gnnNTOTPO

PSALMS 121

Garray dhuwala ŋilimurruŋgu watjarrŋu

121:1-8 (The Lord our protector)

1Yolthu yurru ŋarranha guŋga'yundja?

Wanhaŋuru dhika?... Ŋulaŋuru bukuŋuru gay'?

2Garray yana ŋayipi ŋarraku guŋga'yunaramirri,

ŋunhiyi ŋunhi ŋayi bokmarama djiwarr' ga munatha' wäŋa dhuwala.

3Yakana ŋarra yurru galkirri,

bili ŋayina ŋarranha yukurra mulka, wuṉḏaŋarrkuma ŋuli.

4Bitjanna liŋguna ŋayi ŋuli mukthunna djäka;

yaka warray ŋayinydja ŋuli ŋorra, ŋula gonha'yun.

5Yo, Garraynydja dhuwala watjarr-mulkanharamirri ŋilimurruŋgu,

ŋayinydja dhuwala dhika ŋayi bäyma galki,

monyguma yukurra ŋilimurrunha gunganhamirriyama ŋula nhäŋuru malaŋuŋuru.

6Yakana nhuna yurru waluyu räwakkuma,

ga munhakunydja yakana ŋuli ŋula nhuna baymatthurru warumuktja;

Yakana yurru nhuna ŋula nhäyu buma,

bili nhenydja Garraywala goŋŋura.

7Ŋayi ŋuli nhuŋu yukurra gungama ŋula nhäŋuru yätjmirriwalanydja walalaŋgala,

djäka yukurra ŋuli nhuŋu, walŋakuma nhuna.

8Nhe yurru marrtji ŋula wanhamala barrkulili,

ga ŋayinydja yurru Garray nhuŋu djäka yukurra;

Ga roŋiyirri nhe ŋuli marrtji liliyi,

mukthun yana ŋayi nhuŋu yurru Garraynydja marrtji goŋ-nherraṉmirri.

Bitjanna liŋgu nhe yurru marrtji walŋana yana,

dhiyaŋu-wala ga bitjanna liŋguna, weyinŋumirrina-wala yurru.