Ŋarranydja walŋa warray djäkaŋura Godkala warray
16:1-11 (I am safe in God's care)
1Garray God, gunganhamirriyaŋa ŋarranha,
liŋgu ŋarra yukurra märr-nherraṉmirri nhokalay galŋu yana;
Nhepi ŋuli ŋarranha gämanydja ḻatju'kuma dhika.
2Ŋarra ŋuli waŋa Garraywala bitjan, “Nhenydja dhuwala ŋarraku Garray;
Bukmak nhä malanha ŋunhi ŋarra yukurra ŋayathama nhokuŋuway yana warrpam' ḻatju'mirri ŋanya dhika.”
3Ŋarra yukurra märr-ŋamathirri ŋurikinydja yolŋu'-yulŋuwu ŋuli walala yukurra märr-ŋamathirri nhuŋu;
Yuwalk ŋarra yana ḏukṯukthirri yukurra nhinanharawu walalaŋgunydja galkiwunydja galŋu.
4Wiripu-guḻkuny'tja yurru gulŋiyirri yukurra marilili, yindilili walŋu,
liŋgu mirithirri walala yukurra ḏukṯukthirri wiripuŋuwuna waŋarrwu.
Ŋarranydja yurru yaka buku-ŋal'yun yukurra walalaŋgalaŋuwunydja waŋarrwu,
ga yaka yurru ŋarra mundhurr-wekama ŋula nhä bitjan gulaŋ-waṉḏinyamarama walalaŋgalanydja.
5Garray, ŋarranydja ḏukṯuk nhuŋuway yana waŋganygu,
nhenydja ŋuli marrtji rarryun bukmak nhänydja malanha ḻatju' dhika ŋarraku,
ga dhuwalana gay' ŋarra yulŋunydja nhokala goŋŋurana.
6Nhenydja ŋamakurru' walŋu yana God, ga wekamanydja nhe ŋuli nhä ŋamakurru,
ŋunhina liŋgu dhapirrkmirrina dhika walŋu nhe ŋuli wekamanydja ŋarraku.
7Ŋarra wokthun nhuŋu yulŋunydja Garray,
liŋgu nhepi ŋuli gämanydja ŋarranha marrtji ŋuliwitjandja dhukarrkurru dhunupakurrunydja;
munhakunydja ŋuli nhe ŋarrakala waŋa ŋayaŋuŋura ŋunha walŋu,
marŋgikuma ŋarranha marrtji bitjan nhäku malaŋuwu ŋamakurru'wu,
ga dharraykuma nhe ŋuli waŋa ŋulaŋuru yätjmirriwalanydja.
8Garray, bitjan warray liŋgu ŋarra ŋuli guyaŋirrinydja yukurra nhuna,
ŋunhi nhenydja dhiyalami bitjan liŋgu ŋarrakala ŋuli galki.
Galki yana nhenydja ŋarrakala,
yakana ŋarranha yurru ŋula nhäyu galkinyamaramanydja.
9Dhiyakuyinayi märrwu ŋarra yukurra djulŋithirrina yana wirrkina yulŋunydja,
ga ŋayaŋunydja ŋarraku yukurra mirithirrina walŋu goŋmirriyirri dhikana.
Ga nhinanydja ŋarra yurru walŋana yana,
gunganharayu ŋuriŋina nhokalaynha ganydjarryu walŋamirriyuna.
10Nhe ŋarranhanydja yurru walŋakuma beŋuru rakunydhinyaraŋurunydja romŋuru,
yaka nhe yurru ŋarranhanydja gonha'yun ŋunha ŋunhi rakunymirriwalanydja wäŋalili.
11Nhe malŋ'maraŋala ŋarrakala dhukarr ŋunhi walŋamirrinydja,
ga ŋunhalanydja ŋarra yurru nhina yukurra nhokalanydja galkina yana walŋu,
bena dhika goŋmirriyirrina ŋarra yurru, ŋayaŋu-djulŋithirrina walŋu.
Ga ŋunhalanydja goŋŋura dhunupaŋuranydja nhokalaynydja ŋarra yurru nhina yukurra goŋmirriyirrina, gupaḏalnha-wala yanana yurru.