gnnNTOTPO

PSALMS 139

Godtja Birrka'mirriŋura

139:1-24 (God's complete knowledge and care)

1Garray nhe liŋguna nhäŋa'-nhaŋala ŋarranha ŋayaŋu;

Nhe marŋgi ŋarraku bukmakku yana,

ga marŋgina nhe nhä ŋarra yukurra djäma.

2Nhe ŋuli nhäma ŋarranha nhinanhara ga gaŋgathinyara,

ga bitjandhiyi liŋgu nhe marŋgina nhaltjan ŋarra ŋuli yukurra guyaŋirri.

3Ŋunhi ŋarra yurru marrtji ŋula wanhamala,

nhenydja ŋuli ŋarranha nhäma warray;

Ga ŋunhi ŋarra ŋuli mukthun nhina,

nhe marŋgina ŋarraku bukmaknha yana.

4Nhe ŋuli marŋgithirri ŋathil'yun ŋarraku dhärukku,

ŋunhi ŋarra ŋuli gäthuraŋga dhurrwara ḻapthun waŋanharawu.

5Marrtjinydja nhe ŋuli ŋurruŋu, ŋurru-warryun ŋarranha,

ga munguyun nhe ŋuli, nhepi yana;

Bämara'yun ŋarranha nhe ŋuli bitjanna liŋguna,

goŋ-nherraṉmirri marrtji ŋarraku ŋuli.

6ḻatju'na ŋiniya!

Biyapulnha-wala garrwarnha nhuŋunydja guyaŋinyara barrkuna,

yakana ŋarra yukurra mulka ŋarrakalay muḻkurryu.

7Garray, nhenydja dhuwala bawala'mirriŋurana.

Wanhamala ŋarra yurru waṉḏirrinydja?... winya'yundja nhokala?

8Ŋunhi ŋarra dhawuṯthurru djiwarr'lili ŋuli, ga nhenydja ŋunhala warray,

ga ŋuli ŋarra yarrupthurru, rakunymirriwala wäŋalili buni, nhenydja ŋunhalayi.

9-10Ŋuli ŋarra winya'yurru barrkulili wäŋalili, bena-wala barrkulilina birr',

nhenydja ŋunhalayi, ŋurru-warryun ŋarranha ŋuli,

ga guŋga'yun ŋarranha marrtji.

11Ŋuli ŋarra ŋula djuḻuḻ'yurru buku munhalili, gulkuruna ŋunhiyi,

liŋgu munhakunydja dhuwala balanyara bitjan walupuy yana nhuŋunydja;

12Nhuŋunydja djarraṯawun' warrpam warray räkukuma yukurra munhanydja;

Nhe ŋuli ŋarranha nhäma munhalilinydja bitjan yana liŋgu bitjan walupuy.

13Garray nhepi ŋarranha ŋamaŋamayurruna,

nhe bokmara ŋarranha ŋunha ŋäṉḏiwala gulunŋura.

14ḻatju'kuŋala nhe dhika bokmara ŋarranha rumbalnydja, dhapirrkkuŋalana dhika walŋu,

bukmak nhuŋu djämanydja ḻatju'na dhika;

Ŋarranydja yukurra wokthun nhuŋu wirrkina.

15Nhäŋala nhe ŋarranha yukurrana,

ŋunhi ŋarra yutjuwaḻaŋ'ka yana yothuŋga ŋunha ŋäṉḏiwalaŋga rumbalŋura;

16Nhenydja ŋäthili ŋarraku marŋgi, liŋgu nhe nhäŋala ŋarranha ŋuthanara marrtjinyara,

yurruna ŋarra dhawal-wuyaŋina,

ga bitjarrayi nhe dhukarr gurrunhara ŋathil'yurruna ŋarraku.

17Waŋarr God, nhuŋu guyaŋinyaranydja barrkuna,

yakana ŋarra yukurra guyaŋirri ga mulka.

Nhokuŋu guyaŋinyara guḻku'na mirithirrina, biyapulnha guḻku'.

18Ŋunhi ŋarra ŋuli bothurrunydja, yakana ŋuli buku-mulki,

bitjanna liŋguna nhe guyaŋirri yukurra ŋarranha.

Ŋunhi ŋarra ŋuli yakurrthirri,

nhenydja ŋunhiliyi warray;

Ga ŋunhi ŋarra ŋuli gaŋgathirri yakurrŋuru,

nhenydja mukthun yana ŋunhili ŋarrakala galki.

19Garray! Nhäku warray nhe ŋuli yakanydja buma ŋunhi yätjmirrinhanydja yolŋu'-yulŋunha?

Yana walala bini winya'yunana-wala ŋarrakala.

20Bitjanna liŋgu walala ŋuli waŋa yätjkumanydja nhuna.

Garray, wirrkina ŋarra yukurra ŋaramurryirri walalaŋgu,

liŋgu nhuŋu walala yukurra ŋaramurryirri.

21Ŋarra yukurra yarryunna walalaŋgu, yakana ḏukṯukthirri,

liŋgu walala yukurra nhuŋu yarryun.

22Yuwalknha ŋarra yukurra yaka ḏukṯukthirri walalaŋgu, yarryunna yukurra,

yakana ŋarra yurru walalanha ḻundukuma.

23Garray, nhäŋa'-nhaŋa ŋarrakala ŋayaŋulili,

ḻarru'-larruŋa ga gatjarr'yurra ŋarraku guyaŋinyara;

24ḻakaraŋa dhunupamirriyaŋa nhä yukurra ŋarrakala yätj ŋorra ŋayaŋuŋura ga ḻiyaŋura,

nhä ŋarra yukurra balaŋu djuḻuḻ'marama nhokala.

Garray! Gäŋana ŋarranha, ŋurru-warryurra dhunupakurru dhukarrkurru,

ŋulawitjarra bili walŋamirrikurru dhukarrkurru. Ga liŋguna.