gnnNTOTPO

Exodus 9

Wäyindja malanha marrtjina murrmurryurruna rerriyuna

9:1-7 (Sickness and death of animals)

1Garrayyu djuy'yurruna Mawtjitjnha buŋgawawala biyapul, bala ŋayi marrtjinana withiyara buŋgawanhana, ga waŋana nhanukala bitjarra, “Garraynydja waŋa yukurra bitjan, ‘Djuy'yurrana ŋarraku miṯtjinhanydja, walala yurru buku-ŋal'yun ŋarrakuna. 2Ŋuli nhe yurru yakanydja djuy'yun walalanha, mukthun yukurra ḏirrwiḏirrwi-mulka, 3ŋarranydja yurru djuy'yun rerrina wäyinguna, ŋayi yurru nhipala wäyindja walala, buliki ga yarraman' ga duŋ'ki rirrikthunmirrina, bala Yurru murrmurryunna. 4Yurru ŋarranydja yurru barrkuwatjkuma guḻk-guḻkthun Yitjuralpuyŋuwunydja buliki'nha walalanha ŋulaŋuru Yetjippuyŋuwalanydja buliki'wala, yakana yurru ŋula waŋgany Yitjuralpuyŋuwunydja wäyin rirrikthunmirri. 5Goḏarr'nha boŋguŋu dhuwala biyakuyinydja.’ ” Bitjarra ŋayi Garraynydja waŋana.

6Ga wiripuŋuyuna ḏaykun'thu dhuwala maḻŋ'thurrunanydja yuwalkthi. Murrmurryurrunana marrtjina bukmak Yetjippuyŋuwunydja wäyin walala, yurru Yitjuralpuyŋuwunydja yaka ŋula waŋgany wäyin rakunydhina. 7Bala ŋayi buŋgawayunydja djuy'yurruna dhäruk bitjarrana, “Gatjuy ma' marrtjiyana, ga nhäŋa Yitjuralpuyŋuwu wäyin.” Marrtjinanydja walala, bala nhäŋala walalambalanydja wäyin walŋamirri warray, bala gäŋala walala dhäwuny'tja, ga ḻakaraŋala nhanbalanydja. Yurru baḏak yana ŋayi buŋgawanydja rom-ḏälthina, ga yakana djuy'yurruna yolŋunhanydja walalanha dhawaṯmaraŋalanydja.

Djiraŋ'thuna marrtjina dhaṯthurruna wäyinnha ga yolŋu'-yulŋunha

9:8-12 (Boils on the animals and people)

8Ga ŋuliŋurunydja dhurrwaraŋuru Garray waŋana maṉḏakala Mawtjitjkala ga Yärungala bitjarra, “Ma', dhiṯthurra maṉḏa ganu' gurtha nhumalaŋgiyingalay goŋdhu, ga marrtjiya withiyarra djunuma buŋgawanha, ga ŋunhili milmana nhanukala nhe yurru Mawtjitj djalkthun ganuny'tja garrwarlilinydja, 9bala Yurru ŋayi buḻwaŋ'thunna ŋunhi ganuny'tja, wäŋanydja yurru warrpam'nha monyguma, buku-ḻiw'maramana Yetjiptja, ga yolŋunha walalanha ga wäyinnha walalanha warrpam' yurru djiraŋ'mirriyirri, djetjimirriyirrina rumbal.”

10Bala yuwalkthi maṉḏa bitjarrayina djalkthurrunana ŋunhi ganuny'tja garrwarlilinydja, bala yuwalkthi djiraŋ'mirriyinana marrtjina yolŋu'-yulŋunydja ga wäyindja. 11Ŋunhiyi gaḏamanmirrinydja yolŋu walala warrpam'nha djiraŋ'mirriyinana; yakana walala djingaryurrunanydja yukurrana nhäŋala Mawtjitjnhanydja, liŋgu walala gaḏamanmirrinydja ga bukmak Yetjippuyŋunydja yolŋu'-yulŋu djiraŋ'mirriyinana.

12Bala Garrayyunydja ŋayipinydja ŋanya ŋayaŋu-ḏälkuŋalana ŋunhi buŋgawanhanydja, liŋgu ŋayipi ŋanyapinyay ŋayi rom-ḏälkunhamina; yakana ŋayi mäkiri'-witjurruna maṉḏaku dhärukku, bitjarra yana liŋgu bitjarra ŋunhi ŋäthili Garrayyu ḻakaraŋala Mawtjitjkala.

Waltjaṉdhu goḏu-guṉḏamirriyu marrtjina bumara

9:13-35 (The hail storm)

13Bala Garray waŋanana Mawtjitjkala bitjarra, “Gaŋgathinydja nhe boŋgama, munhakumirri yana, bala marrtji withiyurru buŋgawanhana.” Bala yuwalkthi Mawtjitjtja gaŋgathina munhakumirri yana, bala marrtjina withiyara buŋgawanhana, ga ŋunhalanydja ŋayi waŋana nhanukala buŋgawawalanydja bitjarra, “Ŋarranydja gäŋala dhäruk Garraynha, Yitjuralpuyŋuwu Waŋarrnha. Bitjan ŋayi yukurra waŋanydja nhuŋu gam', ‘Djuy'yurrana ŋarraku miṯtjinhanydja, märr walala yurru buku-ŋal'yun ŋarrakuna. 14-16Ŋarra bini nhumalanha dhawar'maranha muka yulŋunydja, bukmakkunhana ḏe'maranha, yurru ŋarra gonha'yurrunayi nhumalanha, gonhana nhuma nhiniya walŋamirrina, märr nhuma yurru nhämana ŋarraku ganydjarrnha, märr yurru bukmak yolŋu walala buku-ḻiw'marama wäŋakurru, bäpurru'yu ga bäpurru'yu yurru ŋämanydja, ga marŋgithirri ŋarraku yäkuwunydja. 17Yurru mukthun yana nhe yukurra dhuwala nhepi garrwarkunharamirrinydja, ŋurruŋukunharamirri, wäwundhirri ŋarrakalayŋuwunydja miṯtjiwu. Nhe yaka djuy'yurruna ŋarraku miṯtjinha. 18Bala goḏarmy'tja, ŋarra boŋgama djuy'yurru wärrknha, goḏu-guṉḏamirrina maḻwurrk, ŋayi boŋguŋu marrtji burruḻ'yurru ŋonuŋmirrina dhikana, wiripuna yana; yakana balanyara bitjarrayi yukurrana ŋäthilinydja dhiyala Yetjiptja maḻŋ'thurruna. 19Gatjuy, dhäwuny'tja barrkuwatjkuŋana yolŋu'-yulŋuwunydja, walala yurru ŋäthiliyi ŋilitjandja wäyinnhanydja walalanha ga yolŋu'-yulŋunha bala'lilina, liŋgu dhiyaŋuyi wärrkthunydja yurru buma rakunygumana, dhä-monygumana bukmaknhana Yurru wäyinnha walalanha ga yolŋu'-yulŋunha, ŋunhi walala yurru marrtji djingaryun baṉarraŋuranydja wäŋaŋura.’ ” Ga bitjarra Mawtjitjthu ḻakaraŋalanydja buŋgawawala.

20Ga dhäruktja dhuwalayi barrkuwatjthinana, ga wiripuwurru Yetjippuy yolŋu'-yulŋu wirrkina beyaṉiyina Garraynha dhäruk ŋäkula, bala walala dhark-dharkkuŋalana marrtjina wäyinnhanydja walalanha bala'lilina, ŋurrwu'lilina, ga walalaŋguway djämamirrinha walalanha yolŋu'-yulŋunha. 21Ga wiripuwurrunydja yakana ŋula märr-yuwalkthina, ŋayaŋu-yuḻkthurrunana ŋäkula Garraynha dhäruk; walalambalanydja yolŋu'-yulŋu djämamirri walala ga wäyin walala ŋunhala yana baṉarraŋura marrtjina djinga'-djingaryurruna.

22-25Bala Mawtjitjtja waṉa-djarryurrunana, garrwarkuŋala djiwarr'lili ŋunhi wapitja, bala yana Garrayyunydja djuy'yurruna wärrknha, goḏu-maykarraṉ'mirrina, murryu'-murryurrunana marrtjina, ŋutu'na dhikana maḻwurrk; Garrayyunydja marrtjina djirryunmaraŋalana guṉḏana ŋonuŋmirrina ŋunhimalanydja wäŋalili ŋarakalili Yetjiplilinydja. Ga ŋunhala bala baṉarraŋuranydja yolŋu'-yulŋu ga wäyin walala warrpam'nha murrmurryurruna, ga dharpanydja marrtjina ḏaw'-ḏawyurruna buḻwaŋ'thurrunana. 26Yurru ŋunhalanydja wäŋaŋura yäkuŋura Gutjindja, ŋunhi Yitjuralpuyŋu yolŋu'-yulŋu yukurrana nhinana, bäyŋu warray bumara; yakana ŋula waŋgany guṉḏa dhuḻ'yurruna ŋunhimala Wäŋalili.

27Yo. Mukthurrunaŋga yana yukurrana maḻwurrkthunydja dharyurruna ŋunha Yetjippuynydja, bala buŋgawanydja wäthurruna biyapul maṉḏaku Mawtjitjku ga Yärungu, bala waŋanana maṉḏakala bitjarra, “Ŋarrapi yana yätjtja. Garray warray dhuwala rom-dhunupanydja, ga ŋarranydja ga ŋarraku miṯtji, ŋanapurrunydja dhuwala rom-djarrpi'mirrina yana. 28Ŋäŋ'thurra bukumirriyaŋa Godnha, märr yurru ŋayi gulkthunna dhuwalayi wärrktja, bala ŋarra yurru djuy'yunna nhumalanha dhuwala yulŋunydja; yakana nhuma yurru weyindja nhina dhiyala.”

29Ga Mawtjitjtja waŋana nhanukala bitjarra, “Dhawaṯthundja ŋarra yurru dhipuŋuru, bala ŋarra yurru waṉa-djarryun Garraywalana, bala yurru maḻwurrktja gulkthunna yana; yakana yurru biyapulnydja guṉḏa djirryun. Yo, wärrktja yurru dhawar'yunna, märr nhe yurru marŋgithirrina, liŋgu wäŋa dhuwala munathany'tja nhanŋuway dhulŋuŋu Garraywu, 30yurru nhenydja ga nhuŋu miṯtji yaka warray nhanŋu märr-ŋal'yun ŋuli yukurra.” Bitjarra ŋayi Mawtjitjthu ḻakaraŋala buŋgawawalanydja, yurruna ŋayi marrtjinanydja, gonha'yurrunanydja ŋanya. 31-33Bala ŋayi biyapul waṉa-djarryurruna Garraywalana, dhunupa maḻwurrktja marrtjina gulkthurrunana ḏaḏawyurrunana; yakana biyapulnydja ḻarryurruna guṉḏa wäŋalili, yurru ŋathanydja ga borum malanha liŋguwuynha djarwatkunharana ŋurikiŋiyina wärrkkuŋuna.

34-35Märr ŋayi buŋgawayu nhäŋala maḻwurrktja mukthunaranydja, bala biyapul marrtjina yätjthina, romdja ŋayi wuṉḏaŋarrkunharaminayi, ga yaka yana ŋayi djuy'yurruna Yitjuralnhanydja, bitjarra yana liŋgu ŋunhi Garray waŋana Mawtjitjkalaŋukurru dhä-ŋäthili walŋu.