Waŋgany buŋgawa ŋurruŋu walŋu nherraṉara Godkuŋu
110:1-7 (The king appointed by the Lord)
1Garraynydja God Waŋarrnydja waŋana ŋarrakalaŋuwalanydja Garraywala bitjarra,
“Go nhiniya galki dhiyala gay' ŋarrakala galiŋura dhunupaŋuŋura,
yana liŋgu ga galkinyamarama ŋarra yurru nhuŋu miriŋunha ŋunhi,
bala nhe yurru djalkirina dhärra walalaŋgala miriŋuwalanydja nhokalaŋuwala.”
2Yo, Garrayyunydja liŋgu nhuna nherrara,
nhe yurru yukurra nhinana buŋgawana ŋurruŋuna walŋu ŋunhala Djurutjalamdja;
Ŋulaŋuruyinydja nhenydja yurru buŋgawana ŋuriki nhokalaŋuwu ŋunhi miriŋuwunydja walalaŋgu,
bukmakthirrina walala yurru bun'kumu-djipthundja nhokala.
3Yurru nhuŋuwaynydja galŋu ŋunhinydja yolŋu walala yurru malthun marrtji yänana-wala nhuŋu,
ŋuriŋinydja waluyu ŋunhi nhe yurru marrtji lili nhokalay nhe ganydjarryu bathalayu walŋu,
djuḻkmaranharawu ŋuriki miriŋuwunydja walalaŋgu.
Yurru dhaṯthunmirrinydja walala yurru ŋunhiyi walala ŋuriŋina ḏarrtjalkthuna dhikana girri'yunydja mel-wiḏi'yuna,
ga ŋunhi yolŋu walala yuḏayuḏa yurru marrtji galkithirrina nhokala ŋunhawalana dhuyulilina bukulili.
4Yo, ŋayipi Garrayyu Waŋarryunydja dhawu'-nherrara yulŋunydja ŋunhiyi,
ga dhawu'-nherraṉarawuynydja ŋunhiyi yurru yukurra dhärrana bitjanna liŋguna-wala djambimiriwnha nhämiriwnha;
Ga dhuwala ŋayi bitjarra dhawu'mirriyaŋalanydja gam':
Nhenydja dhuwala ḏalkarra'mirri ŋunhi yolŋu walŋu,
dhärranydja nhe yurru yukurra gupaḏalnha-wala, bitjanna liŋguna yurru,
yurru balanyarana nhe yurru ŋunhi ḏalkarra'mirrinydja gam' bitjan Milkitjitik yäku yolŋu,
ganaŋ'thun yukurra yana walŋu wiripu-guḻku'walanydja ḏalkarra'mirriwala walalaŋgala.
5Yo, ŋayipinydja Garraynydja yukurra dhärra dhunupaŋuŋura yana galiŋuranydja walŋu nhokala,
ga ŋulinyaramirriyunydja ŋunhi ŋayi boŋguŋu ŋaramurryina wirrkina,
bala ŋayi boŋguŋu buŋuna marrtji baḏuwaḏuyurruna buŋgawanhanydja walalanha,
warrpam'thurruna yana buwayakkuŋuna biyakuna.
6Yo, dhä-wirrka'yundja ŋayi yurru mala-yarr'yundja bitjandja ŋunhi dhuwurr-yätjmirrinhanydja miṯtjinha,
bala ŋayi yurru dhä-ḏir'yunna walalanha yana yulŋunydja warrpam'thunna,
ga wäŋanydja ŋunhi yurru gungama ŋuriŋi rakunymirriwalanydja rumbalyu,
Walala yurru marrtji ŋorra warrpam'nha murrmurryunarana rakunymirrina,
yolŋu'-yulŋu ŋunhi ga walalaŋgu ŋurruŋumirri.
7Ga ŋayipinydja yurru Garraynydja marrtjina yukurra lili,
marrtjinydja ŋayi yurru yukurra ŋuliwitjandhinayi gapumirrikurruna wäŋakurrunydja,
ḻuka marrtji ŋayi yurru yukurra bala.
Bala ŋayi yurru dhärranydja wuṉḏaŋarrnha dhikana walŋu,
djuḻkmaramana yurru ŋunhi miriŋunhanydja.