Wokthurrana Garraywu go
148:1-14 (Let everything praise the Lord)
1-2Wokthurrana Garraywu go, nhuma bukmak yana djiwarr'wuynydja nhä malanha.
Wokthurrana Garraywuna nhuma yolŋu walala djiwarr'wuy, nhanŋu dhäruk-märranhamirri walala,
wokthurrana nhanŋu, goŋmirriyiyana walala.
3Nhe walu ga ŋaḻindi,
ga wiripuwurru ganyu' walala, wokthurrayi nhumanydja nhanŋu.
4Nhe gärak, ga waŋupini malanha,
nhumanydja wokthurrayi yukirriya walala, biyakayi bili.
5Nhumanydja dhuwalinydja malanha djiwarr'puyŋunydja, wokthurra bukmaknha yana,
yäkuna garrwarkuŋa ŋanya Garraynhana.
Bili ŋayi Garray waŋana, dhäruk waŋgany,
bala yana marrtjina nhä malanha maḻŋ'thurrunana;
6Ŋayi nherra'-nhirrara nhumalanha nininygarrmurana,
nhuma dhuwali bukmak yana djiwarr'puyŋunydja;
Wokthurrana walala,
märr-yiŋgathiyana Garraywu.
7Ga nhuma bukmak yana munatha'wuynydja nhä malanha,
Wokthurrayi Garraywuna,
nhuma guya walala, ga wiripu-guḻku' nhä malanha ŋunhi marrtji ŋorra gapuŋura dhuḻupurrŋura,
wokthurrana nhumanydja gatjuy.
8Nhe maḻwurrk, ga maykarraṉ', ga wärrk, nhanŋu dhäruk-malthunaramirri walala,
wokthurrana nhanŋu Garraywu.
9Ga nhe wäŋa ŋaraka, buku ga djulam,
borummirri dharpa ga retja malanha,
wokthurrana walala nhumanydja.
10Ga nhuma wäyin walala boḏinymirri ga maḏakarritjmirri,
gaḻ'yunaramirri ga buṯthunaramirri,
ḏiltjiwuy ga raŋiwuy,
wokthurrana nhumanydja bukmaknha yana.
11-12Nhuma yolŋu walala, buŋgawamirri ŋurru'-ŋurruŋu ga wiripu-guḻku' yolŋu walala,
yuḏayuḏa yawirriny' dhäykawurru ga ḏarramuwurru,
worru'-wurruŋu ga djamarrkuḻi',
nhumanydja wokthurrayi Garraywu, goŋmirriyiyana walala.
13Nhuma dhuwala bukmak yana munatha'wuynydja nhä malanha,
wokthurrana walala,
märr-yiŋgathiyana Garraywu.
Liŋgu Garraynydja dhuwala yäku-ḏumurru, djuḻkmarama yukurra wiripu-guḻku'nhanydja;
Ŋayinydja yukurra nhina ŋunha djeŋarra'na dhikana, garrkuḻuknha,
biyapulnha-wala walŋu garrwarnha,
buku-nyumaramana yukurra munatha'na ga djiwarr'nha.
14Garraynydja yukurra wirrkina ŋayaŋu-ŋamathirri nhanukalayŋuwu yolŋu'-yulŋuwu;
Ŋilimurru Yitjuralpuyŋunydja marrkapmirrina walala nhanŋu,
ŋayi ŋilimurrunha ganydjarrmirriyaŋala,
märr ŋilimurrunydja yurru nhanŋu wokthunna.
Wokthurrana go Garraywuna.