gnnNTOTPO

Genesis 46

Djaykup ga nhanŋu djamarrkuḻi' marrtjina Yetjiplilina

46:1—47:12 (Jacob and his family went to Egypt)

1Ŋäthili walala marrtjinanydja ŋunha Biratjipalili, ga ŋunhala Djaykup buku-ŋal'yurrunanydja yukurrana ga mundhurr bathara nhanŋu Garraywu. 2Ga God maḻŋ'thurruna nhanukala, ga yäkuna ŋanya ḻakaraŋala bitjarra, “Djaykup, Djaykup,” bitjarra yukurrana.

Ga ŋayinydja waŋana bitjarra, “Gay' dhuwala ŋarra.”

3Ga ŋayi waŋana Godtja bitjarra, “Ŋarraŋga dhuwala nhokalaŋuwu bäpa'mirriŋuwu waŋarr. Yaka nhe beyaṉiya. Marrtjiyana-wala yana Yetjiplilina, ga ŋunhalanydja ŋarra yurru miṯtji guḻku'kumana, dhaŋaŋgumana nhuŋu, ga nhinanydja nhe yukurra yurru mala-guḻku'mirrina. 4Ŋarranydja yurru malthundhi marrtji nhuŋu, ga ŋarrapi yurru nhuŋu malanhanydja roŋiyinmaramayi dhipalayi wäŋalili. Ga ŋayi yurru Djotjiptja nhokala galki ŋunhi nhe yurru rakunydhirrinydja.”

5-6Bala Djaykuptja gaŋgathinana, gonha'yurrunana Biratjipanydja wäŋa, bala yana marrtjinana, gäŋala yukurrana yolŋu'-yulŋunhana nhanŋuway, ga wäyin ga dhika nhä, marrtjinana-wala yana Yetjiplilina. 26Yurru Djaykupkuŋu ŋunhi guwar-yalkthunaranydja märr-ḻurrkun' yana, ŋunhi walala marrtjina bala Yetjiplili, 27ga Djotjipkunydja walkur märrma' yana. Yo, ŋunhiyi Djaykupku miṯtjinydja märr-ḻurrkun' yana, 70 yana miṯtji ŋulinyaramirriyunydjayi ŋunhi walala wäŋaraŋalana yana nhinana Yetjiptja.

28Yo, Djaykuptja ga nhanŋu miṯtjinydja yolŋu'-yulŋunydja marrtjinana yukurrana, yana liŋgu galkithinana marrtjina wäŋanydja ŋunha Yetjippuynydja. Bala yana ŋuliŋuruyinydja gandarrŋurunydja ŋayi waŋgany wäwa'mirriŋu waṉḏina yäku Djuda ŋäthili, ŋurruŋu waṉḏina bala, ga ḻakaraŋala Djotjipku, bitjarra, “Mäḻuny'tja dhikana marrtji yukurra, galkina dhuwalana ya',” bitjarra.

29Ga Djotjiptja dhunupa gaŋgathinana, bala yana marrtjina gumurr'yunarawuna bäpa'mirriŋuwuna. Marrtjinana nhinana lili, ga bunana, ŋunhilina maṉḏa gumurr-wunanhaminanydja bäpa'manydji maṉḏa. Yurru ŋayi Djotjipthu dhangi'yurrunana gay, gaḻummaraŋala nhanŋuway bäpa'mirriŋunhanydja mayaŋ'kurruna mulkana, bala ŋäthinana wuythurrunana dhikana weyinnha ŋäthina.

30-34Bala ŋayi Djaykuptja waŋanana Djotjipku bitjarrana, “Ŋe liŋguna ŋarra nhuna nhäŋalana ga marrkapthurrunana nhokala yana ŋarra. Yakana ŋarra weyindja yurru nhina yukurra dhiyala, liŋgu galki ŋarra yurru gonha'yunna nhumalanha, bäyŋuthirrina yurru,” bitjarra ŋayi Djaykuptja waŋana Djotjipkala.