Manikay ḻakarama yukurra wokthunarawuynha
40:1-11 (A song of praise)
1Yo, ŋarra galkurrunanydja yukurrana ŋayaŋuyunydja wurrkurrum'thu,
bukumirriyaŋala bitjarra marrtjina Garraywala,
ga ŋayi ŋäkulanydja ŋarranha, bala yana guŋga'yurrunana.
2Bitjarra ŋayi waṉa-djarryurruna märraŋala ŋarranha,
bala warryurrunana ŋuliŋurunydja ŋunhi ŋarra yukurrana ŋorrana balanyaraŋura bitjan dhoḻu ŋunhi wäŋa.
Yo, dhawaṯmaraŋalanydja ŋayi ŋarranha warryurruna ḻaw'maraŋalanydja,
bala nherrara ŋunhana guṉḏalilina galŋu,
bala ŋarra dhuwala dhärranydja yukurra walŋana, ŋayaŋu-walŋana ŋarra.
3Ga biyapul ŋayi wekaŋala ŋarraku manikay yuṯana galŋu dhikana,
ŋuriŋiyi manikayyunydja ŋarra yukurra wokthunna nhanŋu ŋilimurruŋgalaŋuwu Garraywuna.
Yo, bukmakthuna yurru ŋunhi nhämanydja,
bala rom-wiyaṉiyirrina yurru walala Garraywunydja,
bala ŋayaŋu-nherraṉmirrina yurru nhanukala.
4Yo, ŋayipi yurru Godthunydja goŋmirriyamana ŋunhinhanydja yolŋunha ŋunhi ŋayi ŋuli ŋayaŋu-nherraṉmirri galŋu nhanukala,
ga ŋunhinhanydja ŋunhi ŋayi yurru yaka malthun yukurra ŋuriki walalaŋgu ŋunhi walala ŋuli ŋapa-nherraṉmirri Godku,
ga yaka ŋuli ŋayi waŋgany-manapanmirri galŋu ŋurikala yolŋu'-yulŋuwala ŋunhi walala ŋuli buku-ŋal'yun yukurra wiripuŋuwu waŋarrwu;
Ŋayi yurru ŋunhiyinydjayi yolŋu nhina yukurra goŋmirriyirrina dhikana djulŋithirrina.
5Gunhu' Waŋarr, nhenydja ŋunhi djäma mirithirri manymak galŋu yana rom malanha ŋanapurruŋgu,
ga yakana ŋula waŋgany waŋarr balanyara biyaka ŋuli nhe.
Bitjan warray liŋgu nhenydja ŋuli gurrunhan ŋamakurru' warray yana dhukarr ŋanapurruŋgunydja,
nhepina yana waŋganynha walŋu ŋamakurruny'tja dhikanydja Waŋarr.
6Yaka nhenydja ḏukṯuk ŋurikinydja, ŋunhi ŋarra yurru gäma nhuŋu mundhurr-wekama ŋula wäyinnhanydja bathanarawu ŋunhi barŋlilinydja,
yakana yana nhe ŋuli bäy-ḻakarama ŋurikinydja ŋunhi ŋarra ŋuli wekama nhuŋu ŋula nhä;
Yana nhenydja ŋunhi mäkiri'na ḻapmaraŋala ŋarraku,
märr yurru ŋarra ŋäma nhunapinyay dhäruk.
7Bala ŋarra mäkiri'-witjurrunanydja ga ŋäkulana yana,
ga waŋana bitjarrana nhokala, “Garray, dhuwalana ŋarranydja.
8Nhokala ŋuriŋi djorra'yunydja ḻakarama yukurra ŋarranhanydja,
ŋunhi ŋarra ŋuli ŋayaŋu-djulŋithirri nhokalayŋuwu yana djälwunydja malthunarawu;
Nhepi yana ŋarraku Godtja,
ga ŋayathamanydja ŋarra yukurra baṯ bitjan nhuŋuway yana romdja ŋarrakalay ŋayaŋuyunydja.”
9Yo, liŋguna ŋarra Garray waŋananydja ḻakaraŋalanydja marrtjina yolŋu'-yulŋuwanydja,
ŋuripanydja ŋunhi walala ŋuli ḻuŋ'maranharamirri waŋgany-manapanmirri nhuŋu yolŋu'-yulŋu,
ŋarra ḻakaraŋalanydja bitjarra ŋunhi nhenydja walŋakunharamirri ŋanapurruŋgu.
Garray, nhenydja marŋgi muka ŋarrakunydja,
ŋunhi ŋarra yurru yaka ḏaḏawyundja ḻakaranharaŋuru ŋuliŋuruyi manymakŋurunydja dhäwuŋuru.
10Yaka yana ŋarra ŋuli djuḻuḻ'maramanydja ŋarrakuwaynydja ŋarra ŋayaŋuyu,
bitjan bili yana ŋarra ŋuli ḻakaramanydja marrtji nhokalaŋuwuy, ŋunhi nhenydja God märr-yuwalkthinyaramirri,
ŋunhi nhenydja yurru bitjan warray liŋgu walŋakuma yukurra ŋanapurrunha.
Yo, ŋunhi walala ŋuli yolŋunydja walala marrtji waŋgany-manapanmirrinydja,
ŋarranydja ŋuli yana ḻakaramana walalaŋgu warraŋulkumana nhuna,
ŋunhi nhenydja yuwalk yana galŋu märryu-ḏapmarama yukurra ŋanapurrunha.
11Garray, ŋarra marŋgi nhuŋu yolŋunydja, ŋunhi nhenydja yurru bitjan warray liŋgu maŋutji-wuyunaramirri ŋarraku,
bitjan liŋgu yana nhe yurru yukurra gämanydja ŋarranha nhokalay nhe märr-ŋamathinyarayunydja,
bitjan gunganharamirriyamana ŋarranha nhäŋuru yätjŋurunydja.