ŋayi Garraynydja waŋanana Mawtjitjkala bitjarrana, “Marrtjiya bala bukulili wal'ŋu ŋunha ya'. Ŋuliŋuruyinydja nhe yurru nhämana marrtji wäŋana, ŋunhina wäŋa ŋunhi ŋarra yurru wekama Yitjuralwu miṯtjiwu, yana nhe yurru nhämana marrtji yulŋunydja ŋunhiyi wäŋanydja, yurruna nhe yurru rakunydhirrinydja. Yo, nhuŋu wäwa'mirriŋu Yärundja liŋguna rakunydhina, ga nhenydja yurru bitjandhi liŋgu rakunydhirri dhiyalana gay', yakana nhe yurru gulŋiyirri ŋunhiwalayinydja wäŋalili, 14liŋgu nhuma maṉḏa nhepi ga Yärun, yaka nhuma ŋarraku dhäruk märraŋala ŋunhala ŋunhi wäŋaŋura yäkuŋura Miripa. Bukmakthu yolŋuyunydja walalay yukurrana morrumurruny'tja ŋarranha. Walala bini nhänha muka ŋarraku ganydjarr bathalanydja, yurru nhumanydja yaka warray ŋunhiyi waŋananydja dhäruktja, märr bini ŋunhiyi gapunydja waṉḏinyana yana ŋuliŋuruyi guṉḏaŋuru ŋuriŋina liŋgu ŋarrakalaynha wal'ŋu ganydjarryu.”
15-16Bala ŋayi ŋuliŋuruyinydja Mawtjitjtja bukumirriyaŋalana bitjarrana, “Garray, nhepina dhuwala walŋa-wekanhamirrinydja, nhokalaynha yurru walŋanydja yukurra marrtji. Garray, nhepina yurru djarr'yurranydja yolŋunhanydja ŋunhi yurru ŋayi ŋurruŋuna ŋuriki yolŋu'-yulŋuwuna bukmakkuna, dhäŋuru dhipuŋurunydja ŋunhi ŋarra yurru rakunydhirri. 17Djarr'yurranydja ŋunhiyi yolŋunhanydja ḏarramunhanydja ŋunhi walala yurru märr-yuwalkthirri, märr-nherraṉmirri gal'ŋu nhanukala, märr yurru walala dhäruk marrtji märrama ŋanya bala, märr yurru walala djuḻkthun ŋurikiyi miriŋuwunydja. Ŋarranydja ḏukṯuk nhokalaŋuwu yolŋu'-yulŋuwu, walala yurru nhina waŋgany yana ŋurruktja, dhapirrk yana, yaka barrku'-barrkuwatjthirri, bitjan ŋuli wäyin mala ŋunhi bembi djäkamiriwŋura.”
18Bala ŋayi Garraynydja waŋana bitjarra Mawtjitjkala, “Garr'yurranydja nhe yurru Djatjuwanha, liŋgu ŋarrakunydja walŋamirrinydja Birrimbirr nhina yukurra nhanukala. Gäŋanydja ŋanya garr'yurranydja bala Ŋurruŋuwala Ḏalkarra'mirriwala yolŋuwala, Layatjawala yäkuwala, bala nhe yurru goŋ-ŋal'yunna nhanukala muḻkurrlilina. 19Ga ŋunhalayinydja maŋutjiŋura bukmakkalanydja nhe yurru waŋa bitjanna, “Dhuwalanydja gay' ḏarramu djarr'yunara nhanukuŋuwaynha yana Godkuŋuna, ŋayina yurru dhuwalayinayi nhumalaŋgu ŋurruŋunydja.”
20Ga biyapul ŋayi Garray waŋana Mawtjitjkala bitjarranydja, “Dhipuŋurunydja-wala yakana yurru nhepinydja yukurra gänanydja ŋurruŋu nhina, nhuma maṉḏa yurru rrambaŋina djingaryundja ŋurruŋunydja walalaŋgu, märr yurru ŋuriŋiyi yolŋu'-yulŋuyu Yitjuralpuyŋuyunydja miṯtjiyu dhäruk märrama ŋanya Djatjuwanhanydja. 21Bala ŋayi yurru Djatjuwayunydja ŋäŋ'thun guŋga'yunarawu nhanŋuway ŋayi ḏalkarra'mirrinhana, bala ŋayi yurru ŋuriŋiyi ḏalkarra'mirriyunydja yolŋuyu maḻŋ'marama marrtji Garraywuna djäl, nhäku ŋayi Garray ḏukṯuk walalaŋgu djamäwu, bala ŋayi yurru ŋuriŋiyi ḏalkarra'mirriyunydja ḻakaramana Djatjuwawalanydja ga ŋurikala yolŋu'-yulŋuwala, bala walala yurru malthunna yana dhärukku ŋurikinydja ḏalkarra'mirriwunydja.”
22Bala ŋayi Mawtjitjthunydja märraŋalana yana dhäruktja, nhaltjarra ŋayi Garrayyu ḻakaraŋala yukurrana nhanukala. Märraŋalana ŋayi ŋunhiyi Djatjuwanhanydja, bala nherrarana ŋanya maŋutjimara ŋurikala ḏalkarra'mirriwala ga bukmakkalana. 23Goŋ-ŋal'yurrunanydja ŋayi Mawtjitj ŋunhi Djatjuwawala muḻkurrlilinydja, bala ŋayi waŋanana ŋuriki yolŋu'-yulŋuwunydja bitjarrana, “Dhuwalana gay yolŋu yurru nhumalaŋgu ŋurruŋunydja dhurrwaraŋuru ŋuliŋurunydja ŋunhi ŋarra yurru rakunydhirri. Nhumanydja yurru malthun dhiyakunayi yolŋuwunydja yuwalkkuma yana.”