Ḻakarama yukurra ŋurruŋunha ŋunhi ŋayi yurru marrtji lili yalala
9:9-17 (The future King)
9Yo, biyaka goŋmirriyiyana ŋayaŋu-djulŋithiyana wal'ŋu wirrkina, nhuma yolŋu walala ŋunhi nhuma Djäyanbuy wäŋawuy bukuwuy; miyamala manikaynydja goŋmirriyiya wal'ŋu, ŋayaŋu-yiŋgathiyana yanana nhuma yolŋu walala Djurutjalambuynydja. Nhäŋana ya', nhumalaŋgu buŋgawanydja marrtjina yukurra lili nhumalaŋgala; ŋayinydja ŋunhi Walŋakunharamirri, ga liŋguna ŋayi djuḻkmaraŋalana miriŋunhanydja ŋunhinydja. Yurru ŋayinydja dharraḏa yolŋu, yaka ŋayi ŋuli garrwar-ḻakaranhamirri ŋanyapinyay ŋayi be, ŋayi yukurra marrtjinydja lili, gorruma marrtji ŋunhilimi yutjuwaḻa'wala yarraman'kalanydja, yuṯaŋura gal'ŋu, ga yaka ŋayi marrtjina ŋuriŋi be ḏälyunydja wal'ŋu yarraman'thu.
10Yo, ŋayi Garraynydja waŋana bitjarra, “Yakana yurru biyapulnydja mulkurunydja yolŋu miṯtji marrtji, ga bunharamirri yukurra nhumalaŋgalanydja, ŋunhi nhuma ŋarraku yolŋu walala Yitjural bäpurru'; yakana biyapulnydja nhumanydja yurru bunharamirri yukurra ŋula yolkala, yanana nhuma yurru ḏaw'-ḏawyunna yukurra ŋunhi bunharaminyarawuynydja girri' malanha. Liŋgu ŋayinydja yurru nhumalaŋgala buŋgawayunydja ŋurruŋuyunydja ŋuriŋiyi nherraṉ ŋayaŋuwurrkurrum'thinyaramirrina rom; bukmaknha yurru bäpurruny'tja nhina yukurra ŋayaŋu-yal'yunna, wurrkurrum'nha yanana marimiriwnha nhämiriwnha nhanukalaynha goŋŋura, liŋgu ŋayinydja yurru ŋunhi ŋurruŋu buŋgawana wal'ŋu bukmakkuna yanana ŋuriki Yitjuralwunydja wäŋawu, beŋuru waŋganyŋuru gali'ŋuru ga ŋunhana bala gali'lili wapthun, ga ŋuliŋuruyinydjayi yurru romdja nhanŋu baḻaka'yun monyguma bena-wala, barrkuna wäŋa monyguma yurru. Ga ŋayipina yana waŋganynha yurru buŋgawanydja bukmakku wäŋawu buku-ḻiw'marama.”
11Yo, ŋayi Garray waŋana bitjarra gam', “Yitjural, nhumanydja dhuwala ŋarrakuway yana wal'ŋu dhulŋuŋu; ŋilimurrunydja dhuwala waŋganynha yana dhambay-manapanarana, liŋgu ŋuriŋinayi dhawu'-nherraṉarayu ŋunhi yukurra dhärra wuṉḏaŋarrnha ŋanyana dhika wal'ŋu, liŋgu ŋuriŋi gulaŋ-wanṉḏinyarayu. Dhiyaŋunydja-wala nhuma yolŋunydja walala nhina yukurra garrpiṉarawuynha baṉḏanyŋurana wäŋaŋuranydja gapumiriwŋurana, yurru ŋarranydja nhumalanha yurru dhawaṯmarama beŋuruyi, dhayaḻakumana wal'ŋu. 12Nhuma dhuwali yolŋu'-yulŋu nhina yukurra gatjpu'yun yulŋunydja, ŋunhi ŋarra yurru nhumalanha dhawaṯmaramana beŋuruyi garrapiṉminyaraŋurunydja romŋuru. Ma' gaŋgathiyana biyakana walala ḏurryurrana, ga roŋiyiyana marrtjiya lili wäŋa-roŋiyiyana, märr nhe yurru yukurra nhina gunganharawuyŋurana wäŋaŋura walŋamirriŋurana. Ŋayaŋu-yätjthina nhuma yukurrana burakinanydja wirrki yana, yurru dhiyaŋunydja-wala ŋarranydja yukurra nhumalanha dhawu'-nherraṉ, ŋunhi ŋarranydja nhumalanha goŋmirriyama warray yurru wekama, biyapul warray wal'ŋu dhika warray. 13Yo, nhumanydja dhuwalayi Yitjuralpuyŋunydja yolŋu'-yulŋu balanyara bitjan bonarra ŋunhi ŋarrakala goŋŋura; ŋuriŋi nhumalaŋgalanydja ŋarranydja yurru bumana yanana baḏuwaḏuyunna ŋunhi miriŋunhanydja.”
14Yo, ŋayi yurru Garraynydja Waŋarrnydja maḻŋ'thunna ŋunhi waŋupini'ŋurana, monygumana ŋayi yurru nhanŋuwaynydja ŋayi ŋunhinydja yolŋu'-yulŋunha, bala djirryunmaramana ŋayi yurru marrtji garanydja malanha ŋunhinydja ŋurikala miriŋuwalanydja. Yo, ŋayipinydja yurru Godthunydja Waŋarryunydja yiḏakina ḻoḻthunmarama, bitjan ŋayi yurru wäthunna nhanukalayŋuwunydja ŋayi miṯtjiwu yolŋu'-yulŋuwu ŋuriki mariwuna nyäṉ'thunarawuna. Bala dhunupana yana ŋayi yurru marrtjina yulŋunydja-wala, ŋurruthirrina yurru yanana, bitjanna bitjan wärrk yurru marrtji, ga yanana ŋayi yurru baḏuwaḏuyunna-wala yulŋunydja ŋunhi miriŋunhanydja walalanha.
15Yo, Garraynydja ŋunhi Waŋarr ŋayi wal'ŋu Ganydjarr-ḏumurru; ŋurruŋu ŋayi ŋurukuy djiwarr'wuy miṯtji-warryunarayŋu, ŋayina yurru gunganhamirriyama ŋunhi nhanŋuwaynydja ŋayi yolŋu'-yulŋunha, ga walalanydja yurru ŋunhi nhanŋuwaynydja yolŋu'-yulŋu marrtji muŋdhu'-muŋdhunna djalkiriyuna ŋuriŋina walalaŋgalay walala ŋunhi miriŋunhanydja, buḻwaŋ'maramana warrpam'thunna yurru yana baḏuwaḏuyundja walalanha. Yo, walala yurru yatjunna-wala yulŋunydja yana wal'ŋu, bitjanna bitjan yolŋu ŋuli leŋumirri yatjun ŋänitji'yu, ga bumanydja walala yurru walalanha miriŋunhanydja, gulaŋ-wurr'wurrmaramana dhikana wal'ŋu warrpam'thunna yana.
16Yo, ŋulinyaramirriyunydjayi ŋayipinydja yurru Godthunydja Waŋarryunydja walŋakumana ŋunhi nhanŋuwaynydja ŋayi yolŋu'-yulŋunha, bitjanna gunganhamirriyamana yurru ŋayi, bitjan yana liŋgu bitjan ŋuli wäyin-djäkamirriyu ŋuriŋi nhanŋuway ŋayi gunganhamirriyama wäyinnha malaŋunha ŋula nhäŋuru. Ga nhanŋuwaynydja ŋunhi yolŋu walala yurru balanyarana bitjan dhapirrk dhika ŋanya guṉḏa malanha, ŋunhi yukurra djaḻka'-djaḻkarryun ŋunhilimi buŋgawawala wal'ŋu muḻkurrwuyŋura girri'ŋura, liŋgu bukmakthuna yurru yolŋuyunydja buku-ḻiw'marama nhämanydja nhanŋu Garraywu dhapirrktja dhikanydja ŋanya wal'ŋu ŋurikalayina walalaŋgala nhanukalaŋumirriwalana Garraywalaŋumirriwalana yolŋu'-yulŋuwala.
17Yo, Garraynydja dhuwala biyapul ŋayi dhapirrk dhika wal'ŋu ŋanya ḻatju', ga gämanydja ŋayi ŋuli wirrki yana wal'ŋu nhanŋuwaynydja ŋayi yolŋu'-yulŋunha, goŋmirriyama dhika wal'ŋu. Yo, ŋunhi yuḏatjpal yolŋu'-yulŋu yurru ŋuthan marrtji wuṉḏaŋarryirrina dhikana wal'ŋu, ŋuriŋi ŋathayu ga weyika'yuna, ŋunhi ŋayi yurru Garrayyu wekama, ga nhinanydja walala yurru yukurra goŋmirriyirrina dhikana wal'ŋu, gupaḏalnha-wala galŋa-djulŋithirrina yurru.