gnnNTOTPO

Buku-ŋal'yunarawuynha rom 16

Ḻakarama yukurra dharrpalyunydja waluyu ŋuriŋi ŋunhi Godthu ḏarrtjalkkuŋalana Yitjuralnhanydja miṯtjinha

16:1-34 (The Day of Atonement)

1-2Bala ŋayi Garrayyu ḻakaraŋala bitjarrana Mawtjitjkala, “Ḻakaraŋa nhe yurru nhokalaŋuwa wäwa'mirriŋuwa Yärunba ŋuripa ḏalkarra'mirriwa ŋurruŋuwa, yaka ŋayi yurru marrtji ŋunhawala djinawa'lilinydja, dharrpallilinydja ŋärra'lilinydja ŋunhanydja wal'ŋu birrka'mirriyunydja waluyu, yana ŋayi yurru dhuŋgarra-watjthirri gulŋiyirrinydja yukurra, ŋuriŋi yana liŋgu waluyu ŋunhi ŋarra nherrara. Ŋuli ŋayi yurru gulŋiyirri birrka'mirriyunydja waluyu ŋayinydja yurru rakunydhirrina yana, liŋgu ŋarrapinydja yurru ŋuli maḻŋ'thun ŋunhiliyi waŋupini'ŋurana, garrwarnha wal'ŋu ŋunhilina yana Mel-wuyunaramirriŋurana Dhaḻakarrŋura. 3Yakana ŋayi yurru gulŋiyirrinydja-wala yänanydja, ŋäthilinydja ŋayi yurru gäma buliki' yuṯa wal'ŋu yana, ga ḏarramu bembinydja, bala wutthunna yurru ŋayi, bala bathan dhaliyarra'lilina ŋunhana, märr ŋuriŋiyi gulaŋ-waṉḏinyarayunydja wäyingalanydja ŋayi yurru Garrayyunydja bäy-ḻakaramana buwayakkumana ŋurikiyi nhanŋuway Yärungu yätjpuy ga nhanukalaŋuwu yumurrku'wu.

4“Yo, ŋurruŋunydja ŋayi yurru Yärun ḻupthun yukurra gapuyu, bala ŋayi yurru dhaṯthunmirrina ŋuriŋiyi dharrpalyunydja girri'yu ŋunhi ŋayi Garrayyu ḻakaraŋala ŋurikiyi ḏalkarra'mirriwu. 5Bala walala yurru ŋuriŋiyi yolŋu'-yulŋuyu Yitjuralpuyŋuyunydja gämana nhanukala Yärungala märrama wäyindja maṉḏanha nanikuttja, ga bitjandhi liŋgu walala yurru wekama bembinhanydja ḏarramunha, märr gulaŋ-waṉḏinyarayu ŋurikala wäyingalanydja ŋayi yurru Godthu buwayakkuma walalaŋgu yätjnha dhuwurr.

6“Yo, ŋurruŋunydja ŋayi yurru Yärundhu wutthun buliki'nha, ŋunhiyinydjayi bulikiny'tja yurru rakunydhirri nhanukala Yärungalana dharapulŋura, märr yurru ŋayi Godthu buwayakkuma nhanŋu Yärungu yätjpuy. 7-8Dhurrwaraŋuru ŋuliŋurunydja ŋayi yurru Yärundhu märramana ŋunhiyi wäyinnhanydja märrma'nhanydja nanikuṉha, bala nherraṉ gumurrlilina nhanukala Garraywala ŋunhimala dhurrwaralilina wal'ŋu galkina buṉbulili, bala yurru djarr'yunna ŋayi waŋganynhanydja, märr yurru ŋunhiyinydja nhanŋuway Garraywuna, ga wiripunydja ŋunhinydja nanikut djuy'yunarawuna bena-wala ḏiltjililina. 9Bala ŋayi yurru Yärundhu wutthunna ŋunhiyi nanikuṉhanydja ŋunhi ŋayi djarr'yurruna Garraywu, märr yurru ŋuriŋiyinydja gulaŋ-waṉḏinyarayu wäyingalanydja Godthu ŋäkirrmaramana ŋuriki yolŋu'-yulŋuwalaŋuwuynydja yätjpuy. 10Ga wiripunydja ŋunhinydja ŋayi yurru wekama nhanŋuna Garraywuna, yurru walŋa yana ŋayi yurru ŋunhiyinydja nanikut yukurra dhärra, märr yurru ŋayi yängumana ŋunhiyi bena-wala ḏiltjililina; ŋayinydja yurru ŋuriŋiyinydja yätjnha djaw'yun yolŋu'-yulŋuwu bena-wala wuyupthunna yurru, barrkulilina gupaḏalnha-wala yurru winya'yundja. 11Yo, ŋäthilinydja ŋayi yurru Yärundhu wutthun buliki' ŋunhiyi, bala wapmarama gulaŋdja banikin'lilina, bala rumbalnydja yurru ŋayi Yärundhu bathan dhaliyarra'lilina, märr yurru ŋayi Garrayyu ŋäkirrmarama yätjpuy nhanŋuway Yärungu ga nhanukalaŋuwu djamarrkuḻi'wu. 12Ga dhurrwaraŋuru ŋuliŋurunydja ŋayi yurru märrama ḻirrwi' gurtha ŋuliŋuru dhaliyarra'ŋuru, ga biyapul ŋayi yurru märramayi buŋgan bäwny'tja, bala marrtji yurru djinawa'lilina ŋunhiwala wal'ŋu ŋurikimirri, gämanydja ŋayi yukurra yurru ŋunhiyi maŋguny'tja Garraywalana ŋunhiwala dhaḻakarrlili wal'ŋu. 13Ga ŋunhilinydja djinawany'tja, dharrpalŋuranydja dhaḻakarrŋura, ŋayi yurru rarryunna ŋunhiyi buŋgan bäwny'tja ŋunhimalayi ḻirrwi'lilina, gumurrlilina nhanukala Garraywala, märr yurru ŋunhiyinydjayi ŋawulul' marrtji gaŋgathirrina, warrpam'nha monyguma ŋunhi Garraywunydja dhaḻakarr, märr yurru ŋayi yaka Yärundhu nhäma ŋunhiyi, bala rakunydhirrina. 14Bala ŋayi yurru goŋ-ḻupthun ŋunhimalayi maŋgu'lili wäyingala, bala bikpikthun ŋunhiwala Mel-wuyunaramirrililina Dhaḻakarrlili, gumurrlilina wal'ŋu, ga bitjandhi liŋgu ŋayi yurru bikpikthundhi gumurrlilinydja Dhawu'-nherraṉminyarawuylilinydja ŋunhi Bathilili, waŋgany-rulu ga märrma'mirri bäythinyarawuynydja yurru ŋayi bikpikthundja ŋunhiwalayi.

15“Ga ŋuliŋurunydja ŋayi yurru Yärundhu buma ŋunhiyina djarr'yunarawuynhana nanikuṉha, ŋunhi ŋayi yurru rakunydhirri yolŋu'-yulŋuwala dharapulŋura, bukmakkala ŋurikala Yitjuralpuyŋuwala miṯtjiwala. Yo, gämanydja ŋayi yurru maŋguny'tja ŋunhiyi dharrpallilina ŋunhiwalayina ŋärra'lili, ga bitjandhi yana liŋgu ŋayi yurru bikpikthundhi ŋunhiyi Mel-wuyunaramirrililinydja Dhaḻakarr'lili wäŋalili, 16märr ŋayi yurru ŋuriŋiyi maŋgu'yunydja ḏarrtjalkkuma ŋunhiyina ŋärra'na wäŋa. Liŋgu yolŋu'-yulŋunydja ŋunhi Yitjuralpuyŋunydja yakana ḏarrtjalkmirri, ga djäma walala yukurra yätjnha rom, bala ŋayi yurru ŋuriŋiyi ŋurruŋuyunydja ḏalkarra'mirriyu yolŋuyu ḏarrtjalkkumana yukurra ŋunhi wäŋanhana buṉbunhana ŋuriŋiyi maŋgu'yuna wäyingalana, märr yurru ŋayi yukurra God nhina yana walalaŋgala ŋunhili ṉapuŋga. 17Yaka yurru yana ŋula yol yolŋu gärri ŋunhiwalayinydja buṉbulili ŋunhi ŋayi yurru Yärundja marrtji ga ḏarrtjalkkuma wäŋanha ŋunhiyi ŋuriŋi maŋgu'yu, yana liŋgu ga dhawaṯthun ŋayi yurru walŋa yana, märr yurru yolŋu'-yulŋuyunydja nhäma, ga dharaŋan ŋunhi ŋayi Godthu liŋguna bäy-ḻakaraŋala walalaŋgu yätjpuynydja dhuwurrwuy, Yärungalaŋuwuy ga djamarrkuḻi'walaŋuwuy nhanukalaŋuwuy, ga bukmakkalaŋuwuy ŋunhi yolŋu'-yulŋuwalaŋuwuy; yakana ŋayi yurru Godthu nhäma biyapulnydja walalaŋgu yätj. 18Dhurrwaraŋuru ŋuliŋurunydja ŋunhi ŋayi yurru dhawaṯthun beŋuru buṉbuŋuru, ŋayi yurru marrtji ŋunhiyi Yärundja bala ŋunhiwala dhaliyarra'lili galki, bala ŋayi yurru ŋämiṉna marrtji ŋunhiyi dhandurruŋ'tja ŋunhilimi dhaliyarra'ŋurana ŋuriŋiyina maŋgu'yuna, ḏarrtjalkkumayi yurru dhaliyarra' ŋunhi ŋuriŋi maŋgu'yu. 19Ga bitjandhi liŋgu yana ŋayi yurru bikpikthundhi dhaḻakarr ŋunhiyinydja, rumbalnydja ŋanya dhaliyarra'nha, waŋgany-rulu'mirri ga märrma' bäythinyarawuymirri ŋayi yurru bikpikthundja, märr yurru ŋunhiyi barŋdja ḏarrtjalk yana, yaka baḏuwaḏuyunara ŋula yolŋu'-yulŋuwuŋu yätjpuy.

20“Ga dhurrwaraŋuru ŋuliŋurunydja ŋunhi ŋayi bitjarrayi djäma ḏarrtjalkkuŋala marrtjina ŋunhiyi dhuyu wäŋa dhaḻakarr ga buṉbu ŋunhiyi, ga barŋ ŋunhiyi, bala ŋayi yurru ŋuriŋiyi Yärundhunydja märramana ŋunhiyi ganaŋ'maranharawuynhanydja nanikuṉha ŋunhi walala wekaŋala nhanŋu Garraywu walŋa. 21Bala ŋayi yurru goŋ-ŋal'yunna muḻkurrlilina ŋurikalayi wäyingala, bala waŋanydja ŋayi yurru marrtji ḻakaramanydja bitjanna ŋuriki yolŋu'-yulŋuwu Yitjuralpuyŋuwu yätjpuynydja, nhaltjarra walala yukurrana djäma yätjkuŋala, ga nhaltjarra walala ŋunhi baḏatjtjurruna Godku rom; ḻakaramanydja ŋayi yurru warrpam'nha yana, yakana ŋula ŋäkirrmarama wo djuḻuḻ'marama waŋganydja, ga ŋuliwitjandhinydja bitjan ŋayi yurru ŋal'maramana yukurra ŋunhiwala wäyingala nanikutkalanydja bukmakkuna yana yolŋu'-yulŋuwu ŋuriki Yitjuralpuyŋuwunydja yätjpuy. Bala ŋayi yurru ŋuriŋi wiripuŋuyunydja yolŋuyu märramana ŋunhiyi nanikuṉhanydja, bala gäma ḏiltjililina, bala ŋayi yurru yängumana ŋunhi nanikuṉhanydja, bena-wala yana wuyupmaramana yurru. 22Bala ŋayi yurru wäyindja waṉḏirrina ŋunhiyi yanana-wala yulŋunydja winya'yunna, djaw'yunna-wala yurru ŋuriki yolŋu'-yulŋuwunydja yätjpuy, winya'yunna yurru yana gupaḏalnha-wala.

23-28“Ga dhurrwaraŋuru ŋuliŋurunydja ŋayi yurru ŋuriŋiyi ḏalkarramirriyunydja yolŋuyu ŋurruŋuyunydja yupmaramana dharrpalnydja malanha girri' ŋunhi, bala ŋayi yurru rurrwuyunmirrina ŋanyapinyay ŋayi gapuyuna, bala nherraṉ nhanŋuwaynha wal'ŋu ŋunhi girri'.

29-33“Yo, bitjan liŋgu nhuma yurru Yitjuralpuyŋuyunydja yolŋuyu walalay djämanydja yukurra bitjandhinydja dhuŋgarra-watjthirri yana. Nhuma yurru ganan djämanydja malanha nhumalaŋguway, bala nhiniyana yukirriya ŋoy-ŋathamiriwnha, wuyurrana manaparra nhokalayŋu nhe yätjkuna. Bala Garrayyunydja nhumalanha yurru ŋuriŋinydjayi waluyu ḏarrtjalkkumana, ŋäkirrmaramana ŋayi yurru nhumalaŋgu yätjtja ŋuriŋiyinayi maŋgu'yuna, märr yurru nhuma yukurra nhina ḏarrtjalknha yana, waŋganyŋurana nhanukala Godkala; yakana ŋayi yurru nhäma biyapulnydja yätj nhumalaŋgu, meṉgumana yurru ŋayi yana buku-dhumukthirrina.

34“Yo, dhuwalayinydjayi rom yurru yukurra dhärrana yana gupaḏalnha-wala. Waŋga'-waŋganymirri yana dhuŋgarra-watjthirri yurru ŋayi ŋuriŋiyi ḏalkarra'mirriyu ŋurruŋuyu yolŋuyu djäma dhuwalayi romdja, ḏarrtjalkkuma marrtji ŋunhi buṉbunydja Godku ga yolŋu'-yulŋunha ŋunhi miṯtji ŋuriŋiyi gulaŋdhu, liŋgu dhiyaŋuyinydjayi romdhu ŋayi yurru Garrayyunydja baḏuwaḏuyun nhumalaŋgu yätjpuynydja, märr yurru nhuma ŋunhi Garraywunydja yolŋu walala nhina waŋganyŋurana yana rrambaŋina nhanukala, ŋula nhämiriwnha yana.” Bitjarrayina ŋayi Mawtjitjthu ḻakaraŋalanydja yukurrana yolŋu'-yulŋuwu, ga yuwalknha yana walala djäma romdja ŋunhi bitjarrayi dhuŋgarra-ŋupanana ŋuli yana, ŋunhi ŋayi Garrayyu wekaŋala rom Mawtjitjkala.