gnnNTOTPO

Isaiah 12

Dhuwalanydja manikay wokthunarawuna ŋilimurruŋgalaŋuwu Walŋakunharamirriwu

12:1-6 (Song of praise to God our Saviour)

1Yo, yalalaŋumirriyunydja ŋunhinydja yolŋu'-yulŋu yurru miyaman dhuwalana manikay gam',

“Garray, ŋarra yurru wokthunna nhuŋu.

Ŋäthilinydja ŋunhinydja nhe ŋaramurryina ŋarraku,

yurru dhiyaŋunydja-wala ŋunhiyi ŋaramurrnydja ŋanydjaḻa'yurrunana,

bitjarra nhe ŋarranha marrparaŋ'kuŋalana.

2Godtja ŋunhi ŋarraku walŋakunharamirri,

ŋarra yurru ŋayaŋu-nherraṉmirrinydja nhanukalaynha yana, ga yakana barrarirri.

Garraynydja dhiyalaŋumina gay' ŋarrakala ŋayaŋuŋurana,

ga ŋayina ŋarraku ganydjarrnydja;

ŋarraku ŋayaŋunydja djulŋithirri yukurra miyamanna,

liŋgu ŋayi ŋarranhanydja walŋakuŋala.

3Ŋayaŋu-djulŋithirrina ŋarra ŋuli wurkthundja ŋunhiyi walŋanydja gapu, ŋunhi wekanhara nhanukuŋuwaynha yana Garraywuŋuna,

liŋgu ŋayipi ŋarraku walŋakunharamirrinydja.”

4Yo, ŋuriŋiyinydjayi waluyu nhuma yurru waŋa bitjan,

“Wokthurrana walala Garraywu. Wäthurra nhanukala, ga ŋayinydja yurru nhuna guŋga'yunna.

ḻakaraŋa birrka'mirriwana yolŋu'-yulŋuwanydja nhaltjarra ŋayi Garrayyu djäma ŋamakurru' walŋu.

ḻakaraŋanydja ŋanya biyaka nhäyinyara ŋayi, biyapul walŋu bathala.

5Buku-ŋal'yurranydja manikayyu manaparra nhanukala Garraywalanydja,

liŋgu yuwalk yana ŋayi djämanydja mirithirri walŋu, ḻatju' dhika ŋanya;

bukmak dhuwala munatha' wäŋa ḻiw'marama yurru yolŋu'-yulŋunydja wokthun nhanŋu yäkuwunydja ŋunhi ŋayi bathala yäku.

6Nhuma yolŋu'-yulŋu ŋunhi nhuma Djurutjalambuy, ma' yiŋgathiya biyakana Garraywu,

miyamalana manikaynha wokthurrana manaparra,

liŋgu Garray Godtja biyapul warray dharrpal walŋu nhumalaŋgu,

ga nhinanydja ŋayi yukurra dhuwali ṉapuŋga'na nhumalaŋgala.”