gnnNTOTPO

JOSHUA 1

Godthu ḻakaraŋala Djatjuwawala marrtjinyarawu buḏapthunarawu

1:1-9 (God commanded Joshua to go over into Canaan)

1Dhurrwaraŋuru ŋuliŋurunydja ŋunhi ŋayi Godku djämamirri yolŋu rakunydhina Mawtjitj yäku, bala ŋayi Godthu waŋana Djatjuwanhana, ŋunhinhana ŋunhi ŋayi Mawtjitjku guŋga'yunaramirri ŋäthili, ga bitjarrana ŋayi waŋananydja gam' Djatjuwawalanydja. 2“Djämamirrinydja ŋarraku Mawtjitjtja rakunynha liŋguna. Dhiyaŋunydja-wala nhe yurru ga bukmak dhuwala yolŋu walala marrtjina yana buḏapthunna yurru balakurru Djodangurru mayaŋ'kurru, marrtjinydja nhuma yurru yana-wala ŋunhimalayina wäŋalili ŋunhi ŋarra dhawu'mirriyaŋala nhumalaŋgu. 3-4Yo, ŋunhiyinydja wäŋa ŋarra yurru wekama nhumalaŋguna Yitjuralpuyŋuwuna bukmakkumana, beŋuru bili ŋanhdharkŋuru ga yana liŋgu ga-ga-ga-a-a ga ŋunha wapthun bukulili Lipananlili, nhumalaŋguwaynha yana ŋunhiyinydja wäŋa. 5Nhenydja Djatjuwa yurru dhärra wuṉḏaŋarrthirrina yana, bili yakana wiripuŋuyunydja yurru yolŋuyu djuḻkmarama nhuna. Ŋarranydja yurru nhokala bitjanna liŋguna galkina yana, bitjanna bitjarra ŋarra ŋäthili Mawtjitjkala. Yakana ŋarra yurru nhuna ganandja. 6Yaka nhe barrariyanydja, yana ŋoy-wuṉḏaŋarrthiyana biyakana, bili nhena yurru dhuwala gäma yolŋu'-yulŋunhanydja ŋurru-warryun ŋunhimalayi wäŋalilinydja ŋunhi ŋarra dhawu'mirriyaŋala ŋäthili ŋunhiyi nhumalaŋgalaŋuwala märi'muwala walalaŋgala. 7Yana wuṉḏaŋarrthiyana dhärriyanydja barrarimiriwnha, ga märraŋa dhäruktja marrtjiya bukmaknha yana nhänha malaŋunha romnhanydja ŋunhi ŋayi Mawtjitjthu wekaŋala marrtjina nhokala, yana marrtjiya ŋuliyina liŋguna dhukarrkurru bala yana, ga yakana ŋula gatjpaḻ'yurranydja, märr nhe yurru nhina yukurra ŋamathamana yana-wala. 8Biyaka liŋgu waŋiyanydja yukirriya dhuwali bili yana dhäruk, Garraywu walŋu rom, ga ḻakaraŋa marrtjiya wiripuwurrumbalanydja; guyaŋiyanydja yukirriya ṉiṉ'thurra walŋu biyaka yana yulŋunydja munha-ŋuparra ga walu-ŋuparra, märr yurru nhe djämanydja dhunupa marrtji yana, bitjan liŋgu bitjan dhuwali djorra'yu yukurra ḻakarama. Balakurruyinydja nhe Yurru nhina rom-dhunupana yana nhämiriwnha, ŋamakurru'na.

9“Gatjuy yana marrtjiyana, ga djämana marrtjiya barrarimiriwnha. Yakana barrariyanydja ŋula nhäkunydja malaŋuwu ŋunhi, ga yakana ḏaḏawyurranydja ŋuriŋiyi ŋunhi yurru ŋayi ŋula nhänydja maḻŋ'thun, liŋgu ŋarranydja dhuwala ŋarrapi Garray nhuŋunydja God; ŋarranydja yurru nhokala bitjan liŋgu yana, wanhamala nhe yurru marrtji yukurra.” Bitjarra ŋayi yukurrana Godthu ḻakaraŋalanydja Djatjuwawala.

