gnnNTOTPO

DHATJALUNIKAPUYŊUWU NAMBA 2 DHÄRUK 3

Dhawar'yunarayŋuna dhäruk

1Yo gutha walala, dhuwalanydja dhäruk dhawar'yunaramirrina. Bukumirriyaŋa yukirriya ŋanapurruŋgu yulŋunydja, märr yurru Garraywunydja dhäruk waḏutjana marrtji baḻaka'yun birrka'mirrililina, märr yurru wiripu-guḻku'yunydja yolŋuyu walalay ḻatju'-ḻakarama dhuwalayi dhäruk Garraynhanydja, bala märramana yana. bitjan yana liŋgu bitjan nhuma ŋäthili. 2Ga biyakayi ŋäŋ'thurra yulŋunydja Godnha, märr ŋayi yurru gunganhamirriyama ŋanapurrunha yulŋunydja, walŋakuma yurru goŋŋuru ŋuliŋurunydja dhuwurr-yätjmirriwalanydja wal'ŋu yolŋu'-yulŋuwala, liŋgu wiripu-guḻkuny'tja yaka yukurra märr-yuwalkthirri Garraywu.

3Yurru ŋayipinydja Garraynydja ŋunhi märr-yuwalkthinyaramirri warray dhika wal'ŋu, ŋayi yurru nhumalanha ŋoy-wuṉḏaŋarrkumanydja, gunganhamirriyama gäma ŋuliŋuru yätjmirriwalanydja, märr yurru nhuma yukurra dhärra yana mukthun wuṉḏaŋarrthirri. 4Ga ŋanapurru yukurra märr-yuwalkthirrina Garraywalanydja, ŋunhi ŋayi yukurra nhumalanhanydja gämana-wala yana nhanukalay ŋayi ganydjarryunydja, bala nhuma yukurra marrtjina-wala yana mukthunna djäma ŋamakurru'na, ŋunhiliŋumina bili romŋura ŋunhi ŋanapurru nhumalaŋgu ḻakaraŋala. 5Ŋanapurru yukurra ŋäŋ'thundja Godnha, märr yurru ŋayi djämana yukurra nhokala dhuwali ŋayaŋuŋuranydja, märr yurru nhuma nhina yukurra ŋunhiliyina Godkalana yana märr-ŋamathinyaŋura, ga marrtji yurru mukthun warray yana ŋula nhäkurrunydja romgurru dhambay Djesu-Christkalana.

Ŋilimurru yurru djäma yana, ga yakana ḏuŋḏuŋdhirrinydja

6Yo gutha walala, ŋanapurru nhumalaŋgu wekamanydja yurru dhuwala dhäruktja Garraywala Djesu-Christkala yäkuyunydja, dharraykumanydja nhumalanha bitjan gam': Ŋunhi yurru ŋula yol nhumalaŋgala miṯtjiŋura nhina yukurra ḏuŋḏuŋdhirrinydja, yana nhina ŋäŋ'thundja nhumalanha Garraywalaŋumirrinha, liŋgu yakana ŋayi djäl ŋayipinydja djämawu, bala nhumanydja yurru yana gonha'yurrana ŋanya ŋunhiyi yolŋunhanydja, liŋgu yaka ŋayi yukurra malthun ŋurikiyinydjayi romgu ŋunhi ŋanapurru nherrara nhumalaŋgu. 7Nhumanydja ŋunhi nhäŋala ŋanapurruŋgalaynydja rom, nhaltjarra ŋanapurru yukurrana djäma wirrki wal'ŋu yana, ŋunhi ŋanapurru dhiyali nhumalaŋgala nhinananydja yukurrana; yaka ŋanapurru yukurrana nhinana bitjarranydja bitjan guṉḏa ŋunhi. Ga nhumanydja yurru malthunna ŋanapurruŋgunydja. 8Ŋunhi ŋayi ŋula yolthu wekaŋala ŋathanydja ŋanapurruŋgu, ŋanapurrunydja ŋunhi bäyim ŋunhiyi ŋathana, yaka ŋanapurru nhinana ŋäŋ'thurrunanydja. Ŋanapurru yukurrana djäma wirrki yana walu-ŋupara ga munha-ŋupara, märr yurru ŋanapurru yaka ŋäŋ'thun nhumalanhanydja. 9Manymak warray bini ŋunhi ŋanapurru ŋäŋ'thunanydja ŋathawu nhumalanha, liŋgu ŋanapurru yukurrana ŋunhi djäma muka, wekaŋala Godku dhäruk nhumalaŋgu. Yurru yaka ŋanapurru ŋäŋ'thurrunanydja nhumalanha ŋula nhäkunydja, liŋgu ŋanapurru ḏukṯuktja nhumalaŋgu nhuma yurru nhäma ŋanapurruŋgala, bala marŋgiyirrina ŋunhi Godkalaŋuwunydja romgu, bala malthunna yurru. 10Yo, liŋgu muka ŋanapurru ḻakaraŋalanydja nhumalaŋgu bitjarra, “Ŋunhi yurru ŋayi ŋula yolthu djäma yakanydja, gonha'yurrana ŋanya marrya'nhana yana, yakana wekaŋa ŋatha.”

11Yo, ŋäkula ŋanapurru yulŋunydja nhumalanha, ŋunhi wiripu-guḻkuny'tja nhuma yana nhina yukurra ḏuŋḏuŋdhirrina, yakana ŋula djäma, yana nhuma yukurra ḻayḻaymaramana wiripu-guḻku'nhana nhäku malaŋuwu. 12Bala ŋanapurru dhuwala waŋanydja yukurra ŋurikiyina dhä-ŋäŋ'mirriwuna walalaŋgu, ga raypirri'yundja ŋanapurru yukurra nhumalanha bitjan gam': Nhuma Garraywalanydja Djesu-Christkalanydja yolŋu'-yulŋuyu yurru djämana mukthunna yana, wurrkurrum'thuna märryu, märr yurru nhe märrama muka ŋathanydja ŋula nhä nhokalay nhe djämayu.

13Yo gutha walala, mukthurra-wala djäma marrtjiya ŋamathaŋa yana. Guŋga'yurra marrtjiya yuwalkkuŋa yana wiripu-guḻku'nhanydja, ga yaka yana djawaryurranydja ga ḏaḏawyurranydja.

14Ŋunhi yurru ŋula yolthu yakanydja märrama dhuwaliyi dhäruk, ŋunhi ŋanapurru yukurra ḻakarama dhiyaŋu djorra'yu, yana ḻäy-yuḻkmaraŋa ŋanya gonha'yurrana, märr yurru ŋayi gorana nhanukalay ŋayi romdhu. 15Yaka nhanukala yarrkthurranydja gupaḏalkuŋanydja yanapi ŋayi ŋunhi miriŋuna, yana waŋiya ŋanya biyaka raypirri'yurra, märr yurru ŋayi gonha'yun ŋunhiyi nhanŋuway yätj rom, liŋgu ŋayinydja ŋunhiyi bitjan wäwa'mirriŋu nhuŋu ŋayi.

Dhawar'yunarayŋuna dhäruk

16Yo gutha walala, Garray ŋayipi ŋoy-wurrkurrum'thinyamirrinydja, ga bukumirriyamanydja ŋarra yukurra nhumalaŋgu, märr yurru nhuma yukurra nhina bitjan liŋgu nhanukalanydja ŋayaŋu-yal'yunaraŋura, dharraḏa'thirri yana ŋula nhäŋuru romŋuru. Ŋayi dhuwali Garraynydja nhumalaŋgala bitjan warray liŋgu.

17Ga dhuwalanydja ŋarrana Bolyuna dhawar'maramanydja yurru wukirri goŋdhuna ŋarrakalay ŋarra, märr yurru nhuma nhäma ŋunhi dhuwalayinydja djorra' yuwalk ŋarrakuŋuway yana. Ŋunhi ŋarra ŋuli wukirri ŋula yolkunydja wiripuŋuwunydja, bala ŋarra ŋuli ŋarrapi dhawar'maramanydja bitjanna. 18Ŋarra bukumirriyamanydja yukurra nhumalaŋgu bukmakku, märr yurru nhuma nhina yukurra märr-ŋamathinyaraŋura dhika wal'ŋu, dhambay-manapanmirri Garraywala ŋilimurruŋgalaŋuwala Djesu-Christkala. Ga liŋguna.