gnnNTOTPO

Exodus 11

Mawtjitjthu ḻakaraŋala ŋunhi marina yurru marrtji bathalana

11:1-10 (Moses told about big trouble that would come)

1Ga biyapul ŋayi Garray God waŋana Mawtjitjkala bitjarra, “Waŋganynha biyapul ŋarra yurru djäma dhiyala Yetjip, waŋganynha biyapul yätj rom yurru maḻŋ'thun ŋurukuyi buŋgawawu, ga dhiyaku wäŋawu bukmakku yana Yetjippuyŋu, ga dhurrwaraŋuru ŋuliŋuruyinayi ŋayi yurru djuy'yundja nhumalanha, gukumana yana yurru nhumalanha ŋuliŋuruyi nhanukiyingalay wäŋaŋurunydja warrpam'thuna. 2ḻakaraŋa ŋarrakalaŋuwa yolŋu'-yulŋuwanydja Yitjuralpuyŋuwanydja, ḏarramuwurrumbala ga dhäykawurrumbala, walala yurru marrtji yukurra, ga ŋäŋ'thun marrtji Yetjippuyŋunha yolŋu'-yulŋunha ŋamakurru'wu malawu girri'wu garwarrwarr'wu, miny'tjimirriwu dhika nhäku malaŋuwu girri'wu mel-wiḏi'mirriwu,” bitjarra. 3Ga yuwalkthi ŋayi Garrayyu guŋga'yurrunanydja nhanŋuway yolŋu'-yulŋunhanydja, bala walala ŋunhi Yetjippuyŋuyunydja yolŋu'-yulŋuyu bena marrtjina rarr'yurruna walalambala dhaŋaŋnha mirithirrina ḻatju'mirrinydja dhikanydja ŋanya girri' malanha. Ga bitjarrayi liŋgu ŋayi Garrayyunydja garrwarkuŋalana ŋurruŋukuŋalana walŋu ŋanya Mawtjitjnha, bala ŋuriŋi buŋgawawalaŋuyunydja djämamirriyu walalay ga bukmakthu ŋuriŋi yolŋu'-yulŋuyu ḻakaraŋala ŋanya Mawtjitjnhanydja dharrpalnha ŋayi ŋunhiyi yolŋu Mawtjitjtja.

4Ga biyapulnydja ŋayina marrtjina Mawtjitjnha nhanukala buŋgawawalana, bala ḻakaraŋala bitjarrana, “Garraynydja waŋana bitjarra gam', ‘Yalalanydja yurru dhika buku-rangunydja walŋu, ŋarranydja Yurru ŋarrapinydja marrtjina yukurra balakurru-wala Yetjipkurrunydja, 5ga bukmak Yurru ŋunhiyi maḻamarrmirrinydja yumurrku' Yetjippuyŋu marrtji raku'-rakunydhirrina. Nhuŋu yurru buŋgawawu gäthu'mirriŋu rakunydhirri, yana liŋgu-u-u ŋunhana-wala ga djämamirriwala maḻamarrmirriwala yumurrku'wala wapthun, ga bitjandhi liŋgu yurru wäyindja mala maḻamarrmirri yana dhawal-wuyaŋinyara ŋurruŋuwuy raku'-rakunydhirri. 6Ga rirrakaynydja yukurra yurru nyä'yunminyaranydja buṯthunna balakurruyi wäŋakurrunydja Yetjipkurru. 7Yurru ŋarrakunydja yolŋu walala yurru nhina yukurra mäwayaŋurana yanana, yakana yurru ŋula waŋganydhu wuŋgandhu walalaŋgala wäŋaŋura gukthun; yakana yurru ŋula waŋgany yolŋu ŋarrakunydja miṯtji ŋayaŋu-yätjthirri ŋuriŋiyi mariyunydja. Yo, bukmakthuna yurru dharaŋandja ŋunhi ŋarra barrkuwatjkuŋala Yetjippuyŋunha ga Yitjuralpuynha, liŋgu Yetjippuynydja walala yurru nyä'yunmirrina marrtji ŋuriŋiyinayi murrmurryunarayuna marrtjinyarayu, ga ŋarrakunydja miṯtji yurru yolŋu walala yukurra nhina walŋamirri warray dhika walŋu. 8Walala yurru djämamirrinydja walala nhumalaŋgu marrtji, bala ṉepaḻ-nyilŋ'thunna ŋarrakalanydja, bala waŋa yurru bitjanna, “Gatjuy yarrkthurrana-wala ŋanapurruŋgala wäŋaŋurunydja dhipuŋurunydja, bukmakthiyana yana walala.”’ Ga dhäŋuru ŋuliŋurunydja ŋarra yurru marrtjina yanana-wala.” Ga bitjarra ŋayi yukurrana Mawtjitjthu ḻakaraŋalanydja nhanbala buŋgawawanydja. Bala ŋayi gonha'yurruna ŋanya buŋgawanhanydja ŋunhi Mawtjitjthu, yurru ŋayi marrtjinanydja ŋaramurryinana manapara.

9Bala ŋayi Garraynydja waŋana Mawtjitjkala bitjarra, Ŋunhayi buŋgawanydja nhuŋu yurru yakana mäkiri'-witjun yukurra, mäkiri' ŋayi yurru dhaḻ'yunmirri yukurra nhokalaŋuŋuru ŋänharaŋurunydja dhärukŋurunydja, märr yurru ŋarra yukurra djäma biyapulnha walŋu ganydjarr-ḏumurruyu romdhu dhiyala Yetjiptja wäŋaŋura.” 10“Ŋe, maṉḏa Mawtjitjthu ga Yärundhu milkuŋala bukmak ŋunhi ganydjarr ḏilkurrunydja milma buŋgawawala, yurru rom nhanŋunydja wuṉḏaŋarrnha, liŋgu Garrayyunydja ŋanya rom-ḏälkuŋalana, yakana ŋayi ŋuriŋi buŋgawayunydja Yitjuralnhanydja yolŋunha walalanha djuy'yurruna dhawaṯmaraŋala nhanukiyingalanydja wäŋaŋuru.