Djatjuwayu ḻakaraŋala yolŋu'-yulŋuwa girri'-ŋamathinyarawu

1:10-18 (Joshua told the people to get ready)

10Bala yana ŋayi Djatjuwayu waŋana, dhäruknha wekaŋala ŋurru'-ŋurruŋuwalana ḏarramuwurruŋgala bitjarrana, 11“Gatjuy marrtjiyana walala wäŋakurru ŋula ya' ḻiw'maraŋa, ga ḻakaraŋa marrtjiya ŋurupa yolŋuwana walalambala, walala yurru girri'-ŋamathirrina ŋathana märrama djoṉguma marrtji, bili ŋilimurru boŋguŋu ḻurrkun'tja walu djuḻkmaraŋu marrtjina buḏapthurruna-wala yana ŋuruku mayaŋ'ku Djodanbuyŋunydja. Ŋilimurru yurru marrtjina-wala yana gärrina ŋunhamalanydja wäŋalili, bala märramana ŋilimurru yurru ŋunhayinydja wäŋanha, liŋgu ŋilimurrumbalay ŋunha wäŋa, ŋunhi ŋayipi Garrayyu yukurra wäŋanydja ŋunhiyi wekama ŋilimurrunha.”

12Bala Djatjuwa waŋanana ḻurrkun'kala bäpurru'wala, waŋganydja miṯtji Ropin mala, ga wiripunydja Gäd mala, ga wiripu-guḻku'wala ŋunhi Manatjawala malawala, ga bitjarra ŋayi waŋananydja. 13“Guyaŋiya walala ŋunhi nhaltjarra Mawtjitjthu nhumalaŋgala ḻakaraŋala, ŋayi waŋananydja bitjarra gam', ‘Godthu yurru nhumalaŋgu wekamanydja dhuwala makarr wäŋa, dhuwala gali' mayaŋ' yurru nhumalaŋgunydja wäŋa nhinanharawu,’ bitjarra. 14Yo, nhumalaŋgu yumurrku' ga miyalk walala ga wäyin walala, walalanydja yurru dhiyala yukurra nhina galkundja nhumalaŋgu, yurru nhuma ḏarramuwurrunydja bukmak yurru buḏapthunna malthun ŋanapurruŋguna. Nhuma yurru marrtji guŋga'yun dhuwala nhumalaŋguway wäwa-ŋalinha walalanha ya', 15ga yana liŋgu Garrayyu wekama yurru walalaŋgu dhuwali wäŋana walalaŋguna nhinanharawu. Nhuma yurru buŋanydja marrtjiya rrambaŋi yana bukmakkurru wäŋakurru, gukuŋa dhuwali miriŋunha, ŋunhi walala yukurra nhina dhiyalami wäŋaŋura yätjmirrina yanana. Ga ŋunhi yurru nhuma bukmaknha dhawar'marama, djuḻkmaramana walŋu yurru, bala yana ŋuliŋurunydja nhuma yurru roŋiyirrina lili, ga nhinana yukurra yurru dhiyala nhumalaŋgalay nhuma wäŋaŋuranydja.”

16Ga walalanydja buku-roŋiyinmaraŋala bitjarra, “Ŋanapurru yurru malthunna-wala yana, ŋunhi nhe nhaltjan yurru waŋa ŋanapurruŋgala, ga marrtji ŋanapurru yurru wanhamala nhe yurru ŋanapurrunha djuy'yun. 17Ŋanapurru yukurra yurru malthun nhuŋuway dhärukkunydja, bitjan yana liŋgu bitjarra ŋanapurru yukurrana dhärukku malthurruna nhanŋu Mawtjitjku, ga bukumirriyamanydja ŋanapurru yurru Godnha, märr ŋayi yurru Garraynydja nhokala galki bitjan yana liŋgu, bitjanna bitjarra ŋayi yukurrana galkithina Mawtjitjkala. 18Dhärriya wuṉḏaŋarrthiya, ga yakana ŋula beyaṉiyiyanydja.” Bitjarra walala yukurrana waŋana ŋuriŋi ŋurru'-ŋurruŋuyu ḏarramuwurruyu Djatjuwanhanydja.