Bukumirriyaŋa bäy-ḻakaranharawu
51:1-17 (A prayer for forgiveness)
1Garray God Waŋarr, maŋutji-wuyurra ŋarraku, nhuŋunydja ŋayaŋu-ŋamathinyara yuwalk warray, weyinŋumirri warray,
wuyurra ŋarraku, ga buwayakkuŋana ŋarrakuŋu yätjtja.
2Garray rurrwuyurrana ŋarranha ḏarrtjalkkuŋana, baḏuwaḏuyurrana ŋarraku yätjtja dhuwurr.
3Ŋarra dhuwala dhuwurr-yätj yolŋu,
yurru yakana ŋarra yukurra djuḻuḻ'marama meṉguma ŋarrakuŋu yätjtja dhuwurr;
Bitjanna liŋguna ŋarra ŋuli yukurra guyaŋirri, bitjan wuyunna ŋarrakalayŋu ŋarra yätjkuna.
4Nhunapinyay, Garray, ŋarra ŋayaŋu-yätjkuŋala,
liŋgu ŋarra ḏaw'yurruna nhuŋu rom.
Dhunupa warray nhuŋu yulŋunydja, ŋunhi nhe ŋarranha rom-nyamir'yurrunanydja, murr'yunmaraŋalanydja manapara;
5Yuwalknha ŋarra dhuwala yätjtja ḏarramu.
Yo, beŋuru liŋgu ya' ŋunhi ŋarra ŋäṉḏi'mirriŋuwala gulunŋura,
ga yana liŋgu dhawal-wuyaŋina ŋarra dhuwurr-yätj yana.
6Garray, nhe ḏukṯuk ŋarraku, ŋarra yurru nhina yukurra ŋayaŋunydja-ḏarrtjalk,
garrkuḻuk nhenydja yana, ga yuwalkŋu walŋu.
Guryunmaraŋa ŋarrakala ḻiyalili ḏarrtjalk ga dhunupa guyaŋinyara.
7Rurrwuyurrana nhe ŋarranha Garray, garrkuḻukkuŋana,
bala ŋarra yurru garrkuḻukthirrina.
8Liŋguna nhe ŋarranha muŋdhurrunanydja yukurrana, buḻwaŋ'maraŋalanydja,
dhä-ḏir'yurruna yätjŋuru ŋarranha.
Garray God, ŋayaŋu-ŋamathaŋana ŋarranha,
märr ŋarra yurru biyapul ŋayaŋu-ŋamathirriyi.
9Maŋutjinydja nhe dhaḻ'yunmiya, Garray,
ga yaka weyin nhäŋa ŋarraku yätjtja dhuwurr;
Rurrwuyurrana yana biḏiwiḏitjkuŋana ŋarrakala yätjtja dhuwurr.
10God, yuṯakuŋana ŋarranha ŋayaŋunydja,
wirrkina garrkuḻukkuŋa, ḻatju'kuŋana walŋu;
Nherrala yuṯana walŋu birrimbirr ŋunha ŋarrakala ŋayaŋulili.
11Yakana ŋarranha ḏupthurra nhokiyingala goŋŋurunydja,
yaka djaw'yurra Walŋanha ŋunhi Birrimbirrnha ŋarrakala.
12Ŋäthilinydja ŋunhi nhe walŋakuŋala ŋarranha ya',
ŋarra ŋulinyaramirriyunydja wirrkina ŋayaŋu-djulŋithina.
Garray, wekaŋana lili roŋinyamaraŋana ŋarranha ŋunhiyi yana liŋgu ŋayaŋu-djulŋithinyara;
Mulkiya ŋarranha, Garray, märr yurru ŋarra bitjan liŋgu dhäruk-märranharamirri nhuŋu yulŋunydja.
13Bala ŋarra yurru marŋgikuma ŋunha yätjmirrinhana yolŋu'-yulŋunha,
walala yurru marŋgithirri nhokalaŋuwu romgu,
bala roŋiyirri liliyi yurru nhokala.
14Garray God, nhenydja ŋarraku walŋakunharamirri.
Walŋakuŋana ŋarranha go, dhawaṯmaraŋana rakunyŋurunydja romŋuru,
bala ŋarra yurru dhäwuny'tja barrkuwatjkumana ḻakarama nhokalaŋuwuy,
ŋunhi warray ŋunhi nhenydja ŋuli djäma rom-dhunupa yana.
15Guŋga'yurrana ŋarranha, bala dhäruk wekaŋana ŋarraku,
bala ŋarra yurru nhuŋu wokthunna waŋana dhiyaŋu ŋarrakalay dhärukthuna.
16Ŋuli nhe bini ḏukṯukthinya ŋanapurruŋgu yolŋu'-yulŋuwu,
ŋanapurru bini bunha wäyin murrkay'kunha, mundhurr-wekanharawu nhuŋu,
bala ŋarra bini gänhanydja nhuŋuna Garray,
yurru nhenydja yaka warray bini ŋayaŋu-djulŋithinya ŋuriŋiyi mundhurr-wekanharayu.
17Nhenydja yukurra ḏukṯukthirri ŋarrakuway,
ŋarra yurru yana ŋarrapi nyilŋ'maranharamirri ŋarranhawuy ŋarra,
bala wekanharamirrina nhokala,
bala yana wuyunmirrina ŋurikiy yätjpuy ŋunhi yukurra ŋorra ŋunha ŋayaŋuŋura ŋarrakala.
Yo, ŋunhi ŋarraku yurru ŋayaŋu wuyunmirrinydja,
bala gonha'yunna yätjtja, ŋapa-wekamana yurru ŋurikiyinydja,
ga yakana nhe ŋuli ŋarranha ŋurrkamanydja.