Ŋurruŋuna walŋu yana ŋayi Garraynydja
2:1-12 (God is in control of all things)
1Nhäku warray walala ŋuli miṯtjiyu yolŋu'-yulŋuyu nyinyaŋdhundja, ŋapa-nherraṉmirrinydja nhanŋu Godku?
Nhäku warray walala ŋuli waŋa bitjandja, “Ŋanapurrunydja yurru yukurra nhina ŋanapurruŋgala yana djälkurru ga guyaŋinyarakurru walŋu.”
2Walala ŋunhi ŋurru'-ŋurruŋunydja buŋgawamirrinydja ŋuli waŋa bitjan, “Yakana yurru ŋanapurruwaynydja buku-nyilŋ'thun ga dhäruk-märrama ŋanya Garraynha,
ga ŋunhinhanydjayi ŋunhi ŋayi djarr'yurruna be buŋgawa ŋanapurruŋgu ŋayi.
3Yana ŋilimurru dhayaḻakunhamirrina, yänana walŋu nhina yukurra.
Yakana ŋanapurrunydja yurru nhina yukurra garrpiṉara Garraywuŋunydja wo ŋula yolkuŋu yolŋuwuŋu,”
bitjan walala ŋuli yukurra waŋanydja.
4Ga ŋayinydja Garraynydja ŋunha yukurra nhina. nhanukalay ŋayi wäŋaŋura djiwarrŋura,
nhämanydja ŋayi yukurra, bala gitkitthunna yana;
bitjan ŋayi yukurra warku'yunna ŋunhinydja yolŋu'-yulŋunha,
ŋunhi walala ŋuli guyaŋirri yanapi walala yurru djuḻkthunmarama ŋanya Garraynha.
5Bala ŋayi yurru waŋanydja nhanukalay ŋayi ŋuriŋi ŋaramurryuna,
ga walalanydja yurru barrarirrina yanana.
6Bala ŋayi Godtja yukurra waŋa bitjanna, “Liŋgu ŋarra nherrara buŋgawanhanydja yolŋunha galŋu ŋunhala muka ŋunhi Djäyan bukuŋura,
ŋayina yurru nhinanydja yukurra ŋurruŋuna ŋayi walŋu bukmakkuna.”
7Yo, ŋarra nhumalaŋgu yurru ḻakaramana ŋunhi nhaltjan ŋayi yukurra Godthu ḻakarama, ga waŋa ŋarrakalaŋuwuy,
waŋanydja ŋayi yukurra bitjan, “Nhenydja dhuwalanydja gäthuna ŋarraku.
Gäthuranydja waluyu ŋarra nhuŋu bäpa'mirriŋuyinana.
8Ga waŋanydja nhe yurru ŋäŋ'thundja ŋarranha,
ga ŋarranydja yurru nhuŋu wekamana miṯtjinhanydja bukmaknha yana;
Bukmak ŋunha miṯtji ga bäpurru' yolŋu walala buku-ḻiw'marama ŋunha munathaŋura wäŋaŋura,
warrpam' nhuŋuway yana walŋu.
9Nhenydja yurru walalanha bitjan ḏaw'-ḏawyunna ŋuriŋina ḏälyuna galŋu dharpayu,
ŋunhi walala yurru yakanydja dhäruk-märrama nhuna;
walala yurru ḏaw'-ḏawyundja marrtji muṉguythirrina ŋuriŋi nhokalay goŋdhunydja bunharayunydja,”
bitjarrana yukurrana Garray waŋananydja.
10Yo, nhuma ŋurru'-ŋurruŋu buŋgawamirri yolŋu walala,
mäkiri'-witjurra walala dhiyaku dhärukkunydja, ga marŋgithiya muka,
dhiyaŋuyinydjayi dhärukthu ŋarra nhumalanha yukurra raypirri'yun waŋa.
11Rom-wiyaṉiyiyana biyakana Garraywunydja, ga märr-ŋal'yurra nhanukalaynha;
12Marr'-marryurrana biyakana, ga nyilŋ'maranhamiyana nhanukala,
märr yurru ŋayi yaka muka waḏutjanydja nhumalaŋgu maḏakarritjthirri,
bala baḏuwaḏuyundja nhumalanha warrpam'thundja yurru.
Yurru ŋayipinydja Garraynydja walŋu ŋilimurruŋgu ŋurrwu'na,
ŋayina yurru gunganhamirriyamanydja ŋula yolnha yolŋunha ŋunhi walala yurru marrtji nhanukalanydja,
ga ŋunhiyinydjayi yolŋu yurru nhina goŋmirriyanharawuynha walŋu yana Garraywuŋunydja